shadow
Diocese de Dili > NOTÍCIAS > LETURA DIÁRIA > Terça-Feira, III Semana tempo Quaresma

Terça-Feira, III Semana tempo Quaresma

ANO B

 

Primeira Leitura                                                                                  Dan. 3. 25, 34-43

Lia housi Profecia Daniel nian

Iha loron hirak neba, klosan Azaris hamriik iha ahi manas laran, loke ibun, hamulak nune’e: “Na’i, hodi Itaboot naran keta husik ami mesak ba nafatin; keta husik lakon Ita Nia lia moruk; keta halakon Ita laran-luak mai ami, tanba Abraão, Ita belun; tan Isaac, Ita atan; no tan Ita Nia Santo, Israel. Ita hakotu ona lia ba sira katak sei haraik derasaan ida wa’in bé wa’in, hanesan fitun iha lalehan nian no rai henek iha tasi ibun. Na’i, ami uituan de’it ona iha nação sira hotu nia oin. Oras ne’e, ami hotu haraik-an iha mundo rai-klaran tomak tan ami salan.

Iha tempo ne’e, la iha na’i ulun, la iha profeta, la iha mata-dalan, la iha buat oho, sacrifício, buat-karan ka ai wen-morin. La iha fatin ida atu ami hasa’e ba Ita ai-funan rai nian hodi hetan Ita laran-luak. Maibé simu netik ami ba ho klamar terus no neon nakraik, hanesan buat oho nian bibi aman sira, karau sira, bibi oan bokur rihun ba rihun. Nune’e mós ami nia sacrifício loron ohin iha Ita Nia futar oin, nia hamutuk ho Ita atu hamamar Ita futar laran basá sira bé fiar Ita, ema sei la hamoe lerek. Oras ne’e, ami tuir Ita, ami hamutuk Ita, ami buka Ita futar oin ho laran tomak. Keta husik ami moe lerek, maibé hatudu laran mamar mai ami tuir Ita laran-luak boot tebes; Na’i hahi Ita futar naran ba”.

Maromak Futar Lia.

 

Salmo Responsorial                                                                                                                                                  Sal. 24(25). 4-5ab, 6-7bc, 8-9, (R. 6ª)

Refrão : Na’i, hanoin ba Ita laran-luak!!! Repete-se

                  Na’i hatudu mai ha’u ita dalan;

                  Hanourin mai ha’u Ita Nia dalan terik.

                  Dada ha’u tuir Ita Nia lialós

                  Hodi hanourin ha’u, tan Itaboot

                  Ha’u nia Maksoyn. Refrão

 

                  Na’i, hanoin Ita laran-luak ba,

                  Hanoin Ita Nia graça be rohan laek.

                  Na’i, fó hanoin ha’u tuir Ita laran maus

                  Tan Ita laran di’ak. Refrão

 

                  Na’i laran di’ak, laran mós,

                  Hatudu dalan ba maksalak sira.

                  Leno dalan ba ema sira bé

                  Haraik-an iha justiça;

                  Hanourin Nia dalan rasik ba sira. Refrão 

 

Aclamação                                                                                                                                                                                                            Joel. 2. 12-13

Refrão : Glória ba Ita, Na’i, Maromak moris Nia Oan Mane!!! Repete-se

                  Na’i dehan, fila imi laran no neon tomak mai Ha’i, tan

                  Ha’u laran di’ak no laran-luak tebes! Refrão

 

Evangelho                                                                                                                                                                                                             Mt. 18. 21-35

Na’i Jesus Cristo nia Evangelho nudar São Mateus haktuir

Iha tempo neba, Pedro hakbesik ba Jesus, hodi husu: “Ha’u maun eh alin sala dala wa’in hasouru ha’u karik, ha’u sei perdua nia dala hira, to dala hitu?”

Jesus hatan ba nia: “Ha’u la dehan to’o dala hitu, maibé, hitunulu dala hitu. Tan ne’e, Maromak Nia Reino hanesan liurai ida nebé hakarak hatene nia tusan ho atan sira. Wainhira nia hahu sisi tusan, sira lori ema ida nebé iha tusan osan rihun sanulu. Tan nia la halo buat ida atu selu, nia na’in haruka faan tiha nia hamutuk ho nia féen, oan sira ho nia sasan tomak atu hodi bele selu. Atan ne’e hakneak monu ba nia ain hodi dehan: ‘Na’i, haraik loron ruma mai ha’u; ha’u sei selu hotu!” Na’in hanoin atan ne’e fó fali perdua hodi perdua tusan tomak. Molok sai, atan ne’e hetan nia maluk ida nebé iha tusan osan atus ida. Kaer tiha, hahu hatata nia dehan: ‘Selu ó nia tusan’. Maluk ne’e hakneak hodi husu ba nia: ‘Haraik loron ruma mai ha’u, ha’u sei selu hotu!’ Maibé, nia la hatan; lori ba hatama nia iha cadeia hodi sisi to’o selu tusan tomak. Tan buat hirak ne’e, ema ne’e nia maluk seluk laran susar teb-tebes, ba haktuir ba na’i buat hotu nebé sira haré. Na’i ne’e haruka bolu nia, hodi dehan: ‘Atan áat, ha’u perdua ó nia tusan hotu, tan ó husu mai ha’u. Ó mós la bele hanoin ó nia maluk hanesan ha’u hanoin ó?’ Na’i ho laran hirus, saran ba dadur na’in sira to’o nia selu tusan tomak.

Nune’e mós Ha’u Aman iha Lalehan sei halo ba imi, wainhira imi ida-idak la perdua imi nia maun eh alin ho laran tomak.

Lia Maksoyn.

Leave a Reply

Your email address will not be published. Required fields are marked *