shadow
Diocese de Dili > NOTÍCIAS > LETURA DIÁRIA > Segunda-Feira, III Semana tempo Quaresma

Segunda-Feira, III Semana tempo Quaresma

ANO B

 

Primeira Leitura                                                                                                                                                                                                 2Rs. 5. 1-15ª

Lia housi segundo livro Liurai sira nian

Iha loron hirak neba, Naaman, comandante funu na’insira, liurai Síria nian, nia naran boot tebes, liurai mós hadomi nia, tanba Na’i haraik ona tulu ba Síria manan funu hodi nia hahalok. Maibé ema ne’e, iha moras áat lepra. Ema Síria nian, iha funu laran, sira káer feto oan ida rai Israel nian, nebé tama serbisu iha Naaman nia féen. Nia dehan ba liurai feto: “Ha’u nia na’in mosu karik iha profeta nebé iha rai Samaria ne’e nia oin, profeta ne’e sei hamos tiha lepra!”.

Naaman ba fó hatene liurai: ‘Feto oan Israel nian ko’alia nune’e’. Liurai Síria hatan ba nia: ‘Ne’e sá, la’o ba, ha’u haruka mós surat ida ba liurai Israel nian’. Naaman hahu la’o, lori ho osan mutin talento sanulu, doit osan mean rihun neen, hena troca nian tahan sanulu. Nia fó ba liurai Israel surat nebé hateten: “Wainhira surat ne’e to’o ba ó liman, ó hatene ona katak ha’u haruka ba ó ha’u nia atan Naaman atu ó hamos tiha nia lepra”. Lê tiha surat ne’e, liurai Israel les nia unuk hodi dehan: “Bele ha’u Maromak ida nebé fó mate no moris, hodi nia hamos ema nia lepra? Imi hatene ba hodi haré didi’ak katak nia buka lia ruma hasouru ha’u”.

Wainhira Eliseu, Maromak nia emar, hatene katak Israel nia liurai les nia unuk, nia haruka fó hatene ba liurai: “Tansá lós ó les ó nia unuk? Ema ne’e sei mai ha’u; nia sei hatene katak iha Israel iha profeta ida”. Naaman liu ho kuda no kareta ba para iha Eliseu nia uma oin. Eliseu haruka manu-ain ida hateten ba nia: “Ó sei ba haris dala hitu iha Jordão, ó nia isin sai di’ak, ó sei sai mós”. Naaman hirus, ba tiha hodi hateten: “Ha’u dehan ba ha’u-an rasik: nia kala sei sai mai hodi hatudu nia-an atu harohan ba Na’i, ninia Maromak futar naran hodi halo liman kona iha fatin moras no halo ha’u sai di’ak housi lepra ne’e. Wé mota iha Damasco, Abaná no Papar nian la’os folin liu fali wé tomak Israel nian? Ha’u la bele haris iha mota sira atu hamos-an?” Nia fila kotuk, la’o ho hirus; maibé atan sira hakbesik, hasa’e lia ne’e ba nia: “Ha’u aman, profeta ne’e haruka karik ita halo buat susar ida, ita sei halo duni? Tan sá lós sei la halo wainhira nia dehan de’it” ‘Ó ba haris, sei sai mós’. Ne’e duni, nia tun, luku dala hitu iha Jordão, tuir Maromak nia emar nia liafuan. Nia isin sai tiha hanesan labarik ida nian, nia sai mós tiha. Naaman ba fali hasouru Maromak nia emar ne’e hamutuk ho nia atan sira hotu.

To’o tiha profeta nia oin, hateten: “Oras ne’e ha’u hatene katak iha rai-klaran tomak, la iha Maromak se la’e iha Israel!”

Maromak Futar Lia.

 

Salmo Responsorial                                                                                                                            Sal. 41(42). 2, 3; 42(43). 3, 4, (R. Cf. Sal. 41. 3)

Refrão : Ha’u klamar hamrook Maromak moris

                 Wainhira lós ha’u sei haré Nia futar oin?!!! Repete-se

                 

                  Hanesan rusa buka wé lolon,

                  Nune’e mós ha’u klamar buka Ita, Na’i.

                  Ha’u klamar hamrook Maromak moris,

                  Wainhira ha’u sei ba haré Maromak futar oin? Refrão

 

                  Haruka mai Ita roman no lialós;

                  Sira ha’u nia mata-dalan no lori ha’u

                  Ba Ita foho santo,

                  Ba Ita kadunan santo. Refrão

 

                  Ha’u sei ba Maromak Nia altar,

                  Ba Maromak, ha’u nia ksolok.

                  Hodi cítara lian, ha’u sei hahi Ita,

                  Na’i, ha’u nia Maromak. Refrão

 

Aclamação                                                                                                                                                                                                   Sal. 129(130). 5, 7

Refrão : Glória ba Ita, Jesus Cristo, Liafuan Aman Nian!!! Repete-se

                  Ha’u laran metin iha Na’i no Nia liafuan tanba

                  Nia laran luak no maksoyn. Refrão

 

Evangelho                                                                                                                                                                                                               Lc. 4. 24-30

Na’i Jesus Cristo nia Evangelho nudar São Lucas haktuir

Iha tempo neba, Jesus ba Nazaré hodi ko’alia ba povo iha sinagoga: “Tebes duni, Ha’u dehan ba imi: la iha profeta ida ema simu di’ak iha nia rain! Lós duni, Ha’u dehan mós ba imi katak iha tempo Elias nian, feto faluk barak mak iha rai Israel. Wainhira udan la monu rai iha tinan tolu no fulan neen nia laran, rai tomak hamlaha boot; maibé, Maromak la haruka Elias ba feto faluk sira ne’e ida; haruka de’it ba feto faluk ida iha Serepta, iha rai Sidónia. Iha tempo profeta Eliseu nian mós, ema moras lepra barak mak iha Israel, maibé sira la hetan isin di’ak; ema Síria, Naaman de’it mak hetan fali isin di’ak.

Rona tiha liafuan hira ne’e, sira hotu iha sinagoga laran hirus teb-tebes. Nune’e, sira hotu hamriik hodi duni sai Nia housi cidade. Hafoin, sira lori Nia ba to’o rai Tatinis iha foho leten nebé sira hari sira nia cidade atu bele so’e tun Nia housi neba. Maibé, Jesus liu housi sira leet, la’o tuir Nia dalan.

Lia Maksoyn

Leave a Reply

Your email address will not be published. Required fields are marked *