shadow
Diocese de Dili > NOTÍCIAS > LETURA DIÁRIA > EPIFANIA DO SENHOR

EPIFANIA DO SENHOR

Ano B

 

Premeira Leitura                                                                                     Is. 60, 1-6

Lia housi Livro Profeta Isaías

Jerusalém, hamríik, nabilan ba! Ó nia Maromak to’o ona mai. Na’i nia naran boot mak haríi ba ó fohon, wainhira kalan taka rai-klaran, wainhira nakukun falun ema sira; maibé housi ó leten, Na’I mosu mai; Nia naran boot mahan ba ó fohon. Ema sira sei tuir ó nia nabilan; liurai sira sei hakat ba ó nia rai-hun mutin. Foti matan hateke lemo-lemo: ema hotu halibur to’o mai ó; ó nia oan mane sira sei to’o housi dook; ó nia oan feto sira ema sei lori to’o mai. Haré tiha ne’e, ó laran sei haksolok-mate, ó fuan sei tuku-tuku makáas. Basá, sei suli mai ó, murak di’ak rai-rai! To’o housi Madiã no Efá, kuda camelo nahisi ó rain. Housi Sabá, ema tomak sei mai, lori osan-mean no ai-wén morin, hodi hahí hananu Na’i nia naran boot.

Maromak Futar lia.

 

Salmo Responsoria                                                                                                                                                            Sal. 71 (72). 2, 7-8, 10-11, 12-13

Refrão: Povo tomak rai-klaran sei mai hana’i Maromak!!! Repete-se

 Maromak, haraik ba liurai kbiit atu tesi lia

Haraik ba liurai oan Ita nia justiça.

Nia sei ukun Ita nia povo ho justiça,

Nia sei tau matan didi’ak ba ki’ak oan sira. Refrao

 

Iha nia loron, justiça sei buras,

Dame sei naruk to’o loron ikus.

Nia sei ukun tasi-mane tasi-feto,

Housi mota boot to’o rai ikun rai ulun. Refrao

 

Liurai sira housi rai Tarsis no rai kiik,

Mai selu rai-ten ba nia;

Housi Sabá no Arábia liurai sira

Sei lori ho mai sira soin;

Iha Nia futar oin, liurai sira hotu tuku-tur ba rai;

Povo hotu-hotu sei serbí Nia. Refrao

 

Nia sei rona ema kiik sira lian,

Nia sei sadia ema neon susar.

Nia sei hanoin ema kbiit laek, ema haraik-an

Nia sei soy ema ki’ak sira. Refrao

 

Segunda Leitura                                                                                                                                                                                                 Ef. 3, 2-3ª, 5-6

Lia housi São Paulo nia surat ba sarani sira iha Êfeso

Mau-alin sira: Imi kala rona ko’alia ona ba Maromak nia graça, graça be Maromak haraik mai ha’u, ba imi nia di’ak tan Maromak hatudu, ha’u hatene Cristo nia misterio ida ne’e, hanesan ohin loron, Nia fó hatene sai ona, hodi Espírito Santo, ba Nia Apóstolo Santo no ba Nia Profeta sira: Ema gentio simu mos liman rohan, hanesan ema Judeus. Gentio no Judeu halo ema isin lolon ida de’it; sira hamutuk, simu hanesan, lia Maromak hakotu ona, hodi Cristo Jesus, housi Evangelho.

Maromak Futar Lia

 

Aclamação                                                                                                                                                                                                                     Mt. 2, 2b  

Refrão : Aleluia, Aleluia!!! Repete-se

                 Ami haré Na’i nia fitun iha loro-sa’e,

                 Ami mai tuku-tur, hana’i ba Nia. Refrão  

 

Evangelho                                                                                                                                                                                                                   Mt. 2, 1-12

Na’i Jesus Cristo nia Evangelho nu’udar São Mateus haktuir

Jesus moris iha Belém, rai Judeia, iha Liurai Herodes nia ukun. Iha tempo ne’e, to’o iha Jerusalém ema matenek balu, mai housi loro-sa’e. Sira husu: “Judeus sira nia liurai be foin moris ne’e, iha nebé lós? Ami haré nia fitun iha loro-sa’e; Ami mai tuku-tur hana’i ba Nia”. Rona tiha ne’e, Liurai Herodes no cidade tomak Jerusalém nian hakfodak teb-tebes. Halibur tiha sacerdote ulun sira no ema escrivão povo nian, Liurai Herodes husu ba sira, Messias sei moris lós iha nebé. Sira hatán ba nia: “Iha Belém rai Judeia, basá, Profeta hakerek nanis ona dehan: ó Belém, rai Judá nian, iha cidade boot sira leet Judá nian, laós ó mak kiik-oan liu: basá, housi ó mak sei mosu mai, ulun ida be sei tau matan ba Ha’u nia povo Israel”. Nune’e, Herodesharuka bolu sub-subar de’it ema matenek sira: Nia husu ba sira, sá loron fitun ne’e mosu. Hafoin nia haruka sira ba Belém, dehan: “Imi ba to’ok! Imi sei husu tuir didi’ak kona ba kosok-an ne’e. Hafoin, hetan tiha Nia, mai fo hatene ha’u, atu ha’u mós bele ba tuku-tur hana’i ba Nia”. Rona tiha, liurai sira la’o ona. Fitun nebé sira haré iha loro-sa’e, la’o uluk iha sira oin to’o fatin nebé Kosok-oan hela ba. Haré kona ba fitun, sira laran ksolok boot. Tama iha uma laran, sira haré Kosok-oan ho nia inan Maria. Hafoin, sira tuku-tur ba rai, hana’i ba Nia. Loke tiha sira nia ai-balun, sira hasa’e ba Nia, sira nia buat sólok: osan-mean, ai-wén moris, ho mina morin. Maromak fo mehi ba sira, atu sira fila ba sira rain, housi dalan seluk.

Lia Maksoyn

Leave a Reply

Your email address will not be published. Required fields are marked *