shadow
Diocese de Dili > NOTÍCIAS > OPINIÃO > MENSAGEM BA JORNADA DA PAZ (ELEIÇÕES ANTECIPADAS 2018) HUSI PRESIDENTE DA CET.

MENSAGEM BA JORNADA DA PAZ (ELEIÇÕES ANTECIPADAS 2018) HUSI PRESIDENTE DA CET.

 

CONFERÊNCIA EPISCOPAL TIMORENSE

Address : Maloa, Dili, Timor-Leste

Tel. :                                Fax. :                            

Email : 81211cet@gmail.com


 

SONHANDO COM A PAZ

EXPERIÊNCIA MESTRA DA VIDA-EXPERIÊNCIA SAI MESTRA BA ITA NIA MORIS

 

Ita ema aprende bebeik buat foun iha ita nia moris. Biar estuda barak no halo estudo bo’ot, biar halao kna’ar mesak importante no bo’ot, biar naran bo’ot no tur iha kadeira bo’ot, maibe wainhira ita sei moris, sei hasoru bebeik situação foun, nebe ita nunka koko uluk. Maibe mos, iha situação nune, maka ita nia kakutak buka hetan dalan oi-oin, atu hatan ba desafio foun hirak ne’e. tan ne’e mak matenek nain sira dehan katak ita sei aprende to’o mate.

Democracia, sai realidade foun ba ita nia cultura social, usos e custumes iha Timor-Leste. Ita nia organização social tradicional baseia ba reinos independents, biar mesak reino ki’ik. Tempo colonial no ocupação, Portugal no Indonesia, lori sira nia estrutura social mai, no hatama usos e costumes balu iha ita nia organização social; hamihis tiha ita nia estrutura social, halo ita depende ba ukun nain rai seluk nian.

Hahu 2002, ita moris iha oraganização social, ka regime foun ida atu ukun, naran Democracia; regime foun ida ne’e ho nia estrutura sira, nebe hanaran órgaos de soberania, povo, eleição, regras de funcionamento, foin halo parte ita nia cultura tinan 16 liu ba.

Situação foun ida lori novidade barak maibe mos foti desafio barak. Ba ita, Timor-Leste oan sira nebe hakarak moris ohin tuir mundo modern, situação foun ida ne’e foti desafios barak. Tinan 16 ne’e nia laran halo ita koko ona midar no moruk barak. Maibe realidade nebe ita bele observa iha tinan 16 nia laran, maka Timor oan sira halo curso ida acelerado, intensive, inteligente e competente konaba democracia. Iha tinan 16 nia laran ita koko ona situação sira nebe democracia sira rai seluk nian, balu tuan liu ita tinan 200, koko tiha ona. Balu dehan ita nação frágil, balu fali dehan falhado, balu fali dehan futuro la iha, balu fali dehan buat seluk-seluk tan. Buat nebe ita bele dehan, nakdoko, nakdoko duni, halis, halis duni maibe ladauk tohar no hein katak sei la tohar. Se ita hotu hakarak, sei nunka tohar.

Ita nia democracia nia situação foun ida maka Eleições Antecipadas. Liafuan democracia ita rona koalia no hatene saida mak ne’e; lia fuan estado mos ita rona koalia no hatene ona; Nação, Órgãos de soberania, Presidente da República, Parlamento, Governo, Tribunal ita rona no hatene ona. Agora Eleição Antecipada…Ne’e buat foun.

Fulan Julho 2017 ita halo eleição baibain tuir constituição haruka. Maibe eleição ida ne’e la fo funan, fuan, finin, tan Governo labele halao nia kna’ar no nação nia vida para tomak. Ne’e duni, iha Fevereiro 2018, Sr. Presidente da República usa nia competência tomak hodi decide convoca eleição antecipada, katak, bolu povo Timor-Leste atu hili fali força politica ka partido nebe povo bele fo fiar, hodi bele ukun nação Timor-Leste durante tinan 5 mai ne’e.

Ema hare husi liur dehan katak Timor-Leste moris iha crise. Maibe, dala barak, crise sira ne’e duni maka mai fo biban atu muda no hafoun buat barak iha ema no institicao sira nia vida hanesan, Nação, Estado, Igreja, Empresas, Instituições, etc.etc.

Eleição antecipada bele hanorin sa’a ida mai ita?

  1. Eleição Antecipada sai biban ba ita atu aprende katak wainhira nação nia moris la lao iha tinan ida nia laran, Julho 2017 bibit to’o 2018 ou liu tan, investimento la iha, osan la iha, economia motok, empresário sira dada i’is la diak, investimento husi liur la tama, pequeno comércio mout neneik hein atu mate deit, Sr. Presidente da República nudar Órgão Soberano nebe bo’ot liu iha nação nia laran, tan nia mak kaer governo nia moris fukun, halo decisão atu sobu parlamento, hasai kbi’it husi governo, no haruka fali eleição ida, biar ita foin halo eleição tinan 1 liu ba.
  2. Eleição antecipada ida ne’e, fo biban ba ita hotu atu aprende história foun Timor-Leste nian liu duni husi fundadores sira nia ibun rasik. Biar ladauk hakerek, maibe campanha eleitoral ida ne’e sai we matan bo’ot ida ba ita nia história, ohin no aban bain rua nian. Dala barak ho liu emoção do que ho kakutak malirin, ida-idak haktuir sira nia intervenção iha historia Timor-Leste nian. Biar dala barak povo lamenta katak em vez de apresenta programa partidos, político ho líder sira mak ke’e malu fali iha ema hotu nia oin; biar nune’e, ida ne’e positivo teb-tebes. Geração foun, Timor-Leste oan sira nebe la partecipa wainhira história foun ida ne’e hahu, no la hatene acontecimento sira hahu oin sa, ida-idak rona ho nia tilun, se mak halo saida, no halo oin sa’a. Dala barak lian la tuir malu no ibun lalais liu kakutak. Maibe nune’e mos kanek balun bele hahu hafitar-an daudaun… maibé ponto positivo maka geração foun la rona história husi ema seluk nia ibun maibe rona duni husi fundadores sira nia ibun. Buat lubuk ida mosu ba ema hotu nia matan no tilun, hodi fo biban atu ema hotu bele hatene naroman no nakukun fundadores no participantes história foun Timor-Leste nian, no bele lori ema ida-idak bele tetu ho nia sentido crítico rasik, no factos balun nebe to’o ohin loron sai hanesan segredo lulik, ema ho grupo balun nian deit, ohin loron fundadores sira duni maka fo sai atu ema hotu bele hatene. Iha psicologia hahalok hanesan ne’e hanaran Catarse. Iha espiritualidade ita bolu purificação. Ita hatene katak historia so bele sai deit imparcial no objective wainhira autores no actors directos ba acontecimento sira lakon hotu ona. Maibe buat diak maka wainhira autores no actors sira maka conta sira nia história rasik, ne’e katak sira moris no koko duni buat sira nebe sira haktuir. No biar wainhira hatudu liman ba malu mos, ne’e hatudu katak ida-idak hatene ida seluk nia vida. Ho koalia hirak ne’e hotu, geração foun aprende história hodi bele relativiza ema no sira nia hahalok, agora no aban bain rua.
  3. Eleição Antecipada ida ne’e sai biban atu fo hanoin katak povo ida ne’e matenek teb-tebes. Tan, iha deit tinan 16 nia laran, povo comprende politica ho maturidade bo’ot. Se ita compara clima eleição ohin nian ho tempo liu ba, hare katak clima hakmatek teb-tebes. Violência balu nebe acontece iha fatin balu, ne’e halo parte vida, emoção no irracionalidade iha democracia hot-hotu. Rai balun nebe moris iha democracia kleur liu ona ita, sei buti malu, rakut fu’uk ba malu, tuda kadeira ba malu iha parlamento, tolok malu, ect. Ita sei usa deit katana. Maibe husi 2001 to’o 2018, ita hare mudança bo’ot iha povo nia emoção. Graças a Deus, biar nudar realidade foun, democracia começa sai tasak dadaun iha ita nia cultura social.
  4. Eleição antecipada ne’e sai biban atu povo Timor-Leste aprende katak Governo ida sai forte wainhira oposição mos forte. Hain katak husi ne’e ba oin, consciência ida ne’e sai bo’ot liu tan iha ita nia democracia no classe politica nia concideração. Campanha electoral ida ne’e hatudu duni consciência ida ne’e. To’o oras ne’e linha fronteira ida ne’e ladun claro ou la iha, tan hotu-hotu hanoin katak colaboração maka estrategia diak liu. Maibe campanha eleitoral ida ne’e sai biban atu hatudu katak sistema ne’e la dun eficaz. Colaboração, maibe kala ida-idak sikat hela tudik iha kotuk. Ne’e duni wainhira sira hirus malu iha campanha eleitoral buat lubuk ida fakar sai hotu ba luron. Provérbio Português dehan: “zangam-se as comadres descobrem-se as verdades”. Quando uma laran hirus malu, buat hotu mai lekar iha luron. Maibe iha politca ita hatene katak buat nebe hateten ohin, aban bele nega, buat nebe ohin parece los aban la los ona, no hirus malu ohin aban hakuak malu fali hodi han hemu hamutuk. Maibe sente katak sira nebe sei sai governo no oposição define duni sira nia área claro teb-tebes. Nune’e povo no nação Timor-Leste maka sei manan tomak.
  5. Eleição antecipada ida ne’e sai mos biban ida atu força partidária no líderes políticos foun balu bele hahu mosu iha cena política nacional. Mosu ho linguagem foun, conceito foun, programa estruturado, ideias foun, dinamismo foun biar oin balu sei nurak no balu oin tuan ona. Maibe importante maka sira hahu mosu hanesan novidade. Bele usa terminologia biblica karik, to’o oras ne’e, ita rona liu Antigo Testamesto ho nia interveniente sira. Testamento foun ladauk hakerek. Maibe ita hahu moris dadaun iha tempo intertestamentário. Entre Antigo no Novo Testamento iha le’et ida quase tinan 200. Iha Timor-Leste, tempo intertestamentário ladauk naruk, foin maka tinan 2,3 liu ba no agora mak foin hatudu oin no liman. Maibe dinamismo ne’e hatudu katak povo Timor-Leste nia oan sira iha capacidade matenek atu aprende lais.
  6. Loron 12 de Maio sai dasin ida hodi tetu buat hotu iha tempo eleição antecipada ida ne’e:
  • Tetu povo nia maturidade política.
  • Tetu povo nia interece ba participação politica iha nação nia moris. Líder político balu, ho razão, hanaran eleição ida ne’e hanesan referendum.
  • Tetu capacidade lider sira nian atu hare se sira nia liafuan, dinamismo, ideias, estratégia, mensagem provoca duni impacto iha povo ka lae, kona duni povo nia fuan , kakutak no interece ka lae.
  • Tetu se povo iha ona consciência ka lae, katak tenke participa iha nia nação nia vida liu husi nia voto. To’o oras ne’e, persentagem abstenção nian bo’ot teb-tebes; katak ema la vota ne’e barak teb-tebes. Iha 12 de Maio, ho prego id aka lapisera ida, ho ai atu tunu sate ka ikan, importante mak ita tenke vota atu hili força política ka líder político nebe nia fo fiar atu ukun tinan 5 mai ne’e. Cidadão ida-idak tenke hatene katak ho nia voto pessoal nia contribui ba nação ida nia estabilidade. Durante tina 5, ukun nain sira maka ukun ita. Maibe iha loron votação, ukun nain sira nia vida política iha povo nia liman. Cidadão nebe mak la vota, depois labele reclama nia direito ba estado atu tau matan ba nia, tan nia la contribui ba vida política no estabilidade nação nian.
  • Ikus liu, eleição antecipada ida ne’e, hanesan eleição hotu-hotu, hanorin katak iha democracia, poder iha povo nia liman, povo mak manda. Biar nia la ukun, maibe nia hili força partidária no líder sira nebe nia fo fiar atu ukun. Iha democracia, povo nia decisão iha carácter soberano, katak nia maka manda no ema ida la discute povo nia decisão. Tan nia decisão mak todan liu. Hein katak força partidária no líder político sira hotu sei hatene hakru’uk ba povo nia decisão.

Se povo Timor-Leste hatene ona moris iha democracia ho maturidade, então força partidária no lider político sira nia maturidade política tenke bo’ot liu povo nian.

FELICIDADES BA ITA TIMOR–LESTE  oan toma no ba ita nia nação.

 

 

                                                                                                               Dili, 10 de Maio 2018

Leave a Reply

Your email address will not be published. Required fields are marked *