shadow
Diocese de Dili > NOTÍCIAS > LETURA DIÁRIA > Sexta-Feira da Oitava da Páscoa

Sexta-Feira da Oitava da Páscoa

ANO B

 

Primeira Leitura                                                                                      Act. 4. 1-12

Lia  housi livro Apóstolo sira nia hahalok

Iha loron hirak neba, liu tiha ema bé moras housi hun mai ne’e hetan isin di’ak, Pedro ho João ko’alia ba povo, wainhira amululik sira, ulun templo nian no ema saduceu sira mosu iha sira oin. Sira hatudu oin maka’as tan sira hanourin no haklaken Jesus nia moris hi’as housi mate ba povo. Sira káer Apóstolo sira; hatama sira iha kadeia ba to’o loron be tuir, basá, loraik ona. Maibé, ema barak nebé rona Maromak Nia Liafuan, sira simu kedas fiar. Sira ne’e, mane de’it, iha rihun lima.

Iha loron tuir mai, povo nia ulun sira, katuas no escriba sira halibur malu iha Jeruslém, ho sacerdote ulun Anás ho Caifás, hamutuk João ho Alexandre no sira hotu nebé kona ba sacerdote ulun sira nia familia. Haruka bolu Apóstolo sira mai iha sira oin hodi hahu husu ba sira: “Hodi sá kbiit eh hodi sé nia naran mak imi halo buat hira ne’e?” Nune’e, Pedro, nakonu ho Espírito Santo hatan ba sira: “Povo nia ulun no katuas sira, tan imi husu mai ami kona ba kmanek nebé ema moras ne’e hetan no oinsá nia hetan isin di’ak, imi hotu bele hatene, nune’e mós povo Israel tomak, hodi Jesus Cristo Nazaré nian, nebé imi hedi iha Cruz no Maromak halo Nia moris hi’as housi mate, housi Nia naran mak ema nebé iha imi nia oin, hetan isin di’ak lolós. Jesus mak fatuk nebé imi hewai, imi be hari uma, nebé tuir mai sai tiha fatuk inan. Nune’e la iha dalan seluk ba maksoyn basá la iha naran seluk ida iha lalehan nia okos atu fó ba ema, housi ida nebé ami bele soi ami-an”.

Maromak Futar Lia.

 

Salmo Responsorial                                                                                                                                       Sal. 117(118). 1-2, 4, 22-24, 25-27ª (R.22)

Refrão : Fatuk nebé bada’en sira hewai, nakfila ba fatuk inan!!! Repete-se

Ou           Aleluia!

 

Hana’i Maromak tan Nia di’ak,

Tan Nia laran diak ba nafatin!

Israel nia uma laran bele dehan:

‘Nia laran luak ba nafatin’.

Sira  be hamta’uk Na’ bele dehan:

‘Nia laran-luak ba nafatin’. Refrão

 

Fatuk nebé bada’en sira hewai,

Nakfila tiha ba fatuk inan.

Buat ne’e hotu mai housi Na’i,

Kmanek oi-oin mosu iha ita oin.

Ne’e mak loron be Na’i halo;

Ita haksolok no hananu iha loron ne’e. Refrão

 

Na’i, haraik maksoyn mai ami,

Haraik rahun di’ak mai ami.

Rahun di’ak ba ida be mai hodi Na’i nia naran;

Housi Maromak Nia uma, ami haraik bensa ba nia.

Na’i mak ami Maromak,

Na’i haraik Nia roman mai ami. Refrão

 

Aclamação                                                                                                                                                                                                      Sal. 117(118). 24

Refrão : Aleluia, Aleluia!!! Repete-se

                  Ida ne’e mak loron be Na’i halo;

                  Ita haksolok hananu iha loron ne’e. Refrão

 

Evangelho                                                                                                                                                                                                                 Jo. 21. 1-14

+ Na’i Jesus Cristo nia Evangelho nu’udar São João haktuir

Iha tempo nebá, Jesus mosu dala ida tan ba escolante sira besik Tiberíades. Nia mosu nune’e: Tomé, ida be ema hanaran Dídimo, ho tan Natanael, ema housi Caná Galileia nian, sira hôrik hamutuk ho Simão Pedro. Iha mós neba Zebedeu nia oan sira, ho tan Jesus nia escolante na’in rua. Simão Pedro hateten ba sira: “Ha’u ba tiha ikan”. Sira hatan: “Ami ba hotu!” Nune’e, sira sai housi uma ba sa’e ró, maibé, iha kalan ne’e, sira la hetan buat ida.

Besik rai naroman, Jesus mosu ba sira iha tasi ibun; maibé nia escolante sira la hatene. Jesus dehan ba sira: “Labarik sira, iha buat ruma atu han”? Sira hatan: “La iha liu”. Jesus hateten fali ba sira: “Im so’e dai; hafoin sira dada mai susar teb-tebes, tan ikan nakonu resin. Haré ida ne’e, escolante nebé Jesus hadomi liu dehan ba Pedro: “Na’i mak neba”. Rona katak Na’i mak neba, Simão Pedro hatais tiha, basá nia isin tanan; hafoin nia haksoit kedas ba tasi. Escolante sira seluk dook housi tasi la to metro atus ida; Sira hean ró mai tasi ibun hodi dada dai ho ikan.

Tun tiha ba rai, sira haré ahi-klak balu ho ikan iha leten ho tan pão. Jesus hateten ba sira; “Imi lori ikan sira imi foin káer ne’e mai”. Simão Pedro sa’e ba ró, hodi dada dai mai rai ho ikan nakonu; ikan boot de’it besik atus ida limanulu resin tolu. Maski ikan barak, dai la nakles. Jesus hateten ba sira: “Imi mai han ona”. Escolante sira ida mós la hanoin atu husu: “Ita sé?” Tan sira hatene katak ema ne’e Jesus duni. Jesus besik ba sira, kaér pão ho ikan fó ba sira. Ne’e, dala tolu ona mak Jesus mosu ba nia escolante sira, liu tiha nia moris hi’as housi mate.

Lia maksoyn.

Leave a Reply

Your email address will not be published. Required fields are marked *