shadow
Diocese de Dili > NOTÍCIAS > REFLEXÃO > LEITURA NO REFLEXÃO DOMINGO DA RESSUREIÇÃO

LEITURA NO REFLEXÃO DOMINGO DA RESSUREIÇÃO

ANO B

 

Primeira Leitura                                                                                 Act. 10, 34-43

Lia housi Livro haktuir Apóstolo sira nia hahalok:

Iha loron hirak nebá,  Pedro hamríik, ko’alia nune’e: “Liu tiha João Baptista nia Baptismo imi hatene ona sá lós mak mosu iha rai  Judeia tomak, hahú housi Galileia: Maromak halo Espírito Santo tun ba Jesus Nazaré hodi haraik kbiit wa’in ba Nia. Jesus Nazaré la’o lemo rai hodi halo di’ak no fó matenek oi-oin ba ema hotu-hotu nebé moris hela iha diabo nia liman tan Nia ho Maromak la’o hamutuk. Ami hirak ne’e, Jesus Nazaré nia sasin: Ami fó lia sasin kona ba Jesus Nazaré Nia hahalok iha rai Judeia, iha Jerusalém. Ami fó lia sasin katak ema sira hedi mate Nia iha Krus. Maibé, Maromak haraik ba Nia moris hias, liu de’it loron tolu. Maromak haraik mos, Nia atu mosu, laós ba ema tomak, maibé ba sasin sira nebé Maromak fihir kedas houri uluk, katak mosu de’it mai ami, ami nebé han-hemu hamutuk ho Nia, wainhira Nia moris hias tiha fali. Jesus haruka ami hanourin lia-foun ba povo; Nia haruka mos ami, atu fó hatene katak Maromak foti duni Nia, nu’udar ema mate no ema moris sira nia Juíz. Lia hotu nebé Profeta sira fó hatene sai kona ba Jesus mak ida ne’e: Tan Jesus nia naran, ema hotu-hotu nebé fiar Nia, hetan duni perdua ba sira nia salan.”    

Maromak Futar Lia.

 

Salmo Responsorial                                                                                                                                                   Sal. 117 (118), 1-2. 16ab-17. 22-23

Refrão : Loron ida ne’e Maromak fó tulun, mai hawelok haksolok!!! Repete-se

Hana’i Maromak tan Nia di’ak!

tan Nia laran luak ba nafatin.

Israel nia uma laran bele dehan,

Nia laran luak ba nafatin. Refrão

 

Na’i nia liman halo buat kmanek,

Na’i nia liman kmanek tebes.

Sei la mate maibé sei moris,

atu haklaken Na’i nia hahalok. Refrão

 

Fatuk ida be badaén sira hewai,

nakfilak ba fatuk inan.

Buat ne’e hotu mai housi Maromak,

kmanek oi-oin mosu iha ita oin! Refrão

 

Segunda Leitura                                                                                                                                                                                                       Col. 3, 1-4

Lia housi S. Paulo nia surat ba sarani sira iha Colosso :

Maun-alin sira: Imi moris hias ona ho Cristo! Tan ne’e, imi sei tau de’it matan ba sasán leten nian. Iha lalehan, Cristo moris, tur iha Maromak sorin kuanan. Imi nia laran sei monu de’it ba lalehan nia di’ak; keta hadomi sasán rai-klaran ida ne’e nian. Imi nia moris subar hela iha Maromak, hamutuk ho Cristo, tan imi mate tiha ona ho Cristo. Wainhira Cristo hiit-An mai hikas, imi nia moris sei sai kmanek lolós, nu’udar Cristo Ninian, tan Cristo, imi nia moris hun.

Maromak Futar Lia.

 

Aclamação                                                                                                                                                                                                         1 Cor. 5, 7b-8ª 

Refrão : Aleluia!!! Repete-se

                  Cristo, ita nia Páscoa, hasa’e ona;

                  Haksolok hahí ita Na’i nia fatin! Refrão

 

Evangelho                                                                                                                                                                                                                  Jo. 20, 1-9

Na’i Jesus Cristo nia Evangelho  nu’udar São João haktuir :

Iha loron uluk semana nian, dadersan de’it, rai sei nakukun hela, Maria Madalena ba to’o rate. Nia haré fatuk boot iha rate nia oin duka hela ba sorin. Tan ne’e, nia halai fila hikas ba hasouru Simão Pedro ho Apóstolo ida seluk nebé Jesus hadomi. Nia dehan ba sira na’in rua: “Ema lori tiha ona Na’i housi rate! La hatene sira tau lós Nia iha nebé!” Pedro ho Apóstolo ida seluk, hamríik ba kedas rate. Sira na’in rua halai hamutuk, maibé Apóstolo ida seluk lais liu Pedro, hodi to’o uluk rate. Nia hakruuk hateke ba laran, hodi haré hena sira namkari iha rai, maibé nia la tama. Simão Pedro mos to’o daudaun. Nia tama ba rate laran hodi haré hena sira namkari iha rai; Nia haré hena mutin nebé hodi falun Jesus nia ulun, la sóe iha rai ho hena seluk, maibé lulun iha fatin seluk. Hafoin, tama mos Apóstolo ida seluk nebé to’o uluk. Nia haré ho matan hodi fiar duni! Tebes, sira neon ladauk nakloke ba lia Escritura nian. Tuir Escritura, Jesus sei moris hias duni housi mate.

Lia Maksoyn.

 

Hanoin kona ba ó rasik nia fiar : 

Páskua selebrasaun boot, tinan nia laran ba Uma Kreda nian. Ita sempre selebra, tanbá Jesus moris hi’as no hela ho ita.  Hosi Nia mate no moris hi’as ita simu moris  foun. Ne’e Lia Foun di’ak nebé konvida ita atu hatudu novidade ne’e ba ema seluk sira. Atu halekar ksolok, hadi’ak no iha esperansa ba sira tomak nebé ita hasoru atu sira mós bele hatene no fiar iha Jesus.  Leitura sira ne’e halo ó sente nusá?  Ó hanesan ho Maria, Pedru ka João?  Maria fiar bainhira nia haree rate mamuk?  Nia identifika Jesus bainhira nia haree Jesus moris hi’as?  Disípulu sira fiar Maria eh sira tenke haree ho matan rasik? Ó identifika Jesus nia moris hi’as? Halo nusá mak ó hatudu Lia Foun ba ema seluk sira?  

 

EVANGELHO – Jo 20,1-9 

Iha primeira parte Evangelho dahaat nian (kf. Jo 4,1-19,42), João haktuir atividade Mesias nian atu hakiak no habiit (no pasu ikus atu halo ida-ne’e mak mate iha Krus – lisaun saran an totál nian); iha segunda parte (kf. Jo 20,1-31), João aprezenta rezultadu husi Jesus nia asaun: komunidade Ema Foun sira-nian, Nia rasik mak kria no habiit no husi Nia sira aprende atu hadomi ho radikalidade. Ne’e mak komunidade mane no feto sira ne’ebé konverte no adere ba Jesus, loron ba loron – maski iha rate mamuk nia oin – sira hetan konvite atu hatudu sirania fiar iha Nia.

 

MENSAGEM 

estu hahú ho indikasaun ida ne’ebé parese kronolójika, maibé lolós tenke komprende liuliu iha xave teolójika: “iha loron uluk semana nian”. Signifika katak hahú siklu foun – ida kriasaun foun nian, ida Páscoa definitiva nian. Iha ne’e hahú tempu foun, tempu ema foun, ne’ebé moris husi Jesus nia saran an. Maria Madalena reprezenta komunidade foun ne’ebé moris husi asaun atu kria no habiit Mesias nian; komunidade foun ne’e, sasin Crus nian, fofoun fiar katak mate mak manán, no buka Jesus iha rate. Maibé iha rate mamuk nia oin, eskolante loos deskobre katak Jesus moris. Iha figura rua eskolante nian ne’ebé halai ba rate, hodi hatudu adezaun ba Jesus no interese ba notísia rate mamuk: Simão Pedro no “eskolante seluk”, ne’ebé bele identifika ho “eskolante ne’ebé Jesus hadomi”. João hatuur figura rua ne’e ida iha ida seluk nia sorin iha sirkunstánsia oioin (iha han-kalan ikus, nia mak komprende sé mak hamutuk ho Jesus no sé mak atu faan Nia – kf. Jo 13,23-25; iha paixaun, nia mak konsege hela besik Jesus iha amlulik boot nia pátiu, enkuantu Pedro nega Nia – kf. Jo 18,15-18.25-27; nia mak besik iha krús bainhira Jesus mate – kf. Jo 19,25-27; nia mak rekoñese Jesus moris-hi’as iha lalatak ne’ebé hatudu an ba eskolante sira iha tasi Tiberíades nian – kf. Jo 21,7). Dala ruma “eskolante ne’ebé Jesus hadomi” iha vantajen liu Pedro. Iha-ne’e ita haree buat ne’e dala ida tan: “eskolante ida fali” halai lalais liu Pedro no to’o uluk rate (hodi dehan katak nia la tama uluk, bele signifika ninia respeitu no domin, mai husi ninia sintonia ho Jesus); no, haree tiha, nia “fiar” (buat hanesan la hateten kona-ba Pedro). Provavelmente, autór Evangelho Dahaat nian hakarak haktuir, liuhusi figura rua ne’e, impaktu ne’ebé Jesus nia mate fó ba eskolante sira no dispozisaun oioin entre membru sira komunidade sarani nian. Ho modu jerál, Pedro reprezenta, iha evanjellu sira, eskolante uluntoos, ne’ebé hanoin katak mate signifika frakasu no lakohi simu katak moris foun tenke liu husi krús (Jo 13,6-8.36-38; 18,16.17.18.25-27; kf. Mc 8,32-33; Mt 16,22-23); nia kontráriu, “eskolante seluk” mak ”eskolante ne’ebé Na’i hadomi”, mak ida ne’ebé besik nafatin Jesus, halo esperiénsia kona-ba Jesus nia domin; tan ne’e, nia halai ba hasoru ho forma desidida no “komprende” – tanba ema ne’ebé hadomi maka’as de’it mak komprende buat ruma ne’ebé ema seluk la komprende – katak mate la hakotu moris. “Eskolante seluk” ne’e mak ilas eskolante ideál, ne’ebé halai ba hasoru Na’i ho empeñu totál, ne’ebé komprende sinál sira no deskobre katak Jesus moris. Nia mak paradigma “ema foun”. 

Leave a Reply

Your email address will not be published. Required fields are marked *