shadow

Missa 31 kalan

ANO B

 

Primeira Leitura                                                                                                 Gen. 15, 1-6, 21, 1-3

Lia housi livro Genesis

                Liu tiha ne’e, Na’i nia lia tun ba Abrão iha mehi: “Keta ta’uk, Abrão! Ha’u mak ó nia eskudu, no sei fó ba ó prémiu boot ida”. Abrão hatán: “Na’i Maromak, Itaboot sei fó saida mai ha’u? Ha’u oan la iha, no ha’u nia atan Eliezer husi Damasko mak sei hetan liman rohan”. Nia hatutan tan: “Ita boot la haraik mai ha’u jerasaun, no atan ida be moris iha ha’u uma mak sei hetan ha’u-nia liman-rohan”.

Entaun Na’i hateten ba nia: “La’os nia mak sei hetan ó-nia liman-rohan, maibé ida ne’ebé sei mai husi ó-nian isin rasik”. Hafoin, lori tiha nia ba liur, Na’i dehan: “Foti matan ba lalehan no, bele karik, sura fitun sira: barak hanesan ne’e mak sei sai ó-nia jerasaun”. Abrão fiar tiha Na’i; no Na’i fó folin ba nia fiar.

Na’i vizita tiha Sara, nu’udar Nia promete ba nia. Sara ko’us no, iha tempo ne’ebé Maromak hakotu lia, nia fó oan-mane ida ba Abrão, bainhira nia katuas liu ona. Abrão fó naran Isaac ba oan ne’ebé moris husi Sara.

Maromak Futar Lia

 

Salmo                                                                                                                                                                  Sal. 104(105). 1-2, 3-4, 6-7, 8-9 (R. 8ª)

Refrão : Na’i hanoin Nia aliança ba nafatin!!! Repete-se

 

Agradeçe ba Na’i, hahi Nia naran;

Haklaken Na’i nia hahalok iha povo nia leet.

Hananu ba Na’i, Ita Maromak;

Hodi haklaken Na’i nia kmanek. Refrão

 

Imi hahi-an iha Na’i nia naran santo;

Bele hetan ksolok, sira nebé buka Na’i!

Buka Na’i Maromak no Nia kbiit,

Buka nafatin Nia futar oin. Refrão

 

Nia atan Abrão nia bei-oan sira,

Jacob be Nia hili nanis, nia oan sira,

Na’i, ita nia Maromak,

Nia ukun rai-klaran tomak. Refrão

 

Nia hanoin nafatin Nia Aliança,

Hato’o Nia liafuan ba otas hot-hotu;

Aliança be hakotu nanis ho Abrão,

Juramento nebé Nia halo ba Isaac. Refrão

 

Segunda Leitura                                                                                                                                                                                Ebr. 11, 8, 11-12, 17-18

Lia housi livro Ebreu sira nian

Hodi fiar mak Abrão halo tuir Maromak nia bolu atu la’o ba rai ne’ebé Maromak sei fó nudar liman rohan ba nia no ba nia bei-oan sira; hodi fiar ne’e mak nia la’o ba maski la hatene nia atu ba ne’ebé.

Hodi fiar mos mak Sara, maski nia otas liu ona, bele ko’us labarik, basá nia fiar katak ida ne’ebé halo promessa sei halo tuir duni. Tan ne’e, sai hodi ema ida ne’ebé hanesan mate ona bei-oan sira moris mai barak liu sura la bele, hanesan fitun sira iha lalehan eh rai henek iha tasi ibun.

Hodi fiar mak Abrão, wainhira Maromak koko nia, hasa’e Issac. Maski Maromak halo promesa ba nia, Nia hakarak hasa’e nia oan mane mesak. Kona ba oan ne’e Maromak dehan ba nia, “Housi Issac mak ó nia bei-oan sira sei simu naran”. Nia laran metin katak Maromak iha kbiit atu halo ema mate moris hi’as fali; ne’e duni, hodi koalia ho aiknanoik ida, nia simu fali Issac housi ema mate sira leet.

Maromak Futar Lia

 

Aclamação                                                                                                                                                                                                                Ebr. 1. 1-2

Refrão : Aleluia, Aleluia!!! Repete-se       

                  Iha tempo uluk no ho dalan oi-oin,Maromak koalia ba ita nia bei-ala sira housi profeta sira;

                  Ikus mai iha loron hira ne’e, Nia koalia mai ita housi Oan Mane nebé

                  Nia halo nudar liman rohan na’in ba buat hotu,

                  no housi Nia Maromak halo mundo tomak. Refrão

 

Evangelho                                                                                                                                                                                                                Lc. 2, 22-40

Nain Jesus Cristo nia Evangelho nudar São Lucas haktuir

Liu tiha tempo sira nia hamos an nian, tuir Moises nia ukunfuan, sira lori Nia ba Jerusalém atu saran Nia ba Na’i, nudar hakerek iha Na’i nia ukunfuan, katak “Oan mane boot ida-ida sei hanaran an Na’i nia Santo”, no mos atu hasa’e, nudar buat karan, manu falur rua eh manu pombu oan rua, nudar Na’i nia ukunfuan haruka. Ema ida naran Simeão hôrik iha Jerusalém. Nia ema lós ne’ebé hamta’uk Maromak hodi hein Israel nia Ksolok, no Espírito Santo hôrik ho nia. Nia simu lia housi Espírito Santo katak nia sei la mate molok nia hare Na’i nia Kristo. Espírito lori nia ba templo. Wainhira Jesus nia aman no inan lori Kosok Oan Jesus atu halo tuir ukunfuan, nia simu Kosok Oan ne’e iha nia liman, hodi hahi Maromak dehan :

Simeão nia knananuk

“Na’i, oras ne’e Ita Boot husik ona

Ita atan ba iha dame, tuir Ita nia liafuan;

Basá ha’u nia matan haré ona Ita nia Maksoyn

Ne’ebé Ita boot hadia ba povu hot-hotu nia oan:

Naroman atu leno gentio sira

No povu Israel nia glória”.

Kosok Oan nia aman no inan hakfodak ho buat ne’ebé nia dehan kona ba Nia. Simeão fo bensa ba sira, hodi dehan ba nia inan Maria: “Haré ba, labarik ne’e mosu mai atu hatun no foti ema barak iha Israel, no mós atu sai sinal lia la tuir malu nian; no surik ida sei sona borus ita nia fuan atu fó sai buat ne’ebé ema barak hanoin iha sira nia laran.”

Iha mós feto duina ida, naran Ana, Fanuel housi suku Aser nia oan. Nia otas boot ona. Liu tiha nia tempu fetoran nian, nia moris ho nia laen ba tinan hitu; hafoin nia moris nudar feto faluk to’o nia ualu nulu resin haat. Nia la husik templo, maibé serbi Maromak kalan loron, hodi halo jejum no hamulak. Iha oras neba, nia mai hodi fo agradese ba Na’i no koalia kona ba Labarik ne’e ba sira hotu ne’ebé hein maksoyn Jerusalém nian.

Halo tuir tiha buat hotu nebe Na’i nia ukunfuan haruka, sira fila fali ba Galileia, ba sira nia cidade iha Nazare. Labarik oan mós sai boot ba dau-daun no maka’as liu tan, nakonu ho matenek, no Maromak nia graça hela hamutuk ho Nia.

Lia Maksoyn

Leave a Reply

Your email address will not be published. Required fields are marked *