shadow
Diocese de Dili > NOTÍCIAS > LETURA DIÁRIA > Terça-Feira, V Semana da Páscoa

Terça-Feira, V Semana da Páscoa

ANO B

 

Primeira Leitura                                                                                   Act. 14. 19-28

Lia husi livro Apóstolo sira nia hahalok.

Iha loron hirak neba, ema judeu sira balu husi rai Antioquia no Icónio to’o daudaun iha Listra. Sira halibur-an ho ema bulun sira, buka tuda Paulo hodi dada nia sai husi Cidade; sira husik hela nia hodi hanoin katak nia mate tiha ona. Maibe escolante sira mai halibur-an hale’u nia, hafoin nia hamriik kedas hodi tama liu ba cidade. Iha loron tuir mai, nia ho Barnabé liu ba rai Derbe.

Iha cidade neba, sira haklaken lia-foun hodi sarani tiha ema barak. Hafoin, Paulo ho Barnabé fila hikas ba Listra, ba Icónio no ba Antioquia. Sira fó aten boot ba escolante sira atu sira laran metin nafatin tuir sira nia fiar. Hafoin sira hateten tan: “Atu tama ba Maromak nia Reno, ita sei terus barak”. Tau tiha liman iha katuas sira be hili ne’e nia ulun, hodi foti sira, atu sira ida-idak ukun iha uma kerda ida; halo tiha oração ho jejum, Paulo ho Barnabé liu husi Pisídia to’o rai Panfília.

Haklaken tiha Maromak nia liafuan iha Perga, Paulo ho Barnabé tun ba Atália. Husi neba, sira ba Antioquia ho ró. Husi Antioquia, hodi Maromak nia tulun, mak sira hahu uluk serbisu nebe sira foin halo hotu.

To’o tiha neba, sira halibur sarani hotu hodi haktuir buat hotu nebe Maromak halo husi sira. Sira haktuir mós oinsá Na’i Maromak loke ema gentio sira nia laran atu fiar. Sira hela kle’ur iha neba ho escolante sira.

Maromak Futar Lia.

 

Salmo Responsorial                                                                                                                                     Sal. 144(145). 10-11, 12-13ab, 21 (R. cf. 12ª)

Refrão : Na’i, sira be hadomi ita, haklaken ita reino nia glória!!! Repete-se

Ou           Aleluia! 

 

Atu ema hot-hotu agradece ita, Na’i;

Ita sarani sira hahi ita;

Hodi haklaken ita reino nia glória,

Hodi halekar ita nia kmanek nia hahalok.   Refrão

 

Atu fó hatene ba ema hotu ita nia kbiit;

No ita reino nia kmanek wa’in.

Ita nia reino, reino rohan laek;

Ita nia ukun sei hela metin

Husi oan ba bei-oan sira hotu.   Refrão

 

Ha’u nia ibun hahi hana’i Na’i nia kmanek;

Criatura tomak sei hananu,

Hodi hawélok ita naran ba nafatin.   Refrão

 

Aclamação                                                                                                                                                                                                           Lc. 24. 46, 26

Refrão : Aleluia, Aleluia!!! Repete-se

Hakerek nanis ona katak Cristo sei hetan terus to’o mate no moris hi’as husi mate

sira nia leet atu nune’e nia bele tama iha nia glória. Refrão

 

Evangelho                                                                                                                                                                                                            Jo. 14. 27-31ª

+ Na’i Jesus Cristo nia Evangelho tuir São João :

Iha tempo neba, Jesus lia tuna ba escolante sira dehan: “Ha’u nia dame hela ho imi; Ha’u fó ba imi Ha’u nia dame. Dame nebe Ha’u fó ba imi la’os hanesan mundo fó ba imi. Imi keta laran susar, keta hakfodak. Imi rona ona lia nebe Ha’u hateten ba imi; Ha’u ba ona, maibe Ha’u sei fila fali mai imi. Imi  hadomi karik ha’u, imi sei haksolok, basá, Ha’u ba Ha’u Aman, tan Ha’u Aman boot liu Ha’u. Ha’u hateten sai kedas ida ne’e ba imi molok atu mosu mai, atu nune’e imi bele fiar wainhira buat hirak ne’e mosu mai. Ha’u sei ko’alia tan dala wa’in ho imi, basá mundo nia liurai-oan atu mosu daudaun ona mai. Kona ba Ha’u, nia la iha buat ida, maibe mundo tenki hateten katak Ha’u hadomi Ha’u Aman, Ha’u sei serbisu nu’udar Ha’u Aman haruka.

Lia maksoyn.

Leave a Reply

Your email address will not be published. Required fields are marked *