shadow
Diocese de Dili > NOTÍCIAS > REFLEXÃO > Leitura no Reflexão

Leitura no Reflexão

FESTA SAGRADA FAMILIA NIAN

 

Primeira Leitura                                                 Sir. 3, 3-7. 14-17a ou 2-6. 12-14

Lia housi Livro Ben Sirá

Na’i hahí aman sira iha oan sira nia oin; Na’i tahan inan sira nia ukun kona ba oan sira. Ema nebé hamta’uk nia aman, sei hetan perdua ba nia salan; ema nebé hahí nia inan, sei halibur soin barak teb-tebes. Ema nebé hahí nia aman, sei haksolok ho nia oan sira; wainhira nia hamulak, Na’i sei rona duni nia harohan. Ema nebé hahí nia aman, nia moris sei naruk. Ema nebé tuir Maromak futar-lia, sei fo ksolok ba nia inan. Ha’u nia oan, tulun ó nia aman, wainhira nia katuas; keta halo nia neon sala, wainhira nia sei moris. Maski nia neon la hanoin tuir ona, ó sei hanoin nia, keta hakribit nia, basá, ó foin sa’e. Di’ak nebé ó halo ba ó nia aman, Maromak sei la haluha. Nia sei kasu tebes ó nia salan.

 

Salmo Responsorial                                                                                                                                                                           Sal. 127, 1-2. 3. 4-5

Refrão: Rahun di’ak ba ema sira nebé hamta’uk Na’i!

                Rahun di’ak ba sira nebé la’o tuir Na’i nia dalan!!! Repete-se

 

Rahun di’ak ba ema be hamta’uk Maromak,

no la’o tuir Na’i nia dalan!

Ó kosar-wén la turu leet ba rai,

riku-soy no ksolok sei horik ho ó! Refrão

 

Ó káben nu’u-malus nadiki iha uma laran;

Ó oan nu’u-bua nasare iha ó sorin. Refrão

 

Bensa ba ema be hamta’uk Na’i,

housi Sião Na’i hahí nia;

“Ó sei haré Jerusalém di’ak liu tan

wainhira ó sei moris”. Refrão

 

Segunda Leitura                                                                                                                                                                                                Col. 3, 12-21

Lia housi São Paulo nia surat ba sarani sira iha Colosso

Maun-alin sira: Imi, Maromak fihir ona, nu’udar ema santo no doben, imi sei laran luak, sei laran di’ak, sei haraik-an, sei laran maus, sei paciência ba malu. Imi sei terus malu, perdua malu, wainhira imi ida iha lia ruma hasouru nia maluk. Nu’udar Maromak perdua imi, nune’e mos imi sei perdua malu. Maibé, kmanek liu ida ne’e, hadomi malu. Basá, domin mak hahalok kmanek liu hotu. Ha’u hakarak Cristo nia dame, horik iha imi laran; Tan dame ne’e mak Maromak bolu imi atu sai isin ida de’it ho Cristo; hatudu ba Maromak imi nia laran di’ak. Husu barak Cristo futar lia-fuan horik ho imi, atu imi hatene hanourin malu, hatene fo lia di’ak ba malu ho neon. Ho laran tomak hananu ba Maromak hodi hatudu imi laran di’ak: Hananu dadolin, hananu hahí, hananu ho lia santo. Ko’alia ka halo buat seluk, imi sei halo hotu hodi Na’i Jesus naran; sei fo agradece ba Maromak Aman hodi Na’i Jesus naran. Feto sira,  sei  haraik-an iha laén sira oin; ne’e mak  lós  iha Maromak futar oin. Mane sira, hadomi imi nia káben; keta hateten lia króat ba sira. Oan sira, halo tuir aman sira, kona ba buat hotu. Basá, ne’e fo ksolok Maromak. Aman sira, keta fo terus imi oan sira, atu sira keta neon salan.

 

Evangelho                                                                                                                                                                                                              Lc. 2, 22-40

Na’i Jesus Cristo nia Evangelho nu’udar São Lucas haktuir

Iha tempo nebá, wainhira to’o loron sira purificação nian, tuir lei Moisés nian, Maria ho José lori Jesus ba Jerusalém atu hasa’e Nia ba Na’i, hanesan hakerek nanis iha lei Maromak nian: “Oan mane hotu be moris uluk (primogénito) sei hasa’e ba Na’i”. No sira atu hasa’e mos nu’udar buat karan, hanesan dehan nanis iha Na’i nia lei, manu lakateu par ida eh manu falur kiik-oan rua. Maibé, hela iha Jerusalém ema mane ida naran Simeão; ema laran mós no harohan na’in ida, nebé hein hela ksolok Israel nian. Espírito Santo iha hela nia. Hato’o tiha ona ba nia housi Espírito Santo, katak, nia sei la mate uluk, wainhira seidauk haré Na’i nia Maksoyn. Halori housi Espírito, Nia mai uma Kreda. Wainhira aman sira lori tiha Labarik-oan Jesus mai, atu halo tuir lolós buat nebé lei haruka nanis kona ba Nia, Simeão simu tiha Labarik-oan iha nia liman laran, fo agradece ba Maromak, hodi dehan: Na’i, oras ne’e, bele husik Ita atan ne’e ba ona ho dame, tuir Ita nia lia-fuan, basá, ha’u matan sira haré tiha ona Maksoyn, nebé Ita haraik tiha ona ba povo hotu nia di’ak: Roman atu fo naroman ba gentio sira, no glória Israel nian, Ita nia povo”. Nia aman ho nia inan hakfodak tiha kedas ho buat nebé dehan kona ba nia oan Jesus. Simeão fo tiha benção ba sira hodi dehan ba Maria, Nia inan: “Labarik-oan ne’e, iha ne’e, atu harahun no atu salva ema barak iha Israel, no atu sai sinal lia la tuir malu nian; surik ida sei sona borus ó no ó klamar. Atu fó hatene sai tiha hanoin sira be subar-an hela iha ema barak sira fuan”. Iha mos nebá, Profeta feto ida, Ana, Fanuel nia oan feto, housi uma-kain Aser nian. Nia tinan barak liu ona no moris nu’udar kábe-na’in iha tinan hitu nia laran, liu tiha nia tempo foin-sa’e nian, no sai tiha faluk to’o tinan walu-nulu resin haat. Nia la hadook-an housi Uma-Kreda, hodi hahí Maromak kalan-loron ho hadera-an no ho harohan sira. Nia mos mosu duni iha tempo nebá, hahú agradece Maromak, no ko’alia kona ba Labarik-oan ne’e, ba sira hotu nebé hein hela Jerusalém nian libertação. Halo tuir lolós hotu buat sira nebé Na’i nia lei haruka nanis atu halo, sira fila hikas ba Galileia, ba nia cidade Nazaré nian. Nune’e, Labarik-oan ne’e boot ba daudaun, hakbiit-An ba daudaun, hakonu-An daudaun ho matenek, no Maromak nia graça hamutuk ho Nia.

 

Hanoin kona ba ó rasik nia fiar: 

Iha Evanjéliu ne’e nia leitura, Espíritu Santu tulun Simeaun atu hatene, Jezus mak mundu rai klaran nia naroman. Jezus mai hanorin ema tomak, Nia lori salvasaun no damen ba ema hotu. Simeaun hahí ba Maromak katak nia moris naruk natón hodi atu haree Mesias nia moris. Ana hahí Maromak, dehan ba ema tomak katak Kosok Oan ita nia Maksoin.  Simeaun ho Ana iha influénsia housi Espíritu Santu tanbá sira iha tempu ba hanoin Maromak no reza. Sira nia laran nakloke no sira hatene Maromak nia prezensa hamutuk ho sira. Maria ho Jozé la komprende di-di’ak buat nebé mosu, sira iha hanoin oi-oin. Ho Jezus nia moris halo diferensa boot ba ema sira ne’e nia moris.  Maromak bolu ita atu hatene katak Jezus mak ita nia naroman no ita nia mestre. Jezus bele halo mós diferensa boot iha ita nia moris. Jezus mai hanesan kosok oan baibain. Bolu ita atu hatene katak saida mak Maromak bele halo ho ita nia moris baibain. Festa Sagrada Família nian, tempu ba ita husu ba ita-an rasik halo nusá mak ita identifika di-di’ak duni Maromak nia prezente/sasolok mai ita. Tempu atu ita apresia Maromak nia prezensa ho ita no ho ita nia família. Ita nia família mak Maromak nia prezente/sasolok mai ita. Hosi ita nia família mak ita aprende uluk katak Maromak hadomi ita. No hosi ita nia família mak ita aprende uluk mós kona ba Jezus.  

 

EVANJELLU –  Lc 2,41-52

Evanjellu ne’ebé ohin propoin mai ita mak parte ikus “Evanjellu infánsia nian”. Ita hatene ona katak “Evanjellu infánsia” nia finalidade mak katekeze ida kona-ba Jezús; iha katekeze ne’e, fó sai sé mak Jezús no aprezenta koordenada teolójika ruma ita haree dezenvolve iha Evanjellu ne’e nia laran. “Katekeze” ohin nian situa ita iha Jerusalém. Lei judaika husu ema sira Israel nian atu bá Jerusalém tina ida dala tolu, iha tempu festa boot tolu peregrinasaun nian (Páskua, Pentekostes no Festa Taka-balu nian – kf. Ex 23,17-17). Maski rabinu sira la konsidera obrigatória lei ne’e to’o tinan 13, maibé aman-inan barak lori oan sira molok otas ne’e. Jezús iha tinan 12, no tuir Lucas, Nia bá Jerusalém ho Maria no José atu selebra Páskua. Iha ambiente Jerusalém no Templu nian ne’e mak Lucas situa laifuan dahuluk ne’ebé Jezús fó sai iha Evanjellu. Ne’e mak sentru ita-nia leitura ohin.

 

MENSAJEN

Xave epizódiu ne’e nian, mak liafuan sira Jezús hateten ba Maria no José, bainhira hetan fali Nia: “tanba sá mak imi buka ha’u? Imi la hatene katak Ha’u tenke hela iha ha’u-nia Aman nia uma?” Signifikadu resposta nian ba Maria nia pergunta mak ne’e: Maromak mak Jezús nia Aman loos. Husi ne’e ita bele hateten katak ba Jezús, ezijénsia Maromak nian mak prioridade fundamentál, ne’ebé boot liu ezijénsia seluk. Ninia misaun – misaun ne’ebé Aman konfia ba Nia – obriga Nia atu ko’a  ligasaun ho família rasik (kf. Mc 3,31-35). Iha ne’e mós iha referénsia ba Jezús nia terus/mate/moris-hi’as: epizódiu ohin nian, nune’e mós faktu sira liga ho mate/moris-hi’as, situa iha kontestu paskál; iha situasaun rua ne’e hotu ita haree ema husik Jezús mesak – iha ne’e Maria no José mka husik Nia no ikusmai, eskolante sira – ema  sira ne’ebé la komprende katak Ninia prioridade mak Maromak nia projetu; iha situasaun rua hotu ema buka Jezús (kf. Lc 24,5) no Nia tenke esplika katak nia moris nia finalidade mak kumpre buat ne’e Nia Aman hakotu ona (kf. Lc 24,7.25-27.45-46). Lucas aprezenta iha ne’e xave atu komprende Jezús nia moris tomak: Nia mai mundu tanba Aman nia mandatu no ho projetu ida salvasaun/libertasaun nian. Sira nee’bé husu tanba sá mak Mesias tenke halo dalan determinadu ida, Lucas hatán: tanba ne’e mak Aman nia hakaran. Atu kumpre Aman nia hakaran mak Jezús mai atu hasoru ita no tama iha ita-nia istória. Iha kestaun rua seluk ne’ebé ita hetan iha leitura no serve mós ba ita-nai reflesaun no edifikasaun: dahuluk, ita haree Jezús nia entuziazmu ba Maromak nia Liafuan no ba kestuan sira mai husi Liafuan; daruak, “deklarasaun independénsia” Jezús nian, bele tulun ita atu komprende katak família la’ós fatin taka nian. iha ne’ebé ema limita ema nia baburas, maibé fatin ida iha ne’ebé ita loke an ba mundu no ba ema seluk, iha ne’ebé ita prepara an atu konkista mundu ne’ebé hale’u ita

Leave a Reply

Your email address will not be published. Required fields are marked *