shadow
Diocese de Dili > NOTÍCIAS > LETURA DIÁRIA > Quinta-Feira, III Semana da Páscoa

Quinta-Feira, III Semana da Páscoa

ANO B

 

Primeira Leitura                                                                               Act. 8. 1-8. (1b-8)

Lia housi Livro Apóstolo sira nia hahalok

Iha loron hira neba, Na’i nia Anjo dehan ba diácono Filipe: “Ó sai hodi la’o ba Tasi-mane, tun tuir luron ba Jerusalém, liu ba iha Gaza; Iha neba iha rai ida sei fuik hela”. Nia sai kedas hodi ba lós iha neba. Hafoin, mosu mai, ema eunuco ida, housi Etiópia, empregado boot housi Candace, liurai feto Etiópia nian no mós empregado riku-soi rai ne’e nian. Nia ba halo adoração iha Jerusalém; fila housi neba, tuir dalan, tur iha nia kareta laran, Nia lê daudaun lia housi profeta Isaías. Espírito Santo fó hanoin ba Filipe: “Ó la’o ba oin hodi hakbesik ba kareta ne’e”. Filipe ba besik, nia rona ema ne’e lê hela sagrada Escritura kona ba profeta Isaías; nia  husu ba ema Etiópia ne’e: “Ó hatene buat ruma kona ba buat nebé ó lê?” Nia hatan ba Filipe: “Oinsá ha’u bele hatene, la iha karik ema ida atu hanourin buat ne’e mai ha’u?” Hafoin nia bolu tiha Filipe hodi sa’e ba kareta no tur hamutuk tiha ho nia. Passagem Escritura nian nebé nia lê mak ne’e:

“Ha’u hanesan bibi-malae, ema lori atu ba oho, hanesan bibi oan lian laek; wainhira ema tesi nia fulun, nia la loke nia ibun. Ema hamoe nia no la halo ba nia tuir justiça. Sé mak sei bele haktuir nia descendência? Tanba nia moris, ema hakotu tiha housi rai!”

Empregado boot ne’e husu ba Filipe: “Favor, hateten mai, profeta ne’e ko’alia kona ba sé lós? Kona ba ni-an eh kona ba ema seluk?” Tan ne’e, Filipe hahu ko’alia, housi passagem Escritura nian ne’e hodi haklaken Jesus ba nia. Sira la’o daudaun tuir luron, wainhira sira haré wé boot ida, ema eunuco ne’e dehan: “Wé mak neba! Sá mak hakaik netik ha’u atu la bele simu baptismo?” Nia haruka para kareta. Filipe ha eunuco ne’e sira rua tun ba wé, hafoin, Filipe sarani tiha nia. Wainhira sira sai housi wé, Na’i nia Espírito taka netik Filipe, nune’e, eunucu la haré hetan nia: nia tuir nia dalan ho ksolok wa’in tebes. Filipe hela iha cidade Azoto, hahu la’o ba rai hot-hotu hodi haklaken Lia-Foun ba ema hot-hotu iha cidade sira, hodi ba to’o iha Cesareia.

Maromak Futar Lia.

 

Salmo Responsorial                                                                                                                                                       Sal. 65(66). 8-9, 16-17, 20, (R. 1)

Refrão : Rai-klaran tomak hahi Na’i!!! Repete-se

Ou            Aleluia!

 

Povo tomak, mai, ita hahí ita Maromak!

Ita hotu hananu Nia glória!

Na’i mak lori ita ba moris rohan laek;

Nia la husik ita monu ba sala. Refrão

 

Mai rona, imi be Maromak Nia belun sira;

Ba imi ha’u sei haktuir,

Buat di’ak nebé Na’i halo mai ha’u.

Ha’u nia ibun hahí Nia,

Ha’u nia nanal hananu Nia glória. Refrão

 

Rahun di’ak ba Na’i,

Basá la hewai ha’u nia harohan;

Na’i tulun nafatin ha’u. Refrão

 

Aclamação                                                                                                                                                                                                                      Jo. 6. 51

Refrão : Aleluia, Aleluia!!! Repete-se

                  Na’i lia tun, “Ha’u mak pão moris tun housi Lalehan mai.

                  Ema sé han pão ne’e, nia sei moris ba nafatin”. Refrão

 

Evangelho                                                                                                                                                                                                                Jo. 6. 44-51

+ Na’i Jesus Cristo Nia Evangelho nudar São João haktuir

Iha tempo neba, Jesus lia tun ba ema lubun wa’in: “Ha’u Aman nebé haruka Ha’u mai, la dada karik, ema ida la bele hakbesik mai ha’u; Ha’u sei halo nia moris hi’as iha loron ikus. Profeta sira hakerek nanis ona, dehan: ‘Maromak rasik sei hanourin ema hotu’. Ema hotu nebé fó laran ba Aman Maromak no rona Nia hanourin, ema ne’e mak hakbesik mai Ha’u. Ne’e la’os katak ema ruma haré ona Aman Maromak; ema nebé Maromak haruka mai, mak haré Aman Maromak. Ha’u dehan tebes ba imi: Ema nebé fiar, ema ne’e hetan duni moris rohan laek. Ha’u mak Ai-han moris nian. Iha rai-fuik-maran, imi bei-ala sira han maná; sira mate hotu ona. Maibé, aihan tun mai housi Lalehan mak ida ne’e. Ema nebé han aihan ne’e, nia sei la mate. Ha’u rasik mak Ai-han moris nian tun mai housi Lalehan. Ema nebé han Ai-han ne’e, nia sei moris ba nafatin. Ai-han Ha’u atu fó mak Ha’u Nia isin, saran ba rai-klaran nia moris.

Lia Maksoyn.

Leave a Reply

Your email address will not be published. Required fields are marked *