shadow
Diocese de Dili > NOTÍCIAS > LETURA DIÁRIA > Terça-Feira da oitava da Páscoa

Terça-Feira da oitava da Páscoa

ANO B

 

Primeira Leitura                                                                                    Act. 2. 36-41

Lia  housi livro Apóstolo sira nia hahalok

Iha loron Pentecostes, Pedro dehan ba judeu sira: “Israel nia uma laran tomak hatene lolós ne’e: “Maromak halo Jesus nebé imi hedi ba Cruz sai nu’udar Na’i no Messias”.

Rona tiha lia hirak ne’e, sira nia laran hakfodak hodi husu ba Pedro no ba Apóstolo sira seluk: “Maun sira, ami sei halo lós sá?” Pedro simu ba sira: “Hakribi imi nia salan; ida-idak simu baptismo hodi Jesus Cristo nia naran atu bele hetan perdua ba imi nia salan. Hafoin, imi sei simu Espírito Santo nia biit; Cristo hameno biit ida ne’e ba imi, ba imi nia oan sira no mós ba sira hotu nebé ita nia Maromak bolu housi dook”. Ho liafuan wa’in liu tan, Pedro hanourin sira hodi fó laran kmaan ba sira. Nia dehan teni: “Buka sai housi moris áat ida ne’e”. sira simu Pedro nia liafuan hodi simu baptism. Iha loron nebá, ema besik rihun tolu simu baptismo.

Maromak Futar Lia.

 

Salmo Responsorial                                                                                                                                              Sal. 32(33). 4-5, 18-19, 20, 22 (R. 5b)

Refrão : Na’i Nia laran-luak nakonu iha rai!!! Repete-se

Ou           Aleluia!

 

Na’i nia liafuan lós tebes,

Bele laran metin iha Nia liman nia hahalok sira.

Na’i hadomi justiça no dalan lós;

Na’i nia domin naburas iha rai. Refrão

 

Na’i tau matan ba sarani sira,

Ba sira nebé hein Nia;

Atu hasai sira housi mate,

Hodi fó moris iha susar laran. Refrão

 

Ami nia espírito hein Na’i;

Nia mak tahan ami no ami tulun.

Ita graça tun iha ami leten;

Na’i, nune’e mak ami hein Ita. Refrão

 

Aclamação                                                                                                                                                                                                                Sal. 117. 24

Refrão : Aleluia, Aleluia!!! Repete-se

                  Ida ne’e mak loron be Na’i halo;

                  Ita haksolok hananu iha loron ne’e. Refrão

 

Evangelho                                                                                                                                                                                                              Jo. 20. 11-18

+ Na’i Jesus Cristo nia Evangelho nu’udar São João haktuir

Iha tempo nebá, Maria Magdalena fali hamriik besik rate iha liur hodi tanis. Nia sei tanis hela, nia hakru’uk hodi hateke ba rate laran. Nia haré Anjo na’in rua hatais mutin tur iha fatin nebé sira tau Jesus nia isin, ida iha ulun, iha ain. Sira dehan: “Feto, tansá ó tanis?” Nia hatan ba sira: “Basá ema lori tiha ha’u nia Na’i no ha’u la hatene sira tau Nia iha nebé?”. Dehan tiha liafuan hirak ne’e, nia fila kotuk hodi haré Jesus hamriik iha nebá, maibé nia la hatene katak ne’e Jesus. Jesus dehan ba nia, “Feto, tansá ó tanis? Ó buka sé?” Hanoin katak nia mak to’os na’in, Maria husu fali: “Na’i, ita lori Nia karik, hateten to’ok mai ha’u, ita tau Nia iha nebé atu ha’u bele ba lori Nia”. Jesus dehan: “Maria!” Nia fila hodi dehan ba Jesus iha lia Hebreu: “Rabuni!” katak ‘Mestre’. Jesus dehan ba nia: “Keta káer Ha’u, tan Ha’u seidauk sa’e ba Aman. Maibé, ba hasouru Ha’u nia maun-alin sira hodi dehan ba sira: Ha’u sa’e ba Ha’u nia Aman no imi nia Aman; ba Ha’u nia Maromak no imi nia Maromak”. Ne’e duni, Maria Magdalena ba hateten ba escolante sira: “Ha’u haré ona Na’i;” no nia hateten ba sira katak Nia dehan buat sira katak Nia dehan buat sira ne’e ba nia.

Lia maksoyn.

Leave a Reply

Your email address will not be published. Required fields are marked *