shadow
Diocese de Dili > NOTÍCIAS > LETURA DIÁRIA > Segunda, V Semana tempo Quaresma

Segunda, V Semana tempo Quaresma

ANO B

 Solenidade de São José, Esposo da Virgem Santa Maria

 

Primeira Leitura                                                                                                                                                                            2Sm. 7. 4-5a, 12-14ª, 16

Lia  housi segundo Livro Samuel nian :

Iha loron hirak neba, Na’i ko’alia ba profeta Natã, dehan: “Dehan ba Ha’u nia atan David: Nune’e Na’i dehan: ‘Wainhira to’o ona ó nia loron hasa’e-an hamutuk ho ó nia aman sira, sei hari-metin iha ó nia fatin, bei-oan ida, nebe sei moris housi ó atu hametin ó nia ukun liurai. Nia sei hari kadunan ida ba Ha’u nia naran. H’au sei hametin nafatin ninia biit-liurai”. Ha’u sei sai ba nia nu’udar Aman ida, nia ba Ha’u nu’udar oan ida. Ó nia uma no ukun-liurai sei hela nafatin iha Ha’u nia oin. Ó nia biit-liurai sei metin ba nafatin.

Maromak Futar Lia.

 

Salmo Responsorial                                                                                                                                                 Sal. 88(89). 2-3, 4-5, 27 e 29 (R. 37)

Refrão :  Nia bei-oan sira sei hela metin ba nafatin!!! Repete-se

Ha’u hananu ba nafatin Na’i nia laran luak’

No ba nafatin haklaken Nia laran metin.

Ita dehan: “Laran di’ak hari ona ba nafatin”,

No iha Lalehan hela ba nafatin

Ita nia laran metin. Refrão

 

Ha’u halo ona aliança ida nebe Ha’u hili.

Ha’u halo ona juramento ida ba David, Ha’u atan.

Ha’u sei tahan ó oan sira ba nafatin,

Sei hametin ó trono iha otas ba otas. Refrão

 

Nia sei harohan mai Ha’u: “Ita, Ha’u nia Aman,

Ha’u nia Maromak, ha’u nia maksoi”.

Ha’u sei ka’er metin nafatin ba Ha’u nia di’ak,

Ha’u nia aliança ho nia, sei la lakon. Refrão

 

Segunda Leitura                                                                                                                                                                                 Rom. 4. 13, 16-18, 22

Lia housi São Paulo nia surat ba sarani sira iha Roma :

Maun alin sira la’os housi ukun fuan mak Maromak hakotu lia ba Abraão no nia bei-oan sira katak nia sei simu mundo nu’udar lim-rohan, maibe housi justça nebe mai housi fiar. Tan ne’e, buat ne’e mosu housi fiar, atu nia bele sai presente ida, no promessa bele mosu duni ba nia bei-oan hotu, la’os deit ba sira nebe laran metin ba ukunfuan, maibe sira nebe la’o tuir fiar Abraão nian, ita hotu nia aman, nu’udar hakerek nanis: “Ha’u halo tiha ó sai aman ba nação barak”. Nia mak ita Nia Aman iha Maromak futar oin; iha nia mak Abraão fiar; nia mak ida nebe fó moris ba ema mate sira no bolu atu mosu buat nebe la iha. Abraão fiar, hodi hein maski laiha ona esperança. Katak nia sei sai ‘aman ba nação barak’ tuir buat nebe hetan nanis: ‘Nune’e ó nia bei-oan sira sei mosu mai’. Tan ne’e, mak buat ne’e ‘sura ba nia nu’udar justiça’.

Maromak Futar Lia

 

Aclamação                                                                                                                                                                                                           Sal. 83(84). 5

Refrão :  Hahi hanai ba Ita boot, Jesus Cristo, ami Na’in. Repete-se

                   Rahun di’ak ba sira nebe hôrik iha Ita uma,

                   Na’i, sira nebe hahi Ita loron kalan. Refrão

 

Evangelho                                                                                                                                                                                                Mt. 1. 16, 18-21, 24a

Na’i Jesus Cristo nia Evangelho tuir São Mateus Haktuir :

Iha tempo neba, Jacob hetan oan ida naran José, nebe káben ho Maria. Jesus, nebe ema hanaran Cristo moris housi Maria. Jesus Cristo moris nune’e: ema hakotu ona Maria, Jesus nia Inan ba José. Molok sira moris hamutuk, Maria kô’us tiha ona hodi Espírito Santo nia biit. Nia la’en, José, nebe ema laran lós no lakohi hamoe Maria, hakotu atu husik de’it nia. Nia hanoin daudaun nune’e, Na’i nia Anjo ida mosu ba nia iha mehi dehan: “José, David nia oan, keta ta’uk simu Maria nu’udar ó nia káben, basá nia kô’us hodi Espírito Santo nia biit. Maria sei tur ahi oan mane ida, ó sei hanaran nia ‘Jesus’, basá nia mak sei soi povo housi sira sala”. Hader housi mehi, José halo tuir buat nebe Na’i nia Anjo haruka hodi simu nia káben.

Lia maksoin.

 Ou

Evangelho                                                                                                                                                                                                              Lc. 2. 41-52a

 Na’i Jesus Cristo nia Evangelho tuir São Lucas Haktuir :

Iha tempo neba, tinan-tinan, Jesus nia inan aman sira ba Jerusalém ba festa Páscoa. Wainhira nia halo tinan sanulu resin rua, sira sa’e ba Jerusalém, tuir lisan festa nian. Festa hotu tiha, sira fila hikas ba uma, maibe labarik Jesus hela tiha iha Jerusalém; Nia aman sira la hatene. Sira hanoin katak Nia la’o ho maluk sira. La’o tiha loron ida, mak sira buka Nia iha parenti no maluk sira leet. Tan la hetan Nia, sira fila fali ba Jerusalém hodi buka Nia. Liu tiha loron tolu, sira hetan fali Nia iha templo, tur hela iha ema matenek sira leet, hodi rona no husu sira. Ema hotu nebe rona Nia, hakfodak ho Nia matenek no Nia liafuan.. Haré tiha Nia, nia aman sira hakfodak teb-tebes. Nia inan hateten ba Nia: “Ha’u Oan, tansá Ó halo nune’e mai ami? Ó nia aman ho ha’u neon susar teb-tebes hodi buka Ó”. Nia dehan ba sira: “Tansá imi buka Ha’u? imi la hatene katak Ha’u sei hela iha Ha’u Aman nia uma?”. Maibe sira la hatene lia hirak ne’e ba sira katak sá. Jesus tun fali hamutuk ho sira ba Nazaré, hodi halo tuir sira nia hakarak. Nia inan rai lia hirak ne’e hotu iha nia laran.

 Lia Maksoin.

Leave a Reply

Your email address will not be published. Required fields are marked *