shadow
Diocese de Dili > NOTÍCIAS > LETURA DIÁRIA > Sexta-Feira, II Semana Iha Tempo Comum

Sexta-Feira, II Semana Iha Tempo Comum

ANO B

 

Primeira Leitura                                                                                    1Sm. 24. 3-21

Lia housi primeiro livro Samuel nian

Iha loron hirak neba, Saul ba hamutuk ho ema mane rihun tolu, hili husi Israel tomak, atu ba buka David ho nia emar sira iha loro-sa’e rai Rochedo-dos-Cabritos-Monteses nian. To’o tiha iha fatin sira be bibi-malae nian nebe hela iha dalan ninin; iha neba iha fatuk koak ida, iha neba iha fatuk koak ida, iha nebe Saul tama atu haksolok tuir nia hakaran. David ho nia emar sira tur hela iha koak rohan ba. Nia emar sira dehan nune’e ba nia: “ loron ida ne’e mak na’i dehan ba ó: ‘Ha’u haraik ba ó liman, ó nia funu-maluk; husi nia ó halo buat nebe ó haré ba di’ak”. David hamriik tiha, la hanoin hetan buat ida, tesi tiha Saul nia kapa nia rohan. Maibe, nia funu hahu tuku-tuku, tan nia tesi tiha Saul nia kapa nia rohan. Tuir mai, nia dehan ba nia emar sira: “Na’i hakdook tiha husi ha’u buat nebé atu halo ba ha’u ulun, foti liman hasouru nia be Na’i tau ona mina!” Ho liafuan hirak ne’e, David dada netik tiha nia emar sira, la husik sira atu hafunu hasaouru Saul.

Saul husik tiha fatuk koak hodi tuir nia dalan. Nune’e, David hamriik sai tiha housi koak hodi hakilar ba Saul: “Ó liurai, ha’u na’i!” Saul hateke ba kotuk, David hakruuk to’o rai hodi hakneak. Hafoin dehan ba Saul: “Tan sá ó rona sira nebé dehan ba ó: ‘Hare ba, David hakarak atu halo áat ba ó?’ Basá, iha loron ida ne’e ó hare tiha ona ho ó nia matan rasik, oinsá Na’i, ohin duni iha fatuk koak, Nia haraik mai ha’u liman ó nia mate, oinsá mak ha’u soi ó, lakohi atu oho ó. Ha’u dehan: Ha’u sei la foti liman hasouru ha’u na’i-ulun, basá, ba nia, Na’i tau ona mina. Haré ba, ha’u aman, iha ha’u liman ó nia kapa nia rohan. Wainhira ha’u tesi ó nia kapa nia rohan, ha’u la oho ó, ha’u hatene no haré didiak katak iha ha’u la iha buat áat no hahalok áat. Ha’u seidauk halo buat áat ida hasouru ó; ó mak buka hasouru ha’u moris, atu hasai tiha nia. Na’i mak sei sai juiz iha ita rua nia leet; atu halo justiça mai ha’u kona ba ó; ha’u mak sei la tau ha’u liman ba ó. Hanesan lia uluk dehan: ‘Housi ema áat sira mak buat áat mai;’ ne’e duni, ha’u sei la tau liman ba ó. Hasouru sé mak liurai Israel nian hafunu? Sé mak ó  buka tuir, asu mate ida, asu kutun ida? Na’i mak sei sai Juiz: Nia mak bele tesi kona ba ita rua; Na’i haré didiak ha’u, bele tesi lia mai ha’u hodi hasai ha’u housi ó liman.

Wainhira David dehan tiha hotu liafuan hirak ne’e ba Saul, Saul husu ba nia: “Tebes, ó nia lian mak ne’e duni, ha’u oan David?” Saul ho hakilar maka’as, hahu tanis. Hafoin, dehan ba David: “Ó mak laran mós liu fali ha’u, basá, ó halo di’ak mai ha’u, ha’u hakarak atu halo áat ba ó. Ohin duni ó hatudu katak ó halo buat di’ak mai ha’u, basá, Na’i haraik tiha ona ha’u ba ó liman, maibé ó la fó mate mai ha’u. Wainhira ema ida hetan nia funu baluk, bele husik nia la’o didiak tuir nia dalan? Na’i sei selu ó kona ba buat di’ak nebé ohin ó halo mai ha’u. Oras ne’e ha’u hatene lós ona katak ó sei sai liurai no ukun liurai nian iha Israel sei hametin liu tan iha ó liman”.

Maromak Futar Lia.

 

Salmo Responsorial                                                                                                                                                             Sal. 56(57). 2, 3-4, 6, 11 (R.2ª)

Refrão: Sadi’a ha’u, Na’i, sadi’a ha’u!!! Repete-se   

 

Sadi’a ha’u, Na’i,

Iha Ita, ha’u buka mahan;

Ita liras fó mahan mai ha’u

To’o oras nebé terus liu ona. Refrao

 

Husu graça Maromak Leten áas nian,

Housi Lalehan sei haruka maksoyn mai ha’u.

Nia sei halo sira be duni ha’u sai rungu-ranga,

Haruka mai ha’u Nia laran-luak no laran metin. Refrao

 

Ha’u Maromak, Ita iha lalehan leten,

Ita glória nabilan iha rai,

Basá, Ita laran-luak kmanek liu lalehan,

Ita laran metin to’o kalohan sira. Refrão

 

Aclamação                                                                                                                                                                                                                2Cor. 5. 19

Refrão: Aleluia, Aleluia !!! Repete-se

Housi Cristo, Maromak badame malu ho mundo;

Nia haruka iha hala’o knaar hadame malu nian. Refrão

 

Evangelho                                                                                                                                                                                                              Mc. 3. 13-19

Na’i Jesus Cristo nia evangelho tuir são Marcos

Iha tempo neba, Jesus sa’e tiha ba foho ida. Nia bolu ba Nia oin sira nebé Nia fihir, sira ne’e hakbesik-an tiha ba Nia. Hili tiha sira na’in sanulu resin rua atu la’o ho Nia no atu haruka sira ba hanourin, ho kbiit atu duni sai diabo. Sira na’in sanulu resin rua nebé Nia hili mak ne’e: Simão, nebé hanaran Pedro; Tiago, Zebedeu nia oan, no João, Tiago nia alin, sira ne’e hanaran “Boanerges”, katak, “Rai-lakan nia oan sira”; André, Filipe, Bartolomeu, Mateus, Tomé, Alfeu nia oan; Tadeu Simão be hanaran Zeloso no Judas Iscariotes, ida nebé ikus mai faan Na’i.

Lia maksoyn

Leave a Reply

Your email address will not be published. Required fields are marked *