shadow
Diocese de Dili > NOTÍCIAS > REFLEXÃO > Leitura no Reflexão

Leitura no Reflexão

DOMINGO V DA PÁSCOA

ANO B

 

Primeira Leitura                                                                                                                                                                                                   Act. 9, 26-31

Lia housi Livro haktuir Apóstolo sira nia hahalok :

Iha loron hirak nebá, Saulo to’o iha Jerusalém, nia ba buka Jesus nia Escolante sira, atu libur hamutuk ho sira. Maibé Escolante sira hotu ta’uk nia, tan sira la dauk fiar, katak nia mos escolante ida ona. Barnabé simu nia, hodi lori nia ba Apóstolo sira. Nia haktuir ba Apóstolo sira, oin sá Jesus mosu, lia tun ba Saulo iha dalan ba Damasco. Barnabé haktuir mos, oin sá iha Damasco, Saulo ho aten brani, hahú ko’alia kona ba Jesus nia naran. Hahú iha loron ne’e, Saulo horik hamutuk ho Apóstolo sira iha Jerusalém. Iha Jerusalém, Saulo barani la’o ba fatin hotu, hodi haklaken Jesus nia naran. Nia haksesuk malu ho ema Helenista sira. Maibé, ema sira ne’e buka de’it, oin sá atu bele oho tiha nia. Sarani maluk sira, tan hatene ida ne’e, sira lori tiha Saulo ba Cesareia; hafoin, sira haruka tiha nia ba Tarso. Santa Kreda moris hakmatek iha Judeia tomak, iha Galileia no Samaria; Santa Kreda hamta’uk Maromak; hodi Espírito Santo nia tulun, moris nafatin, boot ba daudaun.

Maromak Futar Lia

 

Salmo Responsorial                                                                                                                                                      Sal. 21 (22), 26b-27, 28, 30, 31-32

Refrão : Na’i, ha’u hahí Ita, iha ema lubun sira leet!!! Repete-se

Ou.          Aleluia…

 

Iha Ita emar sira oin, ha’u sei halo tuir duni

lia hirak ha’u hakotu.

Ki’ak sira sei han to’o bosu.

Ema sira be buka Na’i, sei hahí Nia;

sira hetan moris nafatin. Refrão

 

Rai hotu hanoin Na’i, hodi fila hikas ba Nia;

família sira hotu nação sira nian, hana’i Nia.

Sira be toba iha rai laran, hana’i Nia,

sira be dala ida tan tun ba rai-rahun, hana’i Nia. Refrão

 

Tan Nia, ha’u sei moris,

ha’u nia bei-oan sira sei serbí ba Nia.

Ema sira ikus nian sei ko’alia kona ba Na’i.

Povo nebé atu moris, sei haktuir Nia justiça;

“Buat hirak ne’e hotu Na’i halo!” Refrão

 

Segunda Leitura                                                                                                                                                                                                   1 Jo. 3, 18-24

Lia housi São João nia surat :

Oan sira: Ita keta hadomi malu ho lia-fuan de’it, ho ibun tutun de’it; maibé hadomi lolós, hadomi ho hahalok. Nune’e mak ita bele hatene katak ita tuir duni lialós; nune’e mak ita bele hatene katak iha Maromak futar oin ita bele hetan hakmatek ba ita laran. Basá, Maromak boot liu ita laran, Nia hatene buat hotu-hotu. Doben sira: Ita fuan la tuku karik, ita laran metin teb-tebes ba Maromak, ita simu tulun tomak nebé ita husu ba Nia, basá, ita halo tuir Ninia ukun-fuan, ita halo buat nebé monu ba Nia laran. Ninia ukun-fuan mak ida ne’e: Fiar Ninia oan Jesus Cristo nia naran, hadomi malu nu’udar Nia haruka. Ema nebé moris tuir Ninia ukun-fuan, nia hela iha Maromak, Maromak hela iha nia. Ita hatene katak Maromak hela iha ita, tan Espírito nebé haraik mai ita.

Maromak Futar Lia

 

Aclamação                                                                                                                                                                                                                   Jo. 10, 14

Refrão : Aleluia, Aleluia!!! Repete-se

Na’i lia tun dehan: “Imi hela iha Ha’u, Hau sei hela iha imi:

Ema nebé hela iha Ha’u, nia fó fuan tebar”.. Refrão

 

Evangelho                                                                                                                                                                                                                   Jo. 15, 1-8

+ Na’i Jesus Cristo nia Evangelho nu’udar São João haktuir :

Iha tempo nebá, Jesus lia tun ba Escolante sira dehan: “Ha’u mak uvas hun lolós, Ha’u Aman mak toos na’in. Ha’u nia sanak hotu nebé la fó fuan, Ha’u Aman tesi tiha; sanak sira hotu nebé fó fuan, Ha’u Aman hamós didi’ak, atu fó fuan liu tan. Imi sira ne’e, mós tiha ona, tan lia-fuan Ha’u hateten ona ba imi. Imi hela iha Ha’u, Ha’u hela iha imi. Nu’udar uvas sanak ketak housi uvas hun, la bele fuan mesa-mesak, nune’e mos imi la hamutuk ho Ha’u, imi sei la fó fuan duni. Ha’u mak uvas hun, imi uvas sanak. Ema nebé hamutuk ho Ha’u, nia sei fo fuan barak, basá, la hodi Ha’u, imi la bele halo buat ida. Ema nebé la horik hamutuk ho Ha’u, ema sei haketak tiha nia, nu’udar ai-sanak, hodi sai maran. Ai-sanak hirak ne’e ema sei futu hamutuk tau ba áhi, áhi sei han tiha sira. Imi hela ho Ha’u, no Ha’u nia lia-fuan hela ho imi karik, imi bele  husu  buat hotu nebé imi hakarak, imi sei hetan duni buat hirak ne’e hotu. Ha’u nia Aman nia glória mak ida ne’e: Imi fó fuan barak. Nune’e de’it mak imi bele sai Ha’u nia Escolante duni.”

Lia Maksoyn

 

 

Hanoin kona ba ó rasik nia fiar :  

Iha Evanjéliu ohin nian Jesus kompara nia-An ho uvas hun. Nia kompara Maromak ho ema ida nebé tau matan ba uvas hun no Nia disípulu sira hanesan uvas sanak. Jesus dehan mak ita tuir ba besik Nia karik ita sanak sira nebe fó fuan.  Mak ita la tuir ba besik Nia karik, ita sei sai sanak sira nebe la fo fuan no ita bele maran de’it no mate.   Ita hatene katak buat nebé hela besik Jesus sei fó fuan tebar tebe-tebes. Ita moris nafatin ho Jesus ita sai sanak ho fuan tebar teb-tebes. Dala balu ita tenki hatene aparu uitoan ita nia sanak sira hodi bele fó fuan tebar hanesan Maromak hakarak atu ita sai.    Saida mak iha ó nia moris laran ó tenke aparu hodi bele moris buras no fó fuan di’ak?

 

EVANGELHO – Jo 15,1-8 

Evanjellu situa ita iha Jerusalém, iha kinta kalan, loron ida molok festa Páskua  iha tinan 30. Jesus halibur an ho nia eskolante sira hadulas meza ida, iha han-kalan despedida nian. Nia konxiente katak dirijente judaiku sira deside fó mate ba Nia no krús iha ona nia oin. Jesus nia jestu no liafuan sira, iha kontestu ida-ne’e, reprezenta ninia indikasaun ikus sira, ninia “testamentu”. Dixípulu sira simu koordenada sira atu bele kontinua Jesus nia misaun iha mundu. Moris mai komunidade Aliansa Foun nian, ne’ebé nia aliserse mak servisu (kf. Jo 13,1-17) no domin (kf. Jo 13,33-35); komunidade ne’ebé pratika Jesus nia obra sira hodi Espíritu Santu nia kbiit (kf. Jo 14,15-26). “Diskursu despedida” Jesus nian hahú husi 13,1 to’o 17,26. Testu ne’ebé liturjia domingu ne’e nian propoin mai ita aprezenta Jesus nia instrusaun ida konaba komunidade eskolante sira nia identidade no situasaun iha mundu nia leet. 

 

MENSAGEM

Atu define situasaun dixípulu sira nian, Jesus uza metáfora “ai-videira”/uvas-hun nian, sanak sira no fuan sira… Ilas ne’e iha konotasaun Testamentu Tuan kle’an no ho signifikadu espesiál ida iha universu relijiozu judaiku. Iha Testamentu Tuan (no ho forma espesiál iha mensajen profétika), “ai-videira” no “to’os-uvas” mak símbolu sira Maromak nia Povu nian. Sira aprezenta Israel nu’udar “ai-videira” ne’ebé Jahwéh fokit husi Ejitu, no transplanta iha Rai Prometida no tau matan nafatin ba nia ho domin (kf. Sal 80,9.15); profeta sira aprezenta mós nu’udar “to’os-uvas”, ne’ebé Maromak kuda ho fini di’ak nian, Nia kuda no hein atu fó fuan barak, maibé prodús de’it fuan moruk no la soi (kf. Is 5,1.7; Jer 2,21; Ez 17,5-10; 19,10-12; Os 10,1). “Ai-videira” eh “to’os-uvas” antigu Jahwéh nian sai deziluzaun ida ba Maormak. Israel nunka fó fuan ne’ebé Maromak hein.

Jesus aprezenta An nu’udar “ai-videira” loos ne’ebé Maromak kuda (vers. 1). Jesus prodús fuan sira ne’ebé Maromak hein. No husi Jesus, “ai-videira loos” sei moris mai Maromak nia Povu foun ida. Ohin, hanesan uluk, Maromak kontinua sai agrikultór ne’ebé hili tipu kualidade sira, ne’ebé nia kuda no tau matan ba nia to’os-uvas. Sá loos eskolante sira nia papél, iha kontestu ne’e? Eskolante sira mak “uvas-sanak” sira ne’ebé metin ba “ai-videira” (Jesus) no simu moris husi nia. “Uvas-sanak sira” ne’e, la iha moris rasik no la prodús fuan husi an rasik; sira presiza linfa ne’ebé Jesus komunika. Tanba ne’e sira simu konvite atu horik iha Jesus (vers. 4). Verbu hela/horik (“ménô”) mak liafuan xave ita-nia testu nian (husi vers. 4 to’o vers. 8, mosu dala hitu). Nia espresa konfirmasaun eh renovasaun atitude nian ne’ebé asume antes ona. Nia hateten katak dixípulu adere tiha ona ba Jesus no ninia adezaun manán tiha ona estatutu metin, estabilidade, konstánsia, kontinuidade nian. Konvite ida atu dixípulu mantein ninia adezaun ba Jesus, ba identifikasaun ho Nia, ba komuñaun ho nia…  Dixípulu mantein ninia adezaun karik, Jesus horik ho dixípulu – katak, kontinua fielmente oferese ba dixípulu ninia moris. Katak sá horik nafatin ho Jesus? Iha Jo 6,56 Jesus fó hatene: “Ema ne’ebé loos duni han ha’unia isin no hemu ha’u-nia raan hela iha ha’u no Ha’u hela iha nia”… Jesus nia “isin” mak nia moris; Jesus nia “raan” mak entrega totál ba domin to’o mate; nune’e, “haan Jesus nia isin no hemu nia raan” signifika asimila Jesus nia ezisténsia, halo iha servisu no entrega tan domin, to’o don totál an rasik nian. Metin ba Jesus no hela iha Nia mak ema ne’ebé simu iha fuan proposta vida nian no kompromete an ho ezisténsia ida halo iha entrega ba Maromak no maluk sira, to’o saran an tomak tan domin. Uniaun ho Jesus la’ós buat ruma automátiku; maibé buat ruma depende ba desizaun livre no konxiente dixípulu nian – desizaun ida ne’ebé tenke hafoun nafatin (vers. 4). Ba dixípulu sira (“uvas-sanak sira”), hapara relasaun ho Jesus signifika tesi kotu relasaun ho bee-matan moris nian no kondena an ba esterilidade. Halo nune’e, sei la prodús fuan domin nian, maibé fuan mate nian. Jesus nia komunidade (“uvas-sanak sira”) labele kondena an ba esterilidade. Nia misaun mak fó fuan. Tanba ne’e, “agrikultór”/to’os-na’in (Maromak) atua hodi halo atu “uvas-sanak” (dixípulu) identifika an ba beibeik ho “ai-videira” (Jesus Kristu) no prodús fuan sira domin nian, doasaun nian, servisu nian, libertasaun maluk sira-nian. Maromak nia asaun mak “hamoos uvas-sanak” atu nia fó fuan liután. “Hamoos” signifika bolu nia ba prosesu ida konversaun kontínua nian ne’ebé lori nia atu hakribi dalan sira egoízmu no taka an nian, atu loke an ba domin. Ho liafuan seluk: hamoos “uvas-sanak” sira-ne’e halo liuhusi adezaun fiél ba beibeik ba Jesus no ba niia proposta domin nian (vers. 2b). Dixípulu sira “moos” (vers. 3), basá sira adere ba Jesus, iha momentu hotu konfronta an ho ninia proposta moris nian no hatán ho modu pozitivu ba dezafiu ne’ebé Maromak halo ba sira. Maski Maromak halo esforsu hotu  no bolu nafatin ba uvas-sanak konversaun mak “uvas-sanak” kontinua ulun to’os atu la prodús fuan di’ak karik, nia sei la horik iha Jesus nia komunidade, komunidade salvasaun nian. Nia sai “sanak” ida ne’ebé la pertense ba “ai-videira” ne’e (vers. 2a).

Leave a Reply

Your email address will not be published. Required fields are marked *