shadow
Diocese de Dili > NOTÍCIAS > LETURA DIÁRIA > Quarta-Feira, III Semana da Páscoa

Quarta-Feira, III Semana da Páscoa

ANO B

 

Primeira Leitura                                                                                Act. 8. 1-8. (1b-8)

Lia housi Livro Apóstolo sira nia hahalok

Iha loron hira neba, Kreda be iha Jerusalém hahu terus wa’in; ema duni hodi buka atu halo áat ba nia. Apóstolo sira de’it mak hela, maibé ema sira hotu la’o namkari iha rai Judeia no Samaria tomak.

Ema sarani di’ak balu hakoi tiha Estêvão nia isin, tani tan hanoin nia. Saulo fali, hahu buka halakon Kreda; tama sai uma ba uma hodi káer ema mane no feto hodi ba hatama iha kadeia.

Sarani sira nebé la’o namkari ba rai-rai, hahu haklaken Na’i nia doutrina. Filipe ba iha cidade ida iha Samaria nian hodi haklaken Messias iha neba. Ema lubun boot lós ho hanoin ida de’it, simu Filipe nia hanourin, wainhira rona no haré Filipe halo milagre. Tebes duni, ema barak nebé iha demónio, wainhira demónio sai housi sira isin, sira hakilar maka’as no mós ema moras barak, la’o la di’ak no ain áat, sira hotu hetan fali isin di’ak. Nune’e, ema tomak iha kadeia ne’e hetan ksolok.

Maromak Futar Lia.

 

Salmo Responsorial                                                                                                                                                     Sal. 65(66). 1-3ª, 4-5, 6-7ª, (R. 1)

Refrão : Rai-klaran tomak hahi Na’i!!! Repete-se

Ou             Aleluia!

 

Rai-klaran tomak hahi Na’i!

Hananu Nia naran kmanek,

Hawélok ho ksolok ba Na’i!

Imi dehan ba Na’i:

‘Ita hahalok sira kmanek wa’in tebes!’. Refrão

 

Rai hotu hakru’uk iha ita oin,

Nia hananu Ita naran.

Mai hotu no haré buat be Maromak halo,

Nia hahalok kmanek wa’in tebes ba ema. Refrão

 

Halo tasi nakfila ba rai isin,

Hamaran mota atu ema bele liu.

Mai ita haksolok iha Maromak;

Nia ukun ho kbiit rohan laek. Refrão

 

Aclamação                                                                                                                                                                                                                       Jo. 6. 40

Refrão : Aleluia, Aleluia!!! Repete-se

                  Na’i lia tun, “Ida ne’e mak Ha’u Aman Nia hakaran:

                  Ema hotu nebé fiar iha Maromak Oan, bele hetan moris rohan laek.

                  Ha’u sei halo nia moris hi’as iha loron ikus. Refrão

 

Evangelho                                                                                                                                                                                                                 Jo. 6. 35-40

+ Na’i Jesus Cristo Nia Evangelho nudar São João haktuir

Iha tempo neba, Jesus lia tun ba ema lubun wa’in: “Ha’u mak Ai-han moris nian; ema nebé hakbesik mai Ha’u, nia sei la hamlaha tan; ema nebé fiar Ha’u, nia sei la hamrook tan. Nune’e mós Ha’u dehan lós ba imi: ‘Maski imi haré Ha’u, imi la fiar. Buat hotu nebé Ha’u Aman haraik mai Ha’u, sei mai iha Ha’u; nebé mai iha Ha’u, Ha’u sei la hewai nia, tan Ha’u mai housi Lalehan la’os atu halo tuir Ha’u Nia hakaran maibé atu halo tuir Ida be haruka Ha’u mai ne’e Nia hakaran. Ida nebé haruka Ha’u mai Nia hakaran mak ne’e: Atu Ha’u la bele lakon sira nebé Nia haraik mai Ha’u, maibé atu hamoris hi’as iha loron ikus. Ne’e mak Ha’u Aman Nia hakaran: Ema hotu nebé haré Oan Mane Maksoyn hodi fiar iha Nia, bele hetan moris rohan laek. Ha’u sei halo nia moris hi’as iha loron ikus”.

Lia Maksoyn.

Leave a Reply

Your email address will not be published. Required fields are marked *