shadow
Diocese de Dili > NOTÍCIAS > REFLEXÃO > HAU HATENE ITA BOOT SE? MAROMAK SANTO NIA OAN

HAU HATENE ITA BOOT SE? MAROMAK SANTO NIA OAN

Maun alin sarani sira, promessa ne’e buat ida nebe tem que realiza. Wainhira ita la halo tuir ita nia promessa sira ita hetan liasasin oinoin deit hasoru ita. Balun dehan ita bosok ten, balun dehan ita kaben boot, balun dehan ita inconsistente, balun dehan ita labele iha confiansa ema nian, no seluk seluk tan.

Primeira leitura haktuir mai ita kona ba realidade promessa nian ida. Laos promessa ba sasan ida, laos promessa ba lia ida maibe promessa kona ba maksoin ida nebe sei haraik mai ita hodi soi ita be ninia povo ne’e husi susar no terus laran. Maromak quando promete nia halo tuir buat nebe nia promete. Los duni iha istoria tomak humanidade nian Maromak halo tuir tiha ona ninia promessa sira dala wain ba wain, no ninia promessa ida as liu hotu be ita rona iha primeira leitura ne’e mak promessa MAKSOIN NE’E. Iha Maksoin ne’e promessa sai realidade, promessa sai concreto iha isin o iha klamar, iha liafuan no iha hahalok be moris hamutuk ho ita, hatudu-an iha ita nain JESUS CRISTO. Iha evangelho ohin nian diabo perante lialos ninia oin nia labele halo buat ida, nia reconhece deit kbit MAROMAK nian hodi reconhese iha JESUS CRISTO ne’e nudar MAROMAK NIA OAN, Katak MAKSOIN, “Hau hatene ita se JESUS NAZARENO, ITA MAK MAROMAK SANTO ASS LIU HOTU NIA OAN MANE”. MAROMAK NINIA OAN MANE IDA NE’E DUNI MAK MAKSOIN NEBE NIA PROMETE MAI ITA NO HARAIK TIHA ONA MAI ITA, ORAS NE’E HORIK HAMUTUK HO ITA.

Doben maun alin sira wainhira ita reflete kelan liu tan Maromak ninia futar liafuan ne’e ita bele husu nune’e: TAMBA SA MAK MAROMAK PROMETE NO TAMBA SA MAK NIA HALO TUIR NINIA PROMESSA NE’E?

Uluk nanin ita descobre katak Maromak promete ba povo sira atu soin sira tamba povo ne’e duni mak iha ninia dificuldade, iha ninia terus, iha ninia susar laran povo ne’e BUKA MAROMAK, HAKBESIK-AN BA MAROMAK, HUSU BA MAROMAK NO HATUDU NAFATIN NINIA CONFIANSA HO FIAR BA MAROMAK. Tamba ne’e MAROMAK PROMETE ba sira no ikus mai soin duni sira husi sira nia situasaun dificil, terus no susar nian. Ida ne’e sinal katak MAROMAK HADOMI POVO IDA NE’E BASA POVO IDA NE’E FIEL NAFATIN BA NIA iha ninia moris tomak, iha tempo diak, iha tempo dificil, ita terus no susar nia laran. Ema ninia fidelidade ba Maromak mak halo Maromak hatudu ninia laran luak, ninia domin no ninia MAKSOIN ba ita ema sira. Maromak hatudu ida ne’e concretamente iha JESUS CRISTO, Iha nia salvasaun ka maksoin ne’e sai real tinan ba tinan ona. Nune’e mak Saun Paulo ohin iha segunda leitura husu atu iha ita nia hahalok sira ita buka FIEL nafatin ba NAI JESUS CRISTO hodi nune ita labele lakson MAKSOIN iha ita nia moris ne’e.

Maun alin sira ita nia fidelidade ba JESUS CRISTO MAKSOIN ne’e concretamente ita bele halo iha saida deit. Tuir roman Maromak nia futar Liafuan domingo ohin nian hanorin ita katak ita nia fidelidad ba CRISTO ita hatudu iha:

Fila oin ba Maromak, buka nafatin nia no husu deit ba nia iha situasaun sira hotu iha buat hotu kona ba ita nia moris wainhira ita iha tempo diak nia laran no mos wainhira ita iha tempo susar nia laran, liu liu iha ita nia dificuldade no probelema sira ita nia moris nian, ita la ba buka iha buat seluk ka ema seluk tan. Dalawain ita hasoru no resolve mesmesak deit ita la bele maibe MAROMAK hatudu ona mai ita katak wainhira ita hasoru no resolve hamutuk ho nia be nudar MARKSOIN ne’e buat hotu sei sai diak mai ita tuir ita nia hakarak. Buat nebe ita ida-idak koko dehan saida mai ita, ita hanoin took, wainhira ita hasoru dificuldade, terus no susar moris nian ita halai ba nebe? Matan dook, Nata urat, China Maromak, violencia, rai odio, vingansa, laran toos, no seluk seluk tan? Hau la hatene ninia resposta, ita ida idak hatene-an no ita ida-idak ho roman MAROMAK ninia futar Liafuan ohin nian bele hatan ba ita an no ba MAROMAK.

Maun alin sira hodi hatan lolos ba Maromak ita buka atu laos deit fila ba Maromak no fiel ba Maromak iha buat hotu maibe mos ita buka atu halo tuir promessa nebe ita halo ona ba MAROMAK no ba MAUN ALIN SIRA. Ita hatene katak ita ida-idak iha promessa barak tebes atu halo tuir, iha balun ita halo tuir ona no iha barak mos mak ita la halo tuir no la hakarak halo tuir to’o deit momento ida ne’e. Entre promessa rihun ba rahun nebe ita halo ona ita bele habadak deit ba rua ne’e tuir ita nia promessa fiar nian atu:

  • Fiar no fiel ba Maromak mesak ida deit no hakribi santanas ho ninia hahalok at sira hotu iha ita nia liafuan no ita nia hahalok.
  • Hadomi Maromak no maun alin sira liu sasan hotu hotu iha ita nia liafuan no iha ita nia hahalok.

NE’E MAK ITA NIA MISSAUN MORIS NIAN NUDAR EMA SARANI IDA. ORAS NE’E MAI ITA BUKA HAMUTUK HALAO ITA NIA MORIS NE’E NUDAR ITA PROMETE ONA BA MAROMAK NO BA MAUN ALIN SIRA, IHA ITA NIA FIDELIDADENE, ITA NIA DOMIN BE HATUR-AN IHA FIAR BA MAKSOIN ITA NIA MAKSOIN JESUS CRISTO. AMEN. (Pb)

Leave a Reply

Your email address will not be published. Required fields are marked *