shadow
Diocese de Dili > NOTÍCIAS > LETURA DIÁRIA > Quarta-Feira, III Semana tempo Quaresma

Quarta-Feira, III Semana tempo Quaresma

 ANO B

 

Primeira Leitura                                                                                    Deut. 4. 1, 5-9

Lia housi livro Deuteronómio

Iha loron hirak neba, Moisés ko’alia ba povo dehan: “Israel oan sira, oras ne’e imi sei rona liafuan no ukun fuan nebe ohin ha’u hanourin ba imi. Imi sei halo tuir liafuan no ukun fuan hirak ne’e atu imi bele la’o to’o rai nebe imi nia bei-ala sira nia Maromak sei haraik ba imi. Imi haré, ha’u hanourin ba imi lei no ukunfuan sira hanesan Na’i, ha’u Maromak, fó hatene tiha mai ha’u atu imi moris tuir iha rai nebe imi sei hela ba. Imi sei haré, imi sei halo tuir ukunfuan hirak ne’e, basá, nune’e, imi hatudu imi nia matenek, imi nia ulun mamar, ba nação sira seluk. Nação hirak ne’e, rona tiha ukunfuan hirak ne’e, sei hateten: ‘Tebes, nação boot ne’e matenek no ulun mamar liu!’ lós duni, laiha nação ida mak iha Maromak hanesan Na’i, ita nia Maromak; Ita nia Maromak rona nafatin ita wainhira ita harohan ba nia. Nação boot nebe mak iha liafuan no ukunfuan lolós de’it, hanesan ukunfuan ida ne’e, ohin ha’u fó sai ba imi?

Maibe imi, matan moris neon na’in ba. Imi haré ba, keta haluha buat hotu nebe imi hare tiha ona ho imi matan; imi keta husik lakon iha naran loron ida iha imi nia moris. Maibé, imi hanourin ukunfuan ne’e ba imi nia oan sira no ba imi nia oan sira nia oan”.

Maromak Futar Lia.

 

Salmo Responsorial                                                                                                                                                 Sal. 147. 12-13, 15-16, 19-20 (R. 12ª)

Refrão : Jerusalém, hahi Na’i ba! Repete-se

 

                  Jerusalém, hauelok Na’i;

                  Sião, hahi ó nia Maromak!

                  Nia hametin ó nia odamatan,

                  Haraik bensa ba nia oan sira. Refrão

 

                  Na’i haruka Nia liafuan ba rai-klaran;

                  Hala’o maka’as, Nia liafuan tatoli.

                  Nia halo ue-isin namlele

                  Mai hanesan balada fulun;

                  Nia halekar ue-isin hanesan ahi-kdesan. Refrão

 

                  Na’i haklaken Nia liafuan ba Jacob,

                  Nia lei no ordem ba Israel.

                  Nia la halo nune’e ba povo seluk ida,

                  Ba povo seluk Nia la hatudu Nia justiça. Refrão

 

Aclamação                                                                                                                                                                                                           Jo. 6. 63c, 68c

Refrão : Glória ba Ita, Na’i, Maromak moris Nia Oan Mane. Repete-se

                   Na’i, Ita futar liafuan sira mak espírito no moris. Ita mak iha liafuan moris rohan laek nian. Refrão

 

Evangelho                                                                                                                                                                                                              Mt. 5. 17-19

Na’i Jesus Cristo nia Evangelho nudar São Mateus haktuir

Iha tempo neba, Jesus lia tun ba escolante sira: “Imi keta hanoin katak Ha’u mai atu hasai lei ka profeta sira; Ha’u mai la’os atu hasai; Ha’u mai atu halo ema cumpri lolós. Ha’u dehan lialós ba imi:  maski lalehan ho rai lakon, lei baluk ida mós sei la lakon; sei cumpri hotu. Ema nebe la halo tuir ukunfuan hirak ne’e ida, maski ukunfuan kiik-oan, hodi hanourin nune’e ba ema, nia sei sai kiik liu iha reino lalehan. Maibé ema nebé moris tuir didiak ukunfuan, hodi hanourin nune’e mos maluk seluk, ema ne’e sei boot iha reino lalehan”.

Lia Maksoyn.

Leave a Reply

Your email address will not be published. Required fields are marked *