shadow
Diocese de Dili > NOTÍCIAS > LETURA DIÁRIA > Sexta-Feira, IV Semana iha tempo comum

Sexta-Feira, IV Semana iha tempo comum

Apresentação do Senhor

ANO B

 

Prmeira Leitura                                                                                       Mal. 3. 1-4

Lia housi Profeta Malaquias nian

Maun alin sira: Na’i Maromak futar-lia tun nune’e: “ Ha’u sei haruka Ha’u nia manu-ain atu loke dalan iha Ha’u oin. Na’i nebe imi buka hela teki-teki sei tama iha Nia templo no anjo aliança nian nebe imi hakarak tebes. Nia mak mai daudaun ne’e, Na’i, mundo rai-kalaran nian mak dehan. Maibe, sé lós bele tahan to;o loron nebe Na’i hi’it-an mai? Sé lós bele hamriik metin ua’inhira Na’i mosu mai? Nai hanesan ahi nebe ema hodi halo uen bessi, hanesan lixívia (aimoruk hodi hamós nóda) nebe hodi fase roupa nian. Nia sei mai tur nu’udar badaen nebe halo besi nabén no ida nebe atu fase mós. Nia sei hamos Leví oan sira hanesan hamos osa mean no osa mutin. Iha oras ne’e mak sira bele hasa’e sira nia buat-karan ba Na’i. Nune’e, Judá no Jerusalém nia buat-karan sei fó ksolok tebes ba Na’i hanesan fali tempo uluk nian, hanesan fali iha tinan hirak nebe liu ona.

Maromak futar lia.

 

Salmo Responsorial                                                                                                                                                           Sal. 23(24). 7, 8, 9, 10 (R.10b)

Refrão : Na’i mundo rai-klaran mak Liurai glória nian!!! Repete-se

 

Odamatan sira, foti imi liras ba,

Odamatan sira uluk nian, habo’ot imi-an ba,

Liurai glória sei tama mai. Refrão

 

Sé mak Liurai glória nian ne’e?

Na’i biit Na’in no bele hotu,

Na’i asua’in iha funu. Refrão

 

Odamatan sira, foti imi liras ba,

odamatan sira uluk nian, habo’ot imi-an ba,

Liurai glória nian sei tama mai. Refrão

 

Sé mak Liurai glória nian ne’e?

Na’i biit Na’in no bele hotu,

Na’i asua’in iha funu. Refrão

 

Aclamaçào                                                                                                                                                                                                                 Lc. 2. 32

Refrão :  Aleluia,Aleluia!!! Repete-se

                   Naroman atu leno nação sira no glória,

                   Ita povo Israel nian. Refrão

 

Evangelho                                                                                                                                                                                                              Lc. 2. 22-40

Na’i Jesus Cristo nia Evangelho tuir São Lucas

To’o tiha loron hamos-an nian, tuir Moisés nia ukunfuan, Maria no José lori Jesus ba Jerusalém atu saran Nia ba Na’i, nu’udar hakerek iha Na’i nia ukunfuan, katak “Oan mane boot ida-idak sei hassae ba Na’i”. no mós atu hasa’e, nu’udar buat-karan, manu falur rua eh manu pompu oan rua, nu’udar Na’i nia ukunfuan haruka. Ema ida naran Simeão hôrik iha Jerusalém. Nia ema lós nebe hamta’uk Maromak hodi hein Israel nia ksolok, no Espírito Santo hôrik ho nia. Nai simu lia housi Espírito Santo katak nia sei la mate molok nia haré Na’i nia Cristo. Espírito lori nia ba templo. Uainhira Jesus nia aman ni inan lori Kosok Oan Jesus atu halo tuir ukunfuan sira, nia simu Kosok Oan ne’e iha nia liman, hahi Maromak dehan :“Na’i, oras ne’e itaboot husik ona ita atan ba iha dame, tuir ita nia liafuan, basá ha’u nia matan haré ona ita nia maksoin nebe itaboot hadi’a ba povo hot-hotu nia oin: naroman atu leno hentio sira no povo Israel nia glória”.

Kosok Oan nia Aman no inan hakfodak ho buat nebe nia dehan kona ba Nia. Simeão fó bensa ba sira, hodi dehan ba nia inan Maria:”haré ba, labarik ne’e mosu mai atu hatun no foti ema barak iha Israel, no mós atu sai sinal lia la tuir maliu nian, no surik ida sei sona borus ita nia fuan atu fó sai buat nebe ema barak hanoin iha sira laran”. Iha mós feto duina ida, naran Ana, Fanuel housi suku Aser nia oan. Nia otas boot ona. Liu tiha nia tempo fetora nian, nia moris ho nia la’en ba tinan hitu; hafoin nia moris nu’udar feto faluk to tinan ualu nulu resin háat. Nia la husik templo, maibe serbi Maromak kalan loron, hodi halo jejum no hamulak.Iha oras neba, nia mai hodi fó agradece ba Na’i no ko’alia kona ba labarik ne’e ba sira hotu nebe hein libertação Jerusalém nian. Halo tuir tiha buat hotu nebe Na’i nia ukunfuan haruka, sira fila fali ba Galileia, ba sira daudaun no maka’as liu tan, nakonu ho matenek, no Maromak nia graça hela hamutuk ho Nia.

Lia maksoyn.

Leave a Reply

Your email address will not be published. Required fields are marked *