shadow
Diocese de Dili > NOTÍCIAS > REFLEXÃO > MAROMAK BOLU ITA ATU SAI FIEL

MAROMAK BOLU ITA ATU SAI FIEL

REFLEXÃO & LEITURA DOMINGO QUARESMA II/Ano B/2018

Gn 22,1-2.9a.10-13.15-18;  Rm 8,31b-34;  Mc 9,2-10

Primeira Leitura                                                                                                                                                                    Gen  22, 1-2, 9a. 10-13. 15-18

Lia husi Livro Génesis

Iha Loron Hirak nebá, Maromak koko Abraão, hodi dehan ba nia: “ Abraão!” Nia hatán: “ Ha’u mak ne’e”. Maromak dehan: “ Lori ó oan Isaac, ó oan mane mesak, nebé ó hadomi maka’as, ba iha rai Moriá. Iha nebá, ó sei oho hodi hasa’e nia iha foho nebé Ha’u sei hatudu ba ó”. Tan ne’e, sira la’o ba fatin nebé Maromak hatudu. Abraão harií altar ida iha nebá, tau ai-maran iha leten. Hafoin, nia losu tudik atu óho nia oan. Maibé, Na’i nia anjo bolu husi lalehan: “ Abraão, Abraão!” Nia Hatán: Ha’u mak ne’e Na’i”. Anjo dehan: “ ó keta tau liman ba labarik, keta halo aat nia. Ha’u hatene ona katak, ó hamta’uk Maromak, basá, ó la karak ó oan, ó oan mesak mak mai Ha’u” Abraão foti matan, haré iha nia kotuk bibi-malae ida, dikur kesi hela iha ai-horis. Nia ba kore bibi ne’e hodi óho,hasa’e iha nia oan nia fatin. Na’i nia anjo bolu tenik housi lalehan, hodi dehan: “ Ha’u jura hodi Ha’u naran rasik,Na’i futar lia tan ó di’ak hanesan ne’e, la  karak ó nia oan, ó oan mesak, Ha’u sei haraik bensa ba ó; Ha’u sei halo ó nia oan no bei-oan sira sai wa’in, hanesan fitun sira iha lalehan, hanesan rai henek iha tasi ibun; ó nia bei-oan sira sei hadau funu baluk sira nia sidade sira houtu. Tan ó oan no bei-oan sira, tan ó halo tuir Ha’u lian, nação sira hotu iha rai, sei simu bensa”.

Maromak Futar Lia.

 

Salmo  Resposorial                                                                                                                                                        Sal. 115(116), 10-15, 16-17, 18-19

Refrão :     Ha’u sei la’o iha moris sira rain, iha Na’i futar oin!!! Repete-se

  • Ha’u sei laran metin nafatin,maski dehan:

          “ Ha’u ema ida iha susar laran”!

          Iha Na’i futar oin,folin tebes duni,

          Nia belun sira nia mate.   Refrão

 

  • Ha’u ita atan, ita atan feto nia oan,

          Na’i, ita silu tohar ha’u besi-dadur.

          Ha’u sei hasa’e buat karakn hodi fo agradece

          Temi ita naran. Refrão

 

  • Iha povo oin ha’u sei halo tuir duni,

          Lia sira ha’u hakotu atu halo tuir;

          Iha Na’i kadunan oin,

          Iha ó klaran, Jerusalém.  Refrão

 

Segunda Leitura                                                                                                                                                                                         Rom. 8,  31b-34    

Lia husi São Paulo nia surat ba sarani sira iha Roma

Maun-alin sira: Maromak hamutuk ho ita, ema sê bele hasouru ita? Maromak la rai nia oan rasik, maibé, fó nia mate tan  ita hotu! Oin Sá mak Nia sei la fó mai ita, hamutuk ho Nia, buat tomak? Sê lós mak sei kesar Maromak nia oan sira? Maromak mak dehan katak sira ema di’ak? Sê lós mak sei kastigo sira? Cristo Jesus nebé mate – ha’u dehan tan, nebé moris hi’as- Nia iha Maromak nia sorin kuanan, Nia mak sei husu tulun mai ita?

Maromak Futar Lia 

 

Aclamação

Refrão :  Hahí no Glória ba ita, Na’i  Jesus Cristo!!! Repete-se

                   Iha kalohan nabilan ema rona Aman lian : “ Ida ne’e Ha’u oan doben. Imi rona Nia ba”. Refrão

 

Evangelho                                                                                                                                                                                                       Mc.  9, 1-9 (2-10)

†          Na’i Jesus Cristo nia Evangelho  nu’udar  São  Marcos haktuir

Iha tempo nebá, Jesus lori Pedro, Tiago no João, lori sira mesak ba foho aas tebes ida. Nia nakfilak-na iha sira oin: Nia hena sira nabilan, mutin teb-tebes. Ema ida iha rai ne’e, labele halo mutin liu. Hafoin, Moisés ho Elias mosu ba sira, ko’alia daudaun ho Jesus. Pedro hahú ko’alia, dehan  ba Jesus:  “ Mestre, di’ak oin Sá ita horik ona iha ne’e! Ita halo takabaluk tolu: Ida ba Ita, ida ba Moisés, ida seluk ba Elias”. Tebes, nia la hatene atu dehan sa ida lós, tan sira ta’uk teb-tebes. Kalohan ida tun mai, taka taha sira, housi kalohan ne’e, rona lian ida: “Ida ne’e Ha’u oan doben. Imi rona Nia ba”. Teki-tekil, hateke haleu, sira la haré tan ema ida, selae Jesus mesak hamutuk ho sira. Tun husi foho mai, Jesus dehan ba sira atu keta haktuir ba ema ida, buat nebé sira haré, wainhira Mane- Maksoyn ladauk moris hias housi mate. Ne’e duni, sira rai nonok buat ne’e ba sira, maibé, sira haksesuk malu, moris hias housi mate katak Sá ne’e.

Lia Maksoyn.

 

Reflexão :

MAROMAK BOLU ITA ATU SAI FIEL

 
             Santa Teresa de Calcutá hameno katak;”Maromak bolu ita laos hodi sai sucesso maibé Maromak bolu ita hodi sai fiel”. Ita nudar Cristão Católico sei ba hetan glória iha Maromak nia foho tutun maibé, molok nee, ita sei hakat liu lai husi sacrifício no mate. Iha Bíblia Sagrada (Sagrada Escritura), laletek no foho sira iha sentido nebe klean tebes. Por exemplo, iha neba temi foho Moria, foho Sinai, Nebo, Carmelo, Horeb, laletek haksolok, Tabor, foho Sião, Laletek Zaitun, foho Calvário no Golgota. Foho no laletek hirak nee  hotu fo imagem kona ba encontro eh sorumutuk entre Maromak ho Ninia emar sira. Tan nee, foho eh laletek sira consiste sentido Bíblico ba povo Maromak nian ho sentido nebe klean tebes.

            Testamento tuan (Primeira Leitura) no Testamento Foun (Segunda Leitura) iha Domingo semana nee contem acontecimento importante boot rua iha ita nia istória salvação nebe Maromak rasik mak providência. Tanba nee, iha Domingo ba dala rua tempo Quaresma nee, uma Kreda bolu ita nobun hodi fiar no compreende didiak Maromak nia Futar Lia Fuan ho laran nakloke. Citação Bíblica nebe mosu iha Leitura Domingo semana nee mos, temi foho Moria no Tabor, tan iha nebá hatudu plano no relação entre Maromak ho Oan Mane Jesus Cristo nudar Maksoyn.

Uluk liu iha Primeira Leitura (Antigo Testamento): Acontecimento iha foho Moria.

            Fiar no espírito/semangat sacrifício Abrão nian,  nebe Maromak husu nia atu sacrifica ninia oan mane mesak (Veja: Gn 22,1-19). Se tuir ita ema nia sasukat racional, ita bele reclama Maromak nia pedido eh ordem nee nudar tropeço (batu sandungan) ou desafio boot ida. Ita mos bele questiona; Maromak saida mak haruka aman ida atu oho fali ita nia oan rasik? Maibé, tan deit Abrão ninia fiar no fidelidade (kesetiaan) ba Maromak, nia cumpri deit Maromak nia pedido nebe todan tebes nee.

Tuir fali iha Segunda Leitura (Novo Testamento): Acontecimento iha foho Tabor.

            Acontecimento nebe mosu iha foho Moris nudar Primeira Leitura relata, acontece hikas iha Segunda Leitura, liliu iha foho Tabor, sei continua too iha foho Golgota. Foho Moria, Tabor no Golgota contem sentido espiritual nebe valor boot tebes. Tanba sá? Tanba iha foho hirak nee nia tutun mak ita ba hasoru malu ho Maromak. Maromak nebe nunca abandona/husik ita mes-mesak. Maromak nebe la husik ita terus, defamação, desesperado no mate mes-mesak. Emanuel significa Maromak horik ho ita; tanto iha loron-kalan, iha nakukun-naroman, iha ksolok no triste. 

         

            Foho hirak nee fo lição ba ita katak; se ita fiar duni Maromak, ita precisa husik buat ruma nebe murak liu mai ita hodi entrega ba Maromak basá, Maromak mak hun no rohan husi buat hotu. Nudar moris hun, ita precisa fo laran metin tomak ba Maromak nia misericórdia. Maske ita la hatene saida mak Maromak sei fo ba ita maibé, ita nia fiar no laran metin mak sai força interior atu motiva ita fo buat nebe kmanek liu husi ita ba Maromak. Exemplo concreto mak hanesan Abrão sacrifica nia oan tuir Maromak nia hakarak. So ho maneira ida nee deit mak ita bele recupera fali ser hanesan Maromak nia criatura, ita bele hetan ba isin diak ba moras ruma, ita hetan hikar naroman iha rai hun mutin ba moris foun nebe sei mai.

            Ita la bele halo imagem kona ba sentido transfiguração iha foho Tabor tutun (Mc 9,2-10; Mat 17, 1-19; Lc 9,28-36). Iha neba relata katak Jesus nia figura transformado; Ninia roupa/unuk sai mutin nabilan. Iha neba, mosu mos Moise nudar libertador Israelita sira husi Egipto no mosu mos Elias nudar profeta boot. Iha interpretação balu nebe hatete katak; acontecimento nee hodi justifica Jesus nia superioridade ba Maromak nia manu-ain no Maromak nia profeta sira iha tempo Testamento Tuan nian. São joão Baptista rasik hatete ba ninia escolante sira katak:’Nee Maromak Bibi Oan nebe sei kasu mundo nia sala’ wainhira haré Jesus mosu mai husi dook.

            Molok sai ba foho Tabor tutun hodi transforma-An hanesan Evangelho relata, Jesus hatete fil-fila ona ba apóstolo sira katak; Nia sei hetan terus, oho no sei moris hias fali. Nudar molok Jesus atu halao Ninia missão salvadora, Jesus tenke tun ba mota Jordão hodi simu baptismo, nunee mos Jesus sei sai ba Jerusalém hodi cumpri no finaliza Ninia missão iha rai nee. Ita precisa lao hamutuk ho Jesus sae ba foho hodi sente no haré Maromak nia presença iha mundo no iha ita nia moris lor-loron.

            Relato iha são Marcos nia Evangelho Domingo semana nee, fo hanoin ita katak; la too, wainhira fihir/contempla no hanoin deit Maromak nia presença iha foho hirak nee deit maibé, ita mos precisa sente Maromak nia presença iha Jesus nia figura no iha Jesus nia lia hanorin sira, iha moris lor-loron nian.

            Acontecimento nebe Jesus hatudu iha foho Tabor tutun, motiva ita haré fila fali ita nia experiência sira iha foho Tabor ita nia moris nian. Será que ita nia experiência hirak nee fo roman ba ita nia moris nakukun sira? Será que ita nia experiência iha foho moris nian fo ona força, coragem no laran metin/esperança iha ita nia viagem moris nian?

            Hanesan Pedro, Tiago no João iha foho tutun, ita mos precisa imita sira hodi rona Maromak nia Lia Fuan nebe tenik:”Ida ne’e Ha’u oan doben. Imi rona Nia ba”. Maromak nia futar Lia Fuan nee, bolu ita hodi sai fiel no metin iha ita nia fiar ba Maromak. Basá, sei ita moris deit iha ita nia-an, ita nia hanoin rasik, ita nia horizonte, ita nia egoismo, hirak nee hotu impede ita atu haré hetan Maromak nia glória iha Cristo. Ba ida nee, Santa Teresa de Calcutá hameno katak; Maromak bolu ita laos hodi sai sucesso maibé Maromak bolu ita hodi sai fiel//Allah memanggil kita bukan untuk menjadi sukses tapi, Alllah memanggil kita untuk menjadi setia.

            Jesus nia transfiguração iha Tabor fo hanoin mai ita katak; atu sai Jesus nia seguidor lolos, ita precisa disponível atu hetan experiência husi foho moris hirak nee. Laos iha Tabor deit mak ita bele hetan Maromak nia glória maibé, transfiguração nebe Maromak haraik mai ita sei la bele haketak ita husi realidade terus no mate. Dalan mak nee deit ona. Assim seja e bem Haja. (ignaslopes)

Leave a Reply

Your email address will not be published. Required fields are marked *