shadow
Diocese de Dili > NOTÍCIAS > REFLEXÃO > “IHA BUAT HOTU NEBE IMI HALO, IMI BUKA ATU HALO HODI FO GLORIA BA MAROMAK NO LORI DIAK BA EMA”

“IHA BUAT HOTU NEBE IMI HALO, IMI BUKA ATU HALO HODI FO GLORIA BA MAROMAK NO LORI DIAK BA EMA”

Maun alin sarani doben sira, ohin iha domingo ba dala VI tempo baibain tinan b nian ita halibur-an hamutuk hanesan loron domingo sira seluk atu hahi hanai Maromak, atu agradece ba Maromak tan buat diak sira nebé nia halo mai ita iha ita nia moris, tan domin rohan laek nebé sulin nafatin mai ita to’o oras ne’e.

Maromak ninia futar liafuan domingo ohin nian lori ita ba reflete ita nia moris iha ita nia realidade salah no realidade maksoyn Maromak nian be mosu iha ita hotu nia moris. Hanorin mai ita katak salah ne’e husi kedas ninia natureza mai aat, salah ne’e haterus, salah ne’e exclui no la halo ita ema sira buras. Hasoru realidade salah nian ne’e Maromak la husik ema sira lao mesmesak maibé soi ema sira. Primeira leitura kompara salah ne’e hanesan ho moras at lepra. Hanesan konsekuensia husi salah ne’e mak ita hetan excomunhaun ou labele moris hamutuk ho ema sira seluk. Iha moris Maromak ninia povo nian comcerteza sala la permite ita atu moris iha ambiente Maromak ninia povo nian, salah automatikamente exclui ita husi moris nudar Maromak ninia povo nebé simu tulun no graça hotu hotu be mai husi Maromak atu sira bele moris nafatin ba nafatin.

Salah ne’e realidade ida ita ema sira nian maibé Maromak iha ninia grandeza, iha ninia domin no laran luak la husik ita ema sira nebé hakarak moris los, hakarak hamrik fali husi ita nia salan sira hodi la hela metin iha salah nia laran. Maromak Maksoyn soi ita ema sira husi sala ne’e iha dalan hasai ita ema sira husi terus no susar, husi ita nia moras sira, ita nia s3 sira, ita nia depresaun sira, husi ita nia beik, husi ita nia incomprensaun, husi ita nia odio no vingansa, husi ita nia hakarak at, husi ita nia hahalok at sira hotu atu ita moris livre lolos nudar Maromak oan iha hadomi malu, iha hakarak diak, iha lao no moris hamutuk, iha halo hamutuk, iha constroe moris hamutuk, iha hari no konsolida paz.

Iha Evangelho haklaken mai ita realidade konkreta Maromak soi ita ema sira husi ita nia terus, susar sira loro loron nian hanesan iha ita reflete ona balun iha leten no hanesan realidade terus ita ida idak nian be oras ne’e ita sente no moris hela dadaun ba wainhira ita hakbesik ba Maromak hodi tau laran metin no lao hamutuk nafatin ho Maromak. Na’i Jesus fo isin diak ba ema moras lepra tamba uluk nanain ema moras lepra ne’e buka Nia. Tuir roman Maromak ninia futar liafuan nian ida ne’e hatudu mai ita katak Maromak soi ita husi ita nia salan sira, husi ita nia terus no susar, husi ita nia problema sira moris nian wainhira ITA HAKBESIK-AN BA NIA, WAINHIRA ITA HAKARAK SAI HUSI SALA, WAINHIRA ITA ENTREGA ITA NIA TERUS, SUSAR NO PROBLEMA SIRA HOTU BA NIA NO HAMUTUK HO NIA HUSI NIA SOI ITA IHA BUAT SIRA NEBE ITA ITA LAIHA KBIIT ATU HALAKON.

Maromak ninia hahalok soi ema sira be moris iha sala, iha terus no susar laran lori liberdade, lori ksolok no lori paz laos deit ba ema be hetan fali isin diak ne’e maibe mos ba ema ne’e ninia familia, belun, no ba ema hotu nebe hare Maromak ninia maksoin ne’e. Maromak soi ita ema sira puramente tamba domin, tamba la hakarak atu ita ema sira terus, basa Nia nebe kria ita ema sira hori kedas ita nia existensia nia hakarak atu ita moris nudar ema livre laos nudar escravo ka atan sala ou terus ou susar nian.

Nai Maromak lori maksoin ne’e mai ita atu ita mos lori tutan Maksoin ne’e ba ema sira seluk, liu liu ba ema sira nebe moris hela iha nakukun sala nian. Ita lori ba sira iha ita nia hakarak diak, ita nia sevi ba ema moras sira, ita nia altruismo no ita nia laran diak, laran maus, ita nia rona malu, ita nia hakiak paz, ita nia haraik-an, ita nia fo tulun ba malu, ita nia hadomi malu lolos seim falsidade ka finjimento, ita nia comprende malu, ita nia esforsu atu halo buat diak ruma, no seluk seluk tan.

Hodi halo nune’e ita bele fo duni testemunho de vida ida nebe lori diak ba ema sira no fo gloria ba Maromak. Amen

 

Bidau, 11 de Fevereiro 2018, Pb.

Leave a Reply

Your email address will not be published. Required fields are marked *