shadow
Diocese de Dili > NOTÍCIAS > OPINIÃO > DOMIN NO HADOMI. HADOMI HO DOMIN

DOMIN NO HADOMI. HADOMI HO DOMIN

Waldimiro Afonso VIANA

Estudante teologia iha Instituto de Filosofia e de Teologia –ISFIT Dom Jaime Garcia Goulart,

no Seminarista iha Seminário Maior São Pedro no São Paulo Fatumeta, Dili.

oras ne’e estuda iha Pontificio Universidade Urbaniana, Roma

 

Saran Lia

Husi título nebé hakerek iha leten, hau hanoin, belun sira bele IHA ona ideia geral konaba SAIDA mak hau hakarak DEHAN iha artigo [tulisan] ida ne’e. Ou ho liafuan seluk dehan husi título artigo ida ne’e nian, fo tada ona konaba BUAT SÁ mak hau hakarak DEHAN husi hakerek ida ne’e. Mai ita hala’o aventura domin nian…

 

Comprenção Geral

Iha Dicionário Inglês-Tetum, liafuan love traduz ba “domin”; to love: hadomi; falling in love: laran-monu; want to, desire: hakarak; no like, fond of: laran-kona; “gosta” – adapta husi português (haré WILLIAM 2008, 35; 36; 49). Liafuan gosta bele traduz mós ba: “hakarak”. Iha Dicionário Português-Tetum, liafuan amor traduz ba “domin; doben” no amar: hadomi. Iha nebá define mós “domin” nudar «sentimento kle’an ema ida nian ba ema seluk» (BETTENCOURT 2015, 37). Nune’e wainhira koalia konaba “domin”, iha ita nia hanoin mosu liafuan hirak hanesan: hadomi, laran-monu, laran-kona, hakarak…

Iha língua grega, iha liafuan ha’at (4) nebé traduz liafuan domin: Eros (domin conjugal); Storge (domin familiar), Philia (domin amizade) no Agape (domin incondicional).

 

Domin nudar Desejo

Eros hatudu ba domin conjugal entre feto ho mane. Domin nebé caraterizada ho desejo sexual. Mitologia grega personifica deusa da beleza/fertilidade hanaran Afrodite no deus do amor/procriação hanaran Eros. Afrodite ninia oan mak Eros. Ho liafuan seluk dehan: beleza mak hahoris eros. Katak domin-eros moris husi atração física. Significa ita hahú laran-monu ba saseluk (o outro) nebé iha sexo diferente, tamba ninia oin kmo’ok, ninia isin diak… Saseluk ninia beleza física mak “atrai” ita atu conhece nia. Wainhira ita haré karik pintura sira grega nian: Eros dezenhado ho imagem mane-klosan kaer rama iha liman. Rama ne’e mak uza atu hána fetoran nebé halo nia laran-monu. Nia laran-monu uluk nanain tamba feto ninia beleza do corpo: oin kmo’ok, isin diak… Ita haré mós katak imagem «coração rua ho ráma borus» sempre sai ícona famosa ba domin namorado/a nian. Maibe wainhira domin ida ne’e hakat ba Matrimónio, ita haré imagem «coração rua ho ráma borus» nakfilak ba «pombu rua kesi ho fita mutin» nebé baibain simboliza laran mo’os no laran maus.

Domin-eros la’os absolutamente negativa, maibe precisa purifica. «O eros necessita de disciplina, de purificação para dar ao homem, não o prazer de um instante, mas uma certa amostrado vértice da existência, daquela beatitude para que tende todo o nosso ser» (Bento XVI, Deus caritas est – DCE, 4). Nudar ser humano, ema composto husi ISIN no klamar. No ita labele considera ISIN nudar buat aat, basá Maromak cria buat hotu diak (cfr. Gn 1, 25). Maromak cria EMA iha ninia totalidade [isin no klamar], nune’e mós wainhira Nia bolu EMA: Nia bolu atu HADOMI tuir domin nebé hakerek ona iha ema nia ISIN nudar feto no mane. «… the call to love as God inscribed in the human body as male and female» (WEST 2009, 29; 137). Iha Matrimónio, Maromak bolu feto no mane atu HADOMI ho domin nebé Nia rasik hakerek ona iha ema ida-idak nia an. Nia cria feto no mane atu moris hamutuk no sai ida deit hodi hakonu rai-klaran (cfr. Gn 1, 28). Maibe oinsa ho celibato? Konaba ne’e, Jesus hanorin: «Iha ema [eunuco] nebé desde inan ninia knotak nune’e kedas ona; iha balun, ema seluk mak halo, no iha balun ho hakarak rasik tamba Reino Lalehan» (Mt 19,12). Orador no escritor livro britânico C. West (1954 ) hakerek nune’e: «… who choose the charism of celibacy forego marriage to devote themselves to follow the call of Jesus in a particular way» (ibid., 29). Ita bele dehan katak ema hirak nebé HILI dalan celibato la’os katak laiha domin-eros, la’e! Nudar ema normal existe desejo hirak ne’e maibe, tamba Jesus nia lia bolu (the call of Jesus), sira “salta” ou “hakat” liu tiha matrimónio terreste (forego marriage) hodi dedica an ba matrimónio celeste atu hahoris no hakous oan espiritual ba Maromak nia Reino. Moris celibato ida ne’e la’os tamba ema seluk mak obriga, maibe ho hakarak rasik. Celibato tamba Reino Lalehan.

Ita fila hikas ba assunto domin matrimonial. Los duni katak domin-eros hahú ho atração física, laran-monu ba saseluk nebé iha sexo diferente tamba nia oin kmo’ok, isin diak, maibe domin cristão labele hela deit iha beleza isin nian; maibe SAI husi beleza isin nian BA iha beleza domin ne’e rasik. Significa sai husi domin-eros ba iha domin nia kmanek lolós: Agape. Ou ho liafuan seluk dehan: eros purificado. Nune’e relação domin íntima [sexual] iha vida matrimonial mak hahalok ida sagrada no segredo. Sagrada tamba Matrimónio católico la’os contrato social, maibe Sacramento (sacra: sagrado). No segredo tamba iha nebá mak kaben-nain sira hatudu íntimidade domin nian, nune’e hahalok domin ida ne’e, la soin atu sai consumo público no laos exposição ida atu hatudu ba ema hotu atu haré. Hahalok ida ne’e nudar segredo kaben-nain nian.

 

Domin nudar Afeição

Storge indica domin inan/aman ba oan. Escritor irlandes C.S. Lewis (1898-1963) hanaran domin-storge ho: Afeção, Afection (cfr. LEWIS 2012, 39ss). Domin-storge mak domin nebé natural no comum. Natural tamba relação RAN nebé sulin iha ita nia isin. Normalmente wainhira ita moris mai nudar oan ida, ita la moris nune’e deit, maibe ita moris husi domin entre inan no aman nian. Instinto natural fo tada katak nudar oan, ita sempre moris husi inan no aman. No inan ho aman mós moris husi família ida: husi avô/ó, bisavô/ó… tutan nune’e laiha rohan. Comum, tamba desde moris mai, ita simu tiha ona afeção no carinho husi inan/aman, maun-alin no parente sira, maske ita foin consciênte (sadar) wainhira ita adulto. Inan/aman hadomi uluk ona ita, molok ita foin hatene atu hadomi sira. Nudar Aristóteles (384-322 a.C) dehan:

Inan/aman hadomi [stergousin] nia oan desde moris mai, enquanto oan sira hadomi [philousi] inan/aman, liu tiha tempo balun, wainhira razão ou sensibilidade funciona. Nune’e mak hatudu momós razão tan sa inan sempre hadomi liu hotu = I genitori, infatti, amano i figli appena nati mentre questi amano i genitori solo quando è passato del tempo, e quando hanno acquistato giudizio o sensibilità. Da queste considerazioni risulta chiaro anche per queli ragioni le madri amano di più». (Etica Nicomachea – EN, VIII, 1161b 25).

Husi família no parente sira ninia domin (afeção) no carinho mak neineik-neineik forma daudauk ita ninia capacidade afetiva atu hadomi sira nudar sira hadomi tiha ona ita. Abut husi domin-storge mak consanguinidade: ran ida, bei-ala ida, geração ida. Significa relação RAN mak sai critéria ba existência domin ida ne’e nian. «But Afection has its own criteria. Its objects have to be familiar» (LEWIS 2012, 41). Ita hadomi malu tamba ita iha relação familiar: …bisavô/ó, avô/ó, aman, inan, maun, alin, tio, tia, primo, prima, oan, bei-oan… No hadomi malu ho domin [afeção] familiar nian.      

 

Domin nudar Amizade

Philia hatudu ba domin amizade nian. Hadomi nudar belun. Belun bele entre mane ho mane, feto ho feto ou, feto ho mane. Basá maske iha ona inan, aman, káben, oan, família maibe nudar ema, ita mós precisa belun. Relação amizade ida ne’e bele mosu tamba hasoru malu beibeik: iha escola, iha serviço fatin, eh hela besik malu; vizinho nst. Bele mós tamba hela hamutuk durante período ruma: iha seminário, iha colégio, iha convento, iha quarantena, iha academia nst… Ou tamba hobby nebé hanesan: futebol, basquetebol, música, desenho, escultura nst… Ou tamba idea nebé hanesan iha: política, social, economia nst… No iha relação domin-philia entre feto ho mane existe mós: domin nebé meramente tamba amizade (hadomi malu nudar belun) no existe domin tamba namorado/a (hadomi nudar doben nebé iha processo ba Matrimónio). Maibe domin-philia la limite deit entre ema, hatudu mós domin ba buat ruma. Bele hanoin ba liafuan filosofia: husi philia (domin) no sophia (sabedoria). Domin ba sabedoria. Hadomi sabedoria. Belun ho sabedoria. Diferente ho Sofista sira nebé considera an nudar “nain” ba sabedoria. Wainhira sente an nudar “nain” bele hamosu tendência atu julga la’os ona tuir lialós, maibe tuir fali interesse pessoal ou grupo nian. Nune’e dalabalun tamba deit interesse pessoal, ita bele saran fali belun ba perigo. Iha história filosofia, filósofo Sócrates (470-399 a.C) ninia mate considera nudar resultado husi conflito de interesse Sofista sira nian.

Conceito philia, fo hanoin mós ita konaba amizade entre filósofo bo’ot grego: Platão (428-347 a.C) no Aristóteles (384-322 a.C). Iha expressão ida nune’e: «Amicus Plato magis amica veritas» (cfr. GUSMÃO 2013, 37ss). Belun ho Platão, maibe belun-liu ho lialós. Habelun malu iha lialós. Hatur iha Aristóteles nia liafuan nebé dehan:

«… atu salva guarda lialós, tenke halakon tiha sentimento pessoal sira, liu-liu wainhira ida ne’e konaba filosofia: maske nain rua belun malu, maibe hahalok sagrada liu mak hanai lialós = almeno per salvaguardia la verità, lasciar perdere i sentimenti personali, soprattutto quando si è filosofi: infatti pur essendoci cari entrambi, è sacro dovere onorare di piú la verità» (EN, I, 1196a 15).

Ba Aristóteles, iha estudo filosófico, diak tebes, sé ita halakon tiha sentimento pessoal nebé dalaruma halo ita la brani atu questiona (ou critica) no corrige ita nia belun. Iha ita nia relação amizade, diferença idea bele existe, maibe respeito mútuo iha nafatin. Ida ne’e mak amizade lolós nian. Diferença idea la’os sai obstáculo ba amizade, maibe sai desafio atu amizade ne’e dura no hetan ninia perfeição. Sé belun mak halo crítica, nia sei critica argumento nebé mak ita hato’o. Diferente ho ida nebé halo ataque ba personalidade: nia buka liu mak ita nia fraqueza humana atu desacredita ita do que hamosu idea atu confronta. Maibe dalaruma mós acontece katak tamba deit tauk lakon amizade, ita lakohi corrige ou hili nonok iha realidade injustiça.  

Koalia konaba philia, ita hanoin mós significado profundo São João evangelista nian nebé exprime relação amizade entre Jesus ho discípulo sira. Ou amizade entre Jesus ho Marta, Maria no Lázaro (cfr. Jo 11,5). Iha São João 15,9-17, wainhira koalia konaba mandamento domin (agape) nian, nia apresenta relação Jesus ho discípulo sira, la’os ona nudar atan, maibe belun (philous). La bolu ona atan, maibe belun. Basá atan la hatene saida mak nia na’i halo, maibe belun revela segredo ba malu. Atan ho na’i iha gap nebé haketak, maibe belun koalia terbuka ba malu. Atan hakru’uk ba na’i nia ordem, maibe belun hanoin hamutuk buat sá mak atu halo. Atan serbí nia na’i, maibe belun fahe ba malu. «Hau bolu imi belun, basá hau dehan sai lolós tiha ona buat hotu nebé hau rona husi Aman» (Jo 15,15). Belun fahe experiência nebé liu hamutuk iha momento ruma: hamnasa, tanis, ksolok, susar… Nune’e mak memória ba amizade sempre sai nudar música saudades nian. Música nebé bolu hikas memória passada mai presente. Nune’e wainhira ita rona música ne’e halo ita hanoin hikas história passada tamba música ne’e iha ninia história rasik nebé liga diretamente ba experiência amizade nian. Nune’e maske ita rona beibeik, maibe ita la sente baruk. No quanto mais ita repete, tanto mais ita sente diferente.

 

Domin nudar “Doação Total”

Agape indica domin total no incondicional: saran moris tomak. Iha Novo Testamento domin-agape refere ba Maromak nia domin ba humanidade. «Maromak hadomi (egápesen) tiha ona mundo, tamba ne’e Nia fo [ba mundo] Nia Oan Mesak, atu nune’e ema nebé fiar iha Nia sei la lakon, maibe hetan moris rohan laek» (Jo 3,16). Ou hanoin ba Jesus nia liafuan: «Laiha domin (agapen) bo’ot liu: Ida nebé saran moris ba nia belun sira» (Jo 15,13). Nune’e domin-agape contém hahalok: fo ou saran moris tomak. No domin-agape ida ne’e mak “domin” nebé Jesus Cristo husu ba São Pedro atu halo ba [Jesus] Ninia Igreja. Igreja nebé harí duni iha [São Pedro] ninia leten (cfr. Mt 16,18).

Evangelho São João 21,15-17 hatudu diferença entre Jesus nia pergunta no São Pedro nia resposta. Jesus husu domin-agape no São Pedro hatan domin-philia. Iha tetum, ita labele nota, maibe iha texto grego hatudu ninia diferença. Iha primeira no segunda pergunta, Jesus husu: «Ó hadomi hau? Agapâs me? No São Pedro hatan: Hau hadomi ó. Philô se» (cfr. ZAPPELLA 2014, …). Texto ida ne’e apresenta katak domin-agape mak “domin” nebé Jesus husu. Hadomi (domin-agape) significa saran moris tomak. Banati tuir mandamento nebé Nia haruka: «Imi sei hadomi malu nudar hau hadomi ona imi» (Jo 15,12). Haré ba São Pedro ninia martírio (saran moris; mate iha cruz) sai duni SASIN konaba domin-agape nebé Jesus husu ona ba nia. São Pedro hatudu duni katak nia hadomi (saran moris ba) Cristo no ba Cristo nia Igreja. Ita hotu hetan vocação atu partecipa iha domin total no incondicional ida ne’e. Laos significa katak ita tenke mate iha cruz hanesan Jesus no São Pedro, la’e! Maibe hatudu ba hahalok saran moris tomak liu husi ita nia disponibilidade atu serbí Cristo liu husi vida matrimonial eh vida celibatária. Disponibiliza ita nia moris, ita nia an, capacidade, talento, tempo no buat hotu nebé ita IHA atu tulun ema seluk. Hadomi significa saran moris tomak. No razão atu hadomi mak ho domin Cristo nian. «Nudar Aman hadomi tiha oan hau, nune’e mós hau hadomi tiha ona imi. Imi sei hela iha hau nia domin» (Jo 15,9). Ou hanoin mós ba liafuan kmanek nebé São João hakerek: «Maromak mak domin, ema nebé hela iha domin, hela iha Maromak, no Maromak hela iha nia» (1 Jo 4,16).

 

Domin nudar caridade

Maromak mak Domin. Deus é Amor. Deus Caritas est. Husi língua grega ita ba língua latina. «Iha Vulgata latina, liafuan agapan traduz ba deligere no philien traduz ba amare. Maibe laos vice versa nudar buat sá mak ita espera. Liafuan agape la traduz ba delictio, nem ba amore, maibe traduz ba caritas» (SCHINELLA 2008, 31). Iha latin existe verbo deligere: hadomi no substantivo amor,em: domin. Maibe iha mós liafuan caritas,tatem: caridade, charity, tulun-malu. Liafuan hirak ne’e atu apresenta deit diferença entre: «Deus é Amor» no «Amor come caridade». Atu evita confusão ita distingue tiha ho letra maiúscula «Maromak mak (Domin)» no minúscula «(domin) nudar caridade». Halo caridade significa fo ou fahe buat nebé ita IHA hodi tulun ema nebé precisa. Soin nebé ita hetan bele tulun mós ema seluk. Sorte nebé ita hetan bele tulun mós ema seluk. Maibe precisa purifica didiak ita nia motivo. Ita fo tulun la’os tamba pressão, la’os atu bele controla nia, la’os tamba orgulho pessoal, la’os tamba buka oin, la’os atu manan voto iha eleição, maibe fo tulun tamba DOMIN. Ita fahe tamba uluk nanain ita simu ona nudar “dom” husi Nai Maromak. Nudar Papa Bento XVI dehan: «Quem quer dar amor, deve ele mesmo recebê-lo em dom» (DCE, 7). Nune’e «domin nudar caridade» significa fahe buat nebé ita IHA ba ema seluk. Ou fo buat nebé ita IHA atu tulun ema seluk. Caridade supera justiça. Sé justiça haruka: “fo ba ema buat nebé ninian!”; caridade hamaus ita atu: “fo ba nia buat nebé nia laiha”. Simplesmente halo caridade katak fahe ba ema nebé laiha no fo ba ema nebé precisa.

 

Domin nudar hakarak diak

Aventura domin nian sei continua: husi tetum ba grego, husi grego ba latin no husi latin mai italiano. Ema italiano/a sira iha expressão kmanek konaba domin: «Ti voglio bene». Baibain traduz ba: «Hau hadomi ó. Eu te amo. I love you» nebé literalmente dehan: «Hau hakarak diak ba ó» (cfr. SRI 2007, 45ss). Expressão ne’e composto husi: Ti (A te: ba ó); voglio bene (hau hakarak diak); husi verbo «Voler bene = hakarak diak». Nune’e hadomi significa hakarak diak ba ema seluk. Catecismo Igreja Católica (CIC) cita São Tomas de Aquino nia obra Summa Theologia, I-II, 24,1 hanorin nune’e: «Hadomi katak hakarak diak ba ema seluk. Amar è querer bem a alguém» (CIC, 1766). Nune’e ita hadomi significa ita hakarak diak ba ema seluk. Conceito «hakarak diak» ida ne’e la’os iha sentido buka lucro ou buka beneficio ba an rasik, maibe refere ba hahalok sacrifica «an rasik» atu ema seluk hetan «diak». Diferente ho hahalok egoista nebé hakarak sacrifica «ema seluk» atu hetan «diak» ba «an rasik». Hahalok egoista hamosu tendência atu instrumentaliza ema seluk. Nune’e ita precisa consciênte no distingue didiak entre: loving (hadomi) no using (uza). Keta husik ita nia an atu ema seluk uza. “… not to let ourselves be used” (cfr. SRI 2007, 5ss). Keta husik ema seluk uza deit ita ba ninia satisfação pessoal.

 

Domin nudar “Descoberta do Outro”

Aventura seidauk remata! Husi Novo Testamento (NT), ita fila uitoan ba Antigo Testamento (AT) ho «indicação importante ba livro Cântico dos Cânticos nebé tuir interpretação ohin loron nian, livro ne’e contém poesia sira nebé considerado nudar knananuk domin iha festa nupcial israelita sira nian, nebé tane aas domin conjugal» (cfr. CDE, 6). «Atu exprime idea konaba domin, ebreu sira uza verbo aheb no sustantivo ahabah nebé iha grego traduz ba liafuan ha’at (4): eros, philia, agape no storge. Maibe storge la mosu iha Bíblia grega» (SCHINELLA 2008, 29). Papa Bento XVI hakerek ona katak iha AT língua ebraica nian iha liafuan rua (2) atu indica domin: «liafuan dodim nebé exprime «O amor ainda inseguro, numa situação de procura indeterminada» no substitui ho liafuan ahabà nebé iha AT versão grega nian, traduz ba agape; caraterizado nudar concepção bíblica konaba domin» (DCE, 6). Saida mak domin-ahabà ou domin-agape ne’e? Papa Bento XVI dehan:

Este vocábulo exprime a experiência do amor que agora se torna verdadeiramente descoberta do outro, superando assim o carácter egoísta que antes claramente prevalecia. Agora o amor torna-se cuidado do outro e pelo outro. Já não se busca a si próprio, não busca a imersão no inebriamento da felicidade; procura, ao invés, o bem do amado: torna-se renúncia, está disposto ao sacrifício, antes procura-o (DCE, 6).

Dalabarak iha relação amizade mosu hahalok hakarak impõe no instrumentaliza ema seluk: tanesan ho Ditador-domin nebé lori domin nia naran atu obriga ema seluk tuir nia hakarak pessoal (egoismo), nune’e laiha ona fatin ba hasoru malu (Espaço para o encontro) no laiha ona tempo ba diálogo (Tempo para compartilhar). Ou dalaruma tanesan mós ho Imperador-domin nebé ibun dehan hadomi, maibe hahalok hatudu «usa» ema seluk ba projeto pessoal (egocentrismo), nune’e laiha ona fatin ba ema seluk (Espaço para o outro) no laiha ona tempo atu rona ema seluk (Tempo para recolher).

Husti texto iha leten Papa Bento XVI apresenta experiência domin nudar experiência de descoberta do outro. Nune’e hadomi significa descobre [existência] ema seluk nian. Hadomi significa reconhece katak «Para além de HAU» existe mós EMA SELUK. Hadomi, halo ita conhece no reconhece ema seluk ninia existência. Livro Gênesis haktuir encontro ida nebé nakonu ho surpresa: descoberta. Encontro dahuluk entre Adão (mane) ho Eva (feto) nebé hamosu kedas ona sentimento maravilha husi Adão ba ninia saseluk: Eva. «Maibe domin la’os sentimento deit. Sentimento BA no MAI. Sentimento bele sai nudar maravilhosa centelha inicial deit, maibe la’os totalidade domin nian. O amor não é apenas um sentimento. Os sentimentos vão e vêm. O sentimento pode ser uma maravilhosa centelha inicial, mas não é a totalidade do amor» (DCE, 17). Nune’e saida mak domin? Domin katak descoberta do outro. Adão wainhira haré Eva, nia dehan saida? Dadolin kmanek simu hasoru Eva ninia presença. Haré tiha Eva, Adão dehan: «Ó mak ISIN husi hau nia isin; RUIN husi hau nia ruin» (cfr. Gn 2,23: Esta é, realmente ossos dos meus ossos e carne da minha carne). Adão descobre ninia an iha Eva. Nune’e hadomi significa SAI husi ita nia an (egoismo) hodi ba hasoru ema seluk (o outro), basá iha ema seluk ita hetan (descobre) ita nia an (si mesmo).

 

Domin nudar “O Cuidado do Outro”

Papa Bento XVI apresenta mós experiência domin nudar experiência do cuidado do outro pelo outro. Nune’e hadomi significa cuidado [báli, hein] ita nia saseluk. Ita cuidado nia hatudu katak ita considera ninia existência. Nune’e hadomi iha relação ho responsabilidade. Dala ida tan, hau hakarak cita pasagem evangélica São João 21,15-17. Passagem ne’e hatudu mós ba relação entre domin no responbilidade. Jesus molok fo responsabilidade, Nia husu domin. «Simão, João nia oan, ó hadomi hau?… Hein [báli] hau nia bibi-oan sira» (v. 15). «Simão, João nia oan, ó hadomi hau?… Hein [báli] hau nia bibi sira» (v.16 e 17). Nune’e hadomi significa SAI husi vínculo “hanoin an deit” (egoismo) hodi fo fatin mós ba ema seluk. Basá wainhira ita sai husi ita nia egoismo, halo ita hanoin mós existência ema seluk. Katak fora husi hau nia an existe mós ema seluk. Nune’e hadomi «la’os ona buka diak ba an rasik, maibe buka diak ba ema nebé ita hadomi. Ja não se busca a si próprio […] procura, ao invés, o bem do amado» (DCE, 6). Nune’e cuidado ema seluk hatudu hahalok ida husi hahalok lubuk ida domin nian.

 

Domin nudar laran-luak

Wainhira koalia konaba «domin» labele haluha «perdão». Basá sira rua habelun malu. Sé ita brani atu hadomi, ita mós sei pronto atu perdua. No plenitude domin nian mak perdão. Iha Salmo 50 dehan: «Haraik perdão mai hau, oh Maromak, basá Itabot laran-luak; iha Ita domin nebé bo’ot, hamós hau nia sala hotu» (v. 2). Maromak perdua basá Nia laran-luak. Iha cruz leten Jesus mós harohan: «Aman, perdua sira salan ba! Basá sira la hatene buat sá mak sira halo» (Lc 23, 34). Iha Lucas 15, 11-32, Jesus mós haktuir parábola Aman laran-luak. Aman nebé haksolok teb-tebes wainhira nia oan fila-fali mai uma (cfr. Lc 15,32). Maromak perdua tamba hadomi. Maromak hadomi tamba ne’e nia perdua. Papa Bento XVI dehan: «… tamba domin mak perdua. porque é amor que perdoa» (DCE, 10). Papa Francisco haklaken dehan: «Maromak la kole atu perdua, maibe ita mak kole atu husu Ninia laran-luak» (Evangelii Gaudium – EG, 3). Iha nebá (EG, 3), Papa Francisco cita Jesus nia resposta ba São Pedro. São Pedro nebé husu: «Nai, hau nia maun eh alin sala hasoru hau karik, hau sei perdua dala hira. Dala hitu? Jesus hatan: Hau la dehan ba ó katak dala hitu, maibe hitu-nulu dala hitu» (Mt 18, 21-22). Linguagem símbolica «hitu-nulu dala hitu» (70×7) la’os matemáticamente katak perdua dala «atus-ha’at resin sia-nulu (490)», maibe refere ba hahalok perdão «Para sempre». Perdua ba beibeik. Nanu’u domin ita simu husi Maromak, ita fahe ba ema seluk, nune’e mós perdão ita simu husi Maromak, ita fo mós ba ema seluk. Iha oração Ami Aman, ita reza: «Haraik perdão mai ami salan nudar ami perdua ema halo aat ami». Ita simu perdão nune’e ita mós sei fo perdão. Simu perdão mak experiência oinsa saborea Maromak ninia domin no momento oportuno atu fila-fali ba Maromak. Papa Francisco cita Oração Colecta (I Domingo Quaresma) hodi dehan Quaresma nudar «sinal sacramental ba ita ema ninia conversão» nebé haklaken no habiban ita atu fila-fali ba Nai ho fuan tomak no moris tomak» (haré Papa Francisco, Mensagem Quaresma 2018). Santo Padre husu ita atu atenção ho profeta falso. Sê mak profeta falso? Profeta falso tanesan ho Samea nebé habobar lia. Habobar ho lia bosok no haklaken domin falso. «Emoção humana nebé hakarak halo ema seluk sai ATAN, nune’e bele lori tuir sira nia hakarak» (paragrafo 4). Profeta falso tanesan mós ho Mau-bosok. Hirak nebé hafalun buat aat ho surat tahan nabilan. «Ema hirak nebé apresenta buat aat nudar diak no apresenta lia bosok nudar lialós hodi confunde ema nia fuan» (paragrafo 5). Hahalok profeta falso nian mak halo ema sai ATAN atu UZA ema seluk nudar instrumento. No saida mak Papa Francisco husu ita atu halo? Nia bolu ita atu hakonu kmanek Quaresma ho hahalok diak iha oração, esmola no jejum. Iha oração, Nia husu atu: «Buka consolação iha Maromak» (paragrafo 11). Iha Maromak mak ita hetan consolação lolós. Basá samea la oferece ai-moruk atu kura, maibe hetok habosok ita ho ai-moruk aat nune’e haterus liu tan ita no halo ita sai atan. Iha esmola, Papa Francisco dehan: «Hahalok fo esmola, halo ita livre husi ganância [ka’án ba osan] no halo ita descobre katak ema seluk mak hau nia maun-alin: nune’e buat nebé hau IHA laos hau nian deit» (paragrafo 12). Labele halo ema seluk nudar instrumento, maibe haré ema seluk nudar hau nia maun-alin (o outro é o nosso irmão paragrafo 12). Wainhira ita haré karik «ema seluk nudar hau nia maun-alin» significa ita fahe ba malu sasán hirak nebé hau IHA nudar sasin lolós kona ba moris comunhão iha Santa Kreda (partilhar com os outros os nossos bens, um testemunho concreto da comunhão que vivemos na Igreja – paragrafo 12). Iha jejum, Santo Padre hatete: «Hasai tiha ita nia kbi’it atu halo violência, halo’ot tiha arma sira funu nian, nune’e bele fo biban ba ita atu moris diak liu tan» (paragrafo 13). Hamós tiha hanoin a’at no hakribi tiha hahalok violência nian. Basá violência hamosu deit crueldade, tortura, castigo, oho nst… Violência hamosu funu; funu hamosu hamlaha, moras no mate… Violência la fo biban atu ita moris digno, dame no hadomi malu mak halo ita moris digno liu tan.

 

Hakotu Lia

Atu koalia konaba “domin” ita precisa tempo ruma atu explica. Atu hakerek konaba “domin” ita precisa surat tahan ruma atu descreve. Maibe atu HADOMI ita precisa moris tomak atu bele comprende. Basá domin bo’ot liu mak saran moris tomak ba ema nebé ita hadomi. Hahalok domin ne’e mak hau hakerek nudar título: «Domin no Hadomi. Hadomi ho Domin». Atu dehan katak: «Domin halo ita hadomi. Maibe ita sei hadomi ho domin lolós». Significa hadomi ho domin (eros) purificado; hadomi ho afeção (stroge) madura; hadomi ho domin amizade (philia) nebé honora verdade; hadomi ho domin (agape) nebé total no incondicional; hadomi ho domin (caridade) sem fingimento; hadomi ho domin (hakarak diak) ba saseluk. Hadomi ho domin (respeita) ema seluk; hadomi ho domin (responsabilidade) ba ema seluk; hadomi ho domin (perdua) ema seluk. Hadomi la’os atu hatudu ita nia kbi’it, maibe atu simu ema seluk ninia fraqueza. Nudar Jesus hatudu ona: Nia hadomi no perdua nafatin São Pedro, maske São Pedro pernah nega Nia. Jesus perdua no hadomi soldado sira, maske sira hakanek no halo a’at ba Nia… Hadomi tuir Jesus hadomi. Hadomi nanu’u Jesus hadomi. Basá Jesus hameno dehan: «Imi sei hadomi malu nudar hau hadomi ona imi» (Jo 15,12). (*Estudante Instituto Superior de Filosofia e de Teologia –ISFIT, Dom Jaime Garcia Goulart, Fatumeta, Dili. Oras ne’e hala’o estudo Teológico iha Pontificia Università Urbaniana –PUU, Roma).

 

Referências Bibliográficas:

«Amor» in José BETTENCOURT, Dicionário de Português-Tetum, Lidel, Lisboa 2015, 37; «Love» in Catharina WILLIAM e VAN KLIKEN, World-Finder. Inglesh-Tetun, Tetun-Ingles, Sentru Lingua Dili Institute of Technology, Dili 2008, 36.36.49; «Vangeli e Atti degli Apostoli. Interlineare greco, latino, italiano», in Marco ZAPPELLA (ed.), San Paolo, Milano 2014 (1991); ARISTOTELE, Etica Nicomachea, Testo grego a fronte, in Claudio MAZZARELLI (ed.), Bompiani Testo a Fronti, Milano 2015; BENTO XVI, Carta Encíclica Deus Caritas Est, (25 dezembro 2005); FRANCISCO, Exortação Apostólica Evangelii Gaudium, (24 novembro 2013); , «Porque se multiplicará a iniquidade, vai resfriar o amor de muitos (Mt 24, 12)» in https://w2.vatican.va/content/francesco/it/messages/lent.index.html, data accesso: 10 fevereiro 2018; GUSMÃO, Martinho G. da Silva, Hans-Georg Gadamer: Penggagas Filsafat Hermeneutik Modern yang Mengagungkan Tradisi, Kanisius, Yogyakarta 2013; LEWIS, Clive Staples, The Four Love, William Collings, London 2012 (1960); SCHINELLA, Ignazio, Eros e Agape nell’enciclica di Benedetto XVI Deus Caritas est, Editoriale progetto 2000, Consenza 2008; SRI, Edward, Man, Women and the Mystery of Love: Pratical Insight from John Paul II’s Love and Responsability, (revised and expanded), Servant Books, Cincinnati 2015; WEST, Christopher, Theology of the Body for the Beginners: A Basic Introduction to Pope John Paul II’s Sexuality, Ascension Press, West Chester 2009 (2004).

Leave a Reply

Your email address will not be published. Required fields are marked *