shadow
Diocese de Dili > NOTÍCIAS > LETURA DIÁRIA > Segunda-Feira da Semana Santa

Segunda-Feira da Semana Santa

ANO B

 

Primeira Leitura                                                                                       Is. 42. 1-7

Lia  housi livro Isaías nian

Ha’u Nia atan mak ne’e, atan nebe Ha’u tahan, Ha’u fihir, Ha’u hadomi, Ha’u tau laran ba nia atu nia bele tesi lialós ba povo tomak. Nia sei la hakilar, la foti lian resin; nia lian sei la rona iha luron. Fafulu nakfera ona, nia sei la kona; ahi-oan suar, nia sei la huu mate. Nia sei haklaken lolós justiça, nia barani nafatin, sei aten-boot beibeik, to’o ema hotu iha rai-klaran hetan justiça, basá ema sira iha tasi balu mós titu nia doutrina. Nune’e, Na’i maromak, nebe halo tiha lalehan no halekar tiha nia, atu hametin rai-klaran ho nia ai-horis sira, nebe fó iis ba nia povo sira no iis moris nian ba sira nebe la’o iha nia. Ha’u ó nia Na’in, mak bolu ó atu tuir justiça; Ha’u sée Ha’u liman ba ó, fó matenek ba ó atu ó bele halibur no fó roman ba ema tomak. Ha’u fihir ó atu halo matan delek sira bele haré, atu hasai dadur sira housi kadeia no fó roman ba sira be moris iha nakukun.

Maromak Futar Lia.

 

Salmo Responsorial                                                                                                                                                            Sal. 26(27). 1, 2, 3, 13-14 (1a)

Refrão : Na’i mak ha’u roman no maksoin!!! Repete-se

 

Na’i mak ha’u roman no maksoin,

Ha’u ta’uk fali sé?

Na’I tahan ha’u moris,

Sé bele halo ha’u nakdedar. Refrão

 

Wainhira ema laran áat sira duni ha’u,

Atu han mohu ha’u isin,

Sira mak ha’u funu baluk no tali sorin,

Nebe la’o sala dalan no monu. Refrão

 

Funu-na’in sira mai hale’u ha’u karik,

Ha’u laran sei la nakdedar.

Sira hafunu hasouro ha’u karik,

Maski nune’e, ha’u sei laran metin. Refrão

 

Ha’u hein atu haré Na’i Nia laran-luak

Iha ema moris sira rain.

Aten brani! Hein laran metin iha Na’i

Aten boot, hein Maromak. Refrão

 

Aclamação                                                                                         

Refrão : Hahí no glória ba Ita, Na’i Jesus Cristo!!! Repete-se

                  Tabe! Na’i ami liurai. Ita de’it mak laran luak sadi’a ami salan. Refrão

 

Evangelho                                                                                                                                                                                                                  Jo. 12. 1-11

+ Na’i Jesus Cristo nia Evangelho tuir São João

Hela loron nen atu to’o Páscoa, Jesus be Betânia, iha nebe iha Lázaro, nebe nia halo moris hi’as tiha housi mate sia leet. Sira fó tiha han kalan nian ba Nia. Marta mak serbi no Lázaro mós ho sira nebe tur hamutuk ho Jesus iha mesa. Maria lori mina morin libra ida nian, ai-morin lolós be folin boot, hamina tiha Jesus nia ain no hamaran tiha ho nia fúuk. Uma laran tomak sai morin tiha. Tan ne’e, Judas Iscariotes, escolante sira ida, nebe sei saran Jesus ba mate, dehan: “Tan sá mak la faan tiha mina morin ne’e ba osan denário atus tolu hosi fó ba ema kiak sira?” Nia ko’alia hanesan ne’e, la’os tan nia hanoin ema kiak sira, maibe, tan nia ema na’okteen, basá nia lori hela bornal hodi hasai buat nebe ema hatama ba. Jesus hatan ba nia: “Husik nia ba, basá nia hakarak rai mina morin, hodi hanoin iha loron ema hakoi Ha’u. kiak sira sei hamutuk nafatin ho imi; kona ba Ha’u, imi sei la hetan Ha’u nafatin”. Ema judeu lubun boot hatene katak Jesus iha neba; tan ne’e sira ba, la’os de’it tan Jesus, maiba sira hakarak mós atu haré Lázaro nebe Nia halo moris hi’as housi mate sira leet. Tan ne’e, duni, sacerdeote ulun sira futu lia tu oho mós Lázaro, basá, tan nia, ema judeu wa’in hadook-an tiha housi sira hodi fiar iha Jesus.

Lia maksoyn.

Leave a Reply

Your email address will not be published. Required fields are marked *