shadow
Diocese de Dili > NOTÍCIAS > LETURA DIÁRIA > Terça-Feira, V Semana iha Tempo Comum

Terça-Feira, V Semana iha Tempo Comum

ANO B

 

Primeira Leitura                                                                             1Rs. 8. 22-23, 27-30

Lia housi primeiro livro Liurai sira nian

Iha loron hira neba, liurai Salomão hamriik tiha iha Na’i nia altar oin, iha povo tomak Israel nia oin, halolo liman ba Lalehan hodi dehan: “Na’i, Israel nia Maromak, la iha Maromak ida hanesan Itaboot, iha Lalehan be áas liu ba eh iha rai okos liu ba. Ita mak halo tuir lolós aliança no iha nafatin laran-luak ba Ita atan sira, wainhira sira ho neon no laran tomak, la’o iha Ita futar oin. Maibé, tebes duni, Maromak bele hôrik ho ema sira iha rai? Lalehan sira lalehan sira be áas liu ba nian, sei la to’o Itaboot, oinsá ho uma ida ne’e nebé  ha’u harí tiha ona! Na’i, ha’u Maromak, rona Ita atan nia harohan be nia hasa’e; rona didiak lia hato’o no harohan nebé ohin nia hasa’e ba Itaboot. Atu Itaboot kalan loron tau matan nafatin iha uma ida ne’e, iha fatin ida ne’e nia leten iha nebé Ita dehan tiha ona; ‘Ha’u naran sei hela iha ne’e!’

Ne’e duni, rona Ita atan nia harohan ba, nebé, iha fatin ida ne’e hasa’e ba Itaboot; simu Ita atan nia harohan no Israel, Ita povo nia harohan, wainhira sira mai hasa’e iha fatin ida ne’e. Rona nia housi fatin nebé Ita hôrik ba, iha Lalehan; rona ba hodi haraik perdua ba!”

Maromak Futar Lia.

 

 

Salmo Responsorial                                                                                                                                                          Sal. 83(84). 3, 4, 5-10, 11 (R. 2)

Refrão : Ita Nia hôrik fatin kmook tebes,

                 Na’i, Lalehan no Rai tomak nian!!! Repete-se

 

Ha’u klamar neon sala,

Hodi hanoin Na’i nia kadunan;

Ha’u fuan no ha’u isin

Haksolok iha Maromak moris. Refrão

 

Manu Lakateu sira buka hela fatin,

Koá-lelok (Andorinha) halo knu’uk ba oan sira;

Besik Ita Altar, Na’I mundo rai-klaran nian,

Ha’u nia Liurai no ha’u nia Maromak. Refrão

 

Ksolok ba sira nebé hôrik iha Ita uma,

No sira nebé hahi Ita loron kalan.

Hateke mai, Maromak, ami mahein,

Haré ba Ita Atan nebé Ita tau ona mina. Refrão 

 

Loron iha iha Ita kadunan di’ak liu fali rihun ida;

Ha’u hakarak hôrik iha Na’i nia uma-labis,

Liu fali hela iha tenda ema áat sira nian. Refrão 

 

Aclamação                                                                                                                                                                                             Sal. 118(119). 36ª, 29b

Refrão : Aleluia, Aleluia!!! Repete-se       

                  Halo ha’u fuan tuir Ita ukunfuan;

                  Haraik mai ha’u graça atu moris tuir Ita Lei. Refrão

 

Evangelho                                                                                                                                                                                                               Mc. 7. 1-13

Na’i Jesus Cristo nia Evangelho nudar São Marcos haktuir

Iha tempo neba, ema Escriba no Fariseu balu mai housi Jerusalém halibur hela ho Jesus. Sira haré katak Jesus nia escolante sira barak han liman fo’er, katak la dauk fase. Ema Fariseu no Judeu sira hotu la bele han, wainhira sira la dauk fase didiak sira liman, tuir lisan bein sira. Sira fila tiha mai uma, la tur atu han, wainhira sira la fase-an tiha, tuir sira lisan. Sira moris tuir tan lisan seluk-seluk, tan de’it lisan bein sira nian, hanesan: fase copo, fase buli, solur sana riti. Tan ne’e, Fariseu sira no Escriba sira husu ba Jesus: “Tan sá Ó Nia escolante sira la tuir bein sira nia lisan, maibé, sira han ho liman fo’er?” Jesus lia tun ba sira: “Imi mesak laran makerek tan-tanan. Profeta Isaías ko’alia lós duni kona ba imi wainhira nia hakerek dehan: ‘Povo ida ne’e hana’i Ha’u ho de’it ibun tutun, maibé nia laran dook lós housi Ha’u! Sira hahi Ha’u leet de’it. Doutrina sira hanourin, mesak ema sira nia ukunfuan de’it’. Imi husik tiha Maromak Nia ukunfuan hatene hodi tuir fali ema nia lisan”. Nia dehan tan ba sira: “Imi hatene bobar Maromak Nia ukunfuan tuir imi nia lisan sira. Moisés rasik dehan: ‘Hamta’uk ó nia aman no inan no ema nebé hateten áat nia aman ka nia inan sei mate’. Imi fali dehan: “Ema ruma bele dehan ba nia aman ka inan: ‘Buat nebé imi bele hetan housi ha’u mak corbã katak hasa’e tiha ona ba Maromak’. Nune’e, imi la husik ona nia atu halo buat ruma hodi tulun nia aman ka inan. Nune’e, imi halo Maromak Nia ukunfuan folin laek atu hametin fali imi nia lisan nebé imi fó sai ba imi nia oan sira. Imi sei halo buat barak hanesan ne’e”.

Lia Maksoyn

Leave a Reply

Your email address will not be published. Required fields are marked *