shadow
Diocese de Dili > NOTÍCIAS > HOMILIA DO BISPO > SAIDA MAK LORI ITA MAI HALIBUR IHA FATIN SANTO IDA NE’E!!

SAIDA MAK LORI ITA MAI HALIBUR IHA FATIN SANTO IDA NE’E!!

Ohin Ita mai hamutuk iha ne’e, uluk nanain ita lori estudante hotu nebé pertence iha Diocese Dili nia laran hamutuk iha Catedral ne’e, ita mai ho sentimento ida atu agradece, sentimento atu fo obrigado ba Maromak tanba Maromak sei hadomi hau, mas que dificuldade oi-oin iha hau nia família, hau hetan susar barak iha hau nia escola, mas que dificuldade iha hau nia rain, maibe ita sente hakmatek, sei sei iha paz atu ema hotu hetan oportunidade bele ba escola no sei bele moris diak; Liu-liu imi sei bele hetan oportunidade ba escola. Ida ne’e mak razão mai ita uluk nanain ita agradece Maromak, Segundo agradece ita nia Governo, agradece ita nia professor sira e agradece ita nia inan-aman sira.

Hau la hatene entre imi hirak nebe ohin mai tuir missa iha nee nebe hahu husi escola primária ba to’o escola ensino superior, nain hira mak entre imi ne’e fo ona obrigado ba papa no mama sira ou dala barak mak ita nafatin ba exige inan-aman atu sosa ida nee no ida neba mas que ita hatene katak ina-aman sira lor-loron balu tem que sacrifício makas fan sasan sira tun sae, tur iha mercado hodi fila liman atu bele manan osan ituan atu nunee oan sira bele escola, maibe oan nain hira mak bele fo netik obrigado ba papa no mama. Atitude ida nebe ohin ita mai iha nee atu agradece uluk nanain ba hirak nee, hanoin ba susar hirak nebe ita nia inan-aman sira hetan, atu agradece nafatin ba sira, reza nafatin ba sira, atu Maromak bele fo nafatin kbiit ba sira atu sira mos la desanima atu buka osan, buka hahan, atu oan sira bele escola nafatin.

Dala hira mak ita mos nudar aluno reza ba ita nia mestre sira, maibe dala ruma ita buka mak mestre sira nia fraqueza ita buka atu crítica deit no koalia aat deit mestre sira. E dala ruma ita preucupa reza ba ita nia mestre sira atu sira sai mos mestre nebe dedica duni sira nia an tomak ba ita, ita obrigado mos ba sira tanba sira nia sagrifício boot nebe sira halo mai ita. Nunee mos dala hira mak ita agradece mos ba ita nia governo nebe atu haka’as an nafatin atu cria condição ba ita nia escola sira, mas que dala barak iha condições barak mak sidauk iha, maibe sira nafatin iha perocupação. Tanba ne’e mak ohin iha oportunidade ida mai ita hamutuk iha ne’e atu agradece.

Ohin ita halibur hamutuk iha nee, iha início ano lectivo 2018 ita hotu nebe lori aluno hotu-hotu nebe pertence ba Diocese Dili nian halibur hamutuk iha Catedral ida ne’e atu halo saida no saida mak lori ita mai halibur hamutuk iha fatin Santo ida ne’e? Alin doben sira, Leitura nebe ohin ita rona haktuir mai ita kona ba ambiente Jesus ninian kona ba Jesus nia escolante sira depois Jesus fila fali, depois de Jesus ema kaer no fila fali ba Nia Aman, saida mak mosu ba Apóstolo sira! Sira tauk, sira moe tanba sira la hatene saida mak sei mosu ba sira. Maibe Jesus molok husik hela sira Nia promete kedas ba sira dehan; “Keta Tauk-Keta moe, Hau sei haruka fila fali ba imi presente boot ida Espírito Santo, atu Espírito Santo ida nee mak halo imi sei la moe tan no la tauk tan, hanorin imi atu matenek kona ba saida mak imi atu koalia, Espírito Santo nee mos sei halo imi barani atu hamriik iha ema seluk nia oin, fo testemunha kona ba imi nia moris kona ba apóstolo sira”.

Ita mos hahu daudaun tinan foun mas que ita hotu mai husi escola nebe la hanesan, escola barak iha facilidade nebe barak liu no escola balu nia facilidade menos, possibilidade la hanesan maibe ohin ita mai iha ne’e ho sentimento ida katak mas que ita nia escola iha força no ita nia professor sira iha capacidade nebe diak hotu, maibe ita mai iha ne’e hodi reconhece katak ita hotu mesak ema nebe iha limitação buat hotu nebe ita iha ne’e mesak temporário, buat hotu transitório, ita precisa nafatin Maromak nia tulun. Ita bele halo buat hotu, maibe iha buat ruma nebe ita ema labele halo nebe compete ba Maromak deit, tan nee ita hotu mai ne’e tanba ita hotu reconhece ita nia fraqueza humana ida ne’e, tanba nudar ema mas que hau husi família diak, aldeia nebe diak, escola nebe diak, maibe se laiha Maromak buat hotu sei la lao tuir buat nebe hakarak.

Ohin ita mai tanba ita reconhece ita nia limitação sira, ita comfia duni iha Maromak Espírito Santo nia kbiit, Espírito nebe acompanha Apóstolo sira, ita mos iha missa ida ne’e atu harohan atu ita nia processo aprendizagem ida ne’e mos bele lao diak. Wainhira ita haka’as an duni mak ita bele dehan katak ita nia escola ita bele atinge ita nia finalidade sira hodi transforma ita, lori ita hotu bele sai aluno nebe diak no matenek. Maibe matenek ida oinsa mak ita buka, oinsa mak hau bele sukat hau nia matenek ida ne’e?

Alin doben sira, Apóstolo sira iha ohin Evangelho haktuir wainhira Jesus mosu ba sira iha uma ida deit “Hakmatek hela ho imi-Dame hela ho imi” Espírito ida ne’e mos mak lori dame ba ema hotu; uluk Nia lori dame ba Apóstolo sira, iha loron Pentacostes ninian ba Uma Creda iha mundo tomak. Ita nebe ohin loron mai tur iha nee mos sente ida ne’e katak ita hotu mai iha ne’e atu harohan atu nune’e dame ida nee bele moris iha ita nia escola, atu ita hotu fila ba ita nia escola mos bele lori Espírito dame nian nee, dame ida ne’e mak ita hotu precisa.

Mestre no aluno doben sira, Wainhira Espírito Santo presente duni iha ita nia le’et, sei halakon disconfiança iha ita nia le’et, disconfiança ida nebe dala ruma mos iha ita nia escola entre Directur da escola ho mestre sira, entre mestre ho aluno sira, entre mestre ho inan-aman sira. Buat ida disconfia malu, wainhira iha duni Espírito dame ita sei tau ba kotuk buat nebe hafuhu malu, disconfia malu tanba razão oin-oin. Wainhira iha ita nia escola laiha disconfia ba malu, ita bele nakfilak ita nia escola ne’e bele sai família boot ida. Inan-aman sira tanba confia escola sira mak haruka oan sira ba escola. Tanba nee iha iha escola ita precisa haburas Espírito família nian, Espírito diálogo nia, Espírito comunicação nian, Espírito atu bele hari no haburas buat nebe respeito no rona malu ninian. Hanesan wainhira ita hakiak diálogo, respeito malu, ita sei kuda, ita hakiak ita nia comfiança iha ita nia escola sira ita sei ku’u paz no harmonia, maibe iha escola mak ita hakiak ódio, discomfia malu, ita sei ku’u mak violência. Tan ne’e mak processo aprendizagem nebe atu lao diak wainhira ita hakmatek iha escola, wainhira ita respeito mútua, wainhira ita rona malu iha escola, wainhira escola bele sai fatin ida nebe família ida bele haburas comfiança. Ida nee mak ohin lori ita mai iha ne’e atu husu ba Maromak Espírito Santo ida ne’e atu bele mos hakonu falta hirak nebe ita sei precisa nafatin ita nia escola sira, ita presica halo duni ita nia escola sira hanesan presépio dame nian no hanesan knu’uk dame no domin nian no matenek ida nebe atu lori ita hatene respeita malu.

Escola laos fatin atu forma grupo, atu sadik malu, escola laos fatin atu baku malu, maibe fatin atu hametin unidade hamutuk atu descobre diak liu tan kona ba buat nebe kakutak nian, Ciências nian, tan ne’e ita presica cria duni ambiente ida ne’e. wainhira iha grupo barak nebe cria deit comfrontação iha ita nia escola sira ida ne’e sai obstáculo boot ida, dificuldade boot ida atu bele facilita processo aprendizagem iha ita nia rai laran. Ne’e duni, se mak responsável ba ida ne’e? Laos amo Bispo, laos Ministro Educação no nia vice sira, maibe ita nian, ita ida-idak hahu husi alunos nebe kiik ba too ida nebe boot liu.

Waihira iha ema nebe hatene no buka dame sei iha mos unidade. Educação laos koalia deit ba buat nebe kakutak ninian, educacão buat ida nebe liga teb-tebes ho ita nia fuan. Laos kakutak deit mak halo ita sucesso, wainhira ita nia fuan ho kakutak funsiona hotu mak dehan katak ita nia processo aprendizagem ne’e lao.

Leave a Reply

Your email address will not be published. Required fields are marked *