shadow
Diocese de Dili > NOTÍCIAS > LETURA DIÁRIA > Quinta-Feira depois das Cinzas

Quinta-Feira depois das Cinzas

ANO B

 

Primeira Leitura                                                                                 Deut. 30. 15-20

Lia husi livro Deuteronómio

Moisés lia tun ba povo nune’e: “Ó sei haré katak ohin ha’u tau iha ó nia oin moris no rahun di’ak, eh mate no susar, hodi haruka ó iha loron ne’e atu bele hadomi Na’i, ó nia Maromak, ó sei tuir Nia dalan, moris tuir Nia ukunfuan, Nia lei no Nia hanourin. Nune’e, ó sei moris; ó oan sira sei sai barak. Na’i, ó nia Maromak sei haraik bensa ba ó iha nebé ó sei tama ba atu ó hela ho nia. Maibé, ó fuan hadook-an karik, la kohi moris tuir Na’i nia hakaran, hodi monu tuir fali maromak seluk-seluk, ohin ha’u dehan lolós ba ó katak ó sei lakon. Ó nia moris sei la naruk iha rai nebé ó sei tama ba hodi hela ho nia, wainhira ó liu tiha Jordão. Ha’u simu lalehan ho rai hanesan sasin hasouru ó. Ha’u tau iha ó oin moris no mate, bensa no malisan. Nune’e, hili moris ba atu ó bele moris, ó oan no bei-oan sira mós bele moris atu hadomi ó Na’i, ó Maromak hodi rona Nia lia no hakbesik-an ba Nia. Buat ne’e tuir ó nia moris hodi hela metin iha rai nebé Na’i jura tiha ona hodi fó ba ó nia bei-ala sira, Abraão, Isaac no Jacob”.

Maromak Futar Lia.

 

Salmo Responsorial                                                                                                                                                       Sal. 1. 1-2, 3, 4, 6. (R. Sal. 39. 5ª)

Refrão : Rahun di’ak ba ema nebé tau neon iha Na’i!!! Repete-se         

Ksolok ba ema nebé la tuir ema aat nia lia,

La tuir dalan maksalak.

Ksolok ba sira be la hadulur ho ema aat;

Maibé haksolok ho Na’i nia ukunfuan,

Hodi hanoin nia kalan-loron. Refrao

 

Nia hanesan ai-kudan ida iha wé-inan ninin;

Nafuan tuir nia tempo, nia tahan la namlaik;

Buat hotu nia nebé nia halo, sai di’ak de’it. Refrao

 

Maibé, ema aat sira nia moris oin seluk;

Sira hanesan háre-kain be anin lori.

Na’i hatene ema lós nia dalan,

Dalan ema aat sira nian, lori ba rahun aat. Refrão

 

Aclamação                                                                                                                                                                                                                     Mt. 4. 17

Refrão : Glória ba Ita, Jesus Cristo, Matenek Aman nian!!! Repete-se

                  Imi hakribi imi nia salan, Na’i lia tun; basá

                  Reino Lalehan besik ona. Refrão

 

Evangelho                                                                                                                                                                                                                Lc. 9. 22-25

Na’i Jesus Cristo nia Evangelho nudar São Lucas haktuir

Iha tempo nebá, Jesus dehan ba Nia escolante sira: “Mane Maksoyn sei terus barak; katuas sira, sacerdote ulun sira ho ema Escriba sira sei heuwai Nia. Nia sei mate, hafoin, liu tiha loron tolu, Nia sei moris hi’as housi mate”.

Jesus dehan ba sira hotu: “Ema sé hakarak tuir Ha’u, sei hakribi nia-an, simu nia Cruz lor-loron nian hodi tuir Ha’u. Basá, sé hakarak soi nia moris, nia sei halakon moris ne’e; maibé ema nebé lakon nia moris tan Ha’u, sei soi nia moris.

Tebes duni, manan sáida wainhira ema manan mundo tomak, maibé ikus mai lakon nia-an?”.

Lia maksoyn

Leave a Reply

Your email address will not be published. Required fields are marked *