shadow
Diocese de Dili > NOTÍCIAS > LETURA DIÁRIA > Sexta-Feira, Se ocorrer antes da Epifania

Sexta-Feira, Se ocorrer antes da Epifania

ANO B

 

Primeira Leitura                                                                              1Jo. 3. 11-21

Lia housi primeira surat São João  nian

Doben sira: ida ne’e mak lia tatoli nebé ami rona housi hun mai: “Ita sei hadomi malu; ita la bele hanesan Cain, nebé ema hanoin áat nian hodi oho tiha nia alin. Tansá nia oho nia alin? Tan nia hahalok áat sira, maibé nia alin nian mesak di’ak. Maun-alin sira, mundo rai kunan ba imi karik, imi keta hakfodak. Ami hatene katak ami liu housi mate ba moris, tan ami hadomi maun-alin sira. Sé mak la hadomi, nia hôrik iha mate. Ema hotu nebé rai kunan ba nia maun-alin, nia mak oho-dor ema, no imi hatene katak oho-dor ema nian ida la iha moris rohan laek hodi hôrik iha nia. Ita hatene domin nune’e: Cristo saran nia moris tan ita. Nune’e ita sei saran ita moris tan maun-alin sira. Ema ruma iha karik riku-soin mundo ne’e nian, wainhira haré nia maun-alin kuran iha nia moris, taka fuan ba nia, oinsá bele hôrik iha nia Maromak nia domin? Ha’u oan sira, ita la hadomi ho liafuan no ibun de’it, maibé hodi hahalok no lialós. Nune’e ita sei hatene katak ita lialós nian, ita fuan hahu tuku-tuku hodi kesar ita. Basá Maromak boot liu ita nia fuan no hatene buat hotu. Doben sira, ita fuan la tuku-tuku krik hodi kesar ita, Ita laran tomak sei fiar iha Maromak

Maromak Futar Lia.

 

Salmo Responsorial                                                                                                                                                           Sal. 99(100). 2, 3, 4, 5 (R. 2ª)

Refrão : Hananu ba Na’i, rai-klaran tomak!!! Repete-se

 

Rai-klaran tomak hahi Na’i,

Serbi Na’i ho ksolok,

La’o to’o Nia ho knananuk ksolok. Refrão

 

Na’i mak Maromak!

Nia mak halo ita moris, ita Ninian.

Ita hotu Nia povo, nu’udar bibi sira,

Be housi Nia bibi luhan. Refrão

 

Imi tama housi odamatan no uma klabis templo nian,

Hodi agradeçe, hananu knananuk sira.

Imi agradeçe ba Na’i, hahi Nia naran. Refrão

 

Na’i di’ak tebes!

Nia laran-luak rohan laek.

Nia laran metin halekar housi otas ba otas. Refrão

 

Aclamação                                                                                                                                                                                                                Heb. 1. 1-2

Refrão : Aleluia, Aleluia!!! Repete-se       

Iha tempo uluk no ho dala, Maromak ko’lia ba ita nia aman sira

housi profeta sira; ikus mai, iha loron hirak ne’e, Maromak  ko’alia ho ita housi Nia Oan Mane. Refrão

 

Evangelho                                                                                                                                                                                                                 Jo. 1. 43-51

Na’i Jesus Cristo nia Evangelho nudar São João haktuir

Iha tempo neba, Jesus hanoin hodi ba tiha Galileia. Hetan tiha Filipe hodi dehan ba nia: “Ó tuir Ha’u mai”. Filipe housi rai Betsaida, cidade André no Pedro nian. Filipe hasouru Natanael hodi dehan ba nia: “Ami foin hasouru Ida nebé Moisés ho profeta sira uluk hakerek ona iha livro lei nian, mak Jesus Nazaré, José nia oan”. Natanael dehan ba nia: “Housi Nazaré bele mosu buat di’ak ruma?” Filipe hatan ba nia: “Mai haré” Jesus haré Natanael, nebé mai dadaun hasouru Nia ko’alia kona ba nia: “Iha ne’e iha Israelita lós nian ida, nebé iha nia la iha lia bosok!” Natanael husu ba Na’i: “Itaboot hatene ha’u iha nebé?” Jesus hatan ba nia: “Molok Filipe bolu ó, wainhira ó sei tur iha ai Figueira nia okos, Ha’u haré ona ó”. Natanael dehan ba Na’i: “Mestre, Ita Na’i Maromak Nia Oan, Ita Israel nia Liurai!” Jesus hateten teni ba nia: “Tanba Ha’u dehan ba ó: ‘Ha’u haré ó iha ai Figueira nia okos’ tan ne’e mak ó fiar. Ó sei haré buat seluk boot liu ne’e!” no dehan tan: “Tebes duni, Ha’u dehan ba imi: imi sei haré Lalehan nakloke, Mane-Maksoyn iha leten, Na’i Maromak Nia Anjo sira tun no sa’e!”.

Lia Maksoyn

Leave a Reply

Your email address will not be published. Required fields are marked *