shadow
Diocese de Dili > NOTÍCIAS > LETURA DIÁRIA > Segunda-Feira, IV Semana da Páscoa

Segunda-Feira, IV Semana da Páscoa

ANO B

 

Primeira Leitura                                                                                      Act. 11. 1-18

Lia  housi livro Apóstolo sira nia hahalok

Iha loron hirak neba, Na’i nia escolante no maun-alin sira housi Judeia rona dehan katak ema gentio sira mós simu Na’i Maromak Nia futar lia. Wainhira Pedro sa’e ba Jerusalém, maun-alin sira nebé simu ona circuncisão, haksesuk malu ho nia dehan: “Ó ba ema sira nebé seida’uk simu circuncisão ne’e nia uma hodi han ho sira”. Pedro hahu dehan lolós ba sira atu sira bele hatene di’ak liu tan buat hotu: “Wainhira ha’u halo hela oração iha rai Jope, housi mehi ida, ha’u haré buat ida hanesan hena-mesa tun housi Lalehan mai; metin hela housi lidun háat, mai to’o iha ha’u nia oin. Fihir didiak tiha nia, ha’u haré balada sira ain háat, balada siak-ten sira, samea no manu sira nebé semo iha áas. Tuir mai, ha’u rona lian ida be dehan mai ha’u: ‘Hamriik ba, Pedro; oho no han ba’! Maibé ha’u hatan: ‘La’e, Na’i ha’u sei la han buat nebé fo’er’! Hafoin, ha’u rona tan, ba dala rua, lian ida housi Lalehan mai: ‘Sasan nebé Na’i Maromak hamos ona, ó keta hanaran nia fó’er’. Buat ne’e mosu dala tolu, tui-tuir malu; hafoin fila hikas ba Lalehan.

Iha oras ne’e duni, ema na’in tolu housi Cesaréia mosu mai ha’u iha uma nebé ami hela ba. Nune’e Espírito Santo leno ha’u laran, atu ha’u ba kedas ho sira. Maun-alin na’in nen mós ba hamutuk ho ha’u. Ami tama iha ema ne’e nia uma. Nia haktuir mai ami. Oinsá Anjo mosu iha nia uma hodi dehan: ‘Haruka ema ba bolu Simão nebé hanaran Pedro. Nia sei dehan ba ó, oinsá ó atu simu maksoyn; nune’e mós ba ó nia família tomak’.

Wainhira ha’u hahu ko’alia, Espírito Santo tun ba sira leten, hanesan houri uluk tun mai ita leten. Nune’e, ha’u hanoin hikas fali Na’i nia liafuan nebé dehan: “João sarani ho wé, maibé imi sei simu baptismo ho Espírito Santo”. Na’i haraik karik kmanek ba sira hanesan ba ita, tan sira fiar iha Na’i Jesus Cristo, ha’u ne’e sé lós atu bele hasouru Maromak Nia hakaran?’ Rona liu tiha lia hirak ne’e, sira haksolok hodi fó gloria ba Maromak, dehan: “Oras ne’e, Na’i Maromak haraik mós ba ema gentio sira atu hakribi sira salan hodi bele tama iha moris foun”.

Maromak Futar Lia.

 

Salmo Responsorial                                                                                                                                    Sal. 41(42). 2-3, 42(43). 3-4 (R. Sal. 51. 3ª)

Refrão : Ha’u klamar hamrook ba Maromak moris!!! Repete-se

Ou           Aleluia!

 

Hanesan rusa buka wé lolon,

Nune’e mós ha’u klamar buka Ita, Na’i.

Ha’u hamrook ba Maromak moris;

Wainhira ha’u bele ba Nia futar oin? Refrão

 

Na’i, haruka Ita naroman no lialós

Atu sira bele sai ha’u nia mata-dalan,

Hodi lori ha’u ba Ita futar oin;

Ba fatin Santo Ita hôrik ba. Refrão

 

Ha’u sei la’o ba Maromak Nia altar;

Maromak ha’u ksolok.

Iha ne’e ha’u sei hananu ba Na’i,

Ha’u sei agradece ha’u Maromak. Refrão

 

Aclamação                                                                                                                                                                                                                    Jo. 10. 14

Refrão : Aleluia, Aleluia!!! Repete-se

                  Na’i lia tun: “Ha’u mak Bibi-Atan lolós; Ha’u hatene bibi sira nebé Ha’u nian!

                  Bibi sira nebé Ha’u nia hatene Ha’u”. Refrão

 

Evangelho                                                                                                                                                                                                               Jo. 10. 11-18

+ Na’i Jesus Cristo nia Evangelho nu’udar São João haktuir

Iha tempo neba, Jesus lia tun nune’e: “Ha’u mak Bibi-Atan lolós! Bibi-Atan di’ak mate ba nia bibi sira. Ema nebé la’os bibi-atan, la’os bibi-na’in; haré asu-fuik mai, halai, so’e hela bibi sira nebé asu-fuik lori halo namkari; tan nia ema contrato, la tau matan ba bibi sira. Ha’u mak Bibi-Atan lolós; Ha’u hatene bibi sira nebé Ha’u nian! Bibi sira nebé Ha’u nian hatene Ha’u! Nu’udar Aman Maromak hatene Ha’u, nune’e mós Ha’u hatene Aman Maromak. Ha’u fó Ha’u An ba mate tan Ha’u Nia bibi sira. Ha’u sei iha tan bibi seluk; sira lada’uk tama iha bibi-luhan ida ne’e. Ha’u sei dada mós sira mai. Sira sei rona Ha’u lian! Nune’e, sei sai bibi-luhan ida de’it; Bibi-Atan ida de’it.

Ama Maromak hadomi Ha’u tan ida ne’e: Ha’u fó Ha’u Nia moris, atu simu fali Ha’u Nia moris; Ha’u rasik mak bele saran Ha’u Nia moris ba mate. Ha’u de’it mak bele saran, hafoin simu hi’as fali Ha’u Nia moris. Ida ne’e mak lia Ha’u simu housi Aman Maromak!”

Lia Maksoyn.

Leave a Reply

Your email address will not be published. Required fields are marked *