shadow
Diocese de Dili > NOTÍCIAS > LETURA DIÁRIA > Quarta-Feira, V Semana da Páscoa

Quarta-Feira, V Semana da Páscoa

ANO B

 

Primeira Leitura                                                                                      Act. 15. 1-6

Lia husi livro Apóstolo sira nia hahalok.

Iha loron hirak neba, ema balu tun mai housi Judeia mai hanourin maun-alin sira iha Antioquia: “Tuir lisan housi Moisés, imi la simu karik circuncisão, imi sei la hetan maksoyn”. Iha oras ne’e mosu rungu-ranga no sira haksesuk malu ho Paulo no Barnabé. Nune’e sira hakotu lia atu Paulo ho Barnabé ho ulun sarani nian balu atu sa’e ba Jerusalém hodi ko’alia ho Apóstolo sira no katuas sira, kona ba lia be mosu. Ho domin boot, despede tiha ba kreda, sira sai liu housi Fenícia no Samaria, iha nebé sira haktuir ba maun-alin sira kona ba ema gentio sira nebé husik nia moris tuan hodi tama iha fiar. Sira hotu rona ho ksolok boot teb-tebes.

Wainhira to’o iha Jerusalém, Apóstolo sira no katuas sira simu Paulo ho Barnabé ho nia maluk sira ho ksolok boot. Hafoin sira haktuir buat nebé Maromak halo liu tiha ona housi sira. Ema balu housi grupo fariseu nian nebé simu ona fiar, hasa’e lia hateten katak, gentio sira atu tama hodi hola parte iha moris sarani-fiar, uluk knana’in tenki simu circuncisão, hafoin haruka sira atu tuir Moisés nia Lei. Tan ne’e, mak Apóstolo sira ho katuas sira halibur malu atu estuda kona ba problema ne’e.

Maromak Futar Lia.

 

Salmo Responsorial                                                                                                                                             Sal. 121(122). 1-2, 3-4a, 4b-5 (R. cf. 1)

Refrão : Ho ksolok ita la’o ba Na’i Nia uma!!! Repete-se

Ou           Aleluia! 

 

Ha’u haksolok wainhira ema dehan mai ha’u:

“Ita la’o ba Na’i Nia uma!”

Ami ain sama ona ó rain, Jerusalém,

Ami to’o ona iha ó nia odamatan. Refrão

 

Jerusalém cidade be ema harí,

Cidade kmook no kmanek.

Sa’e ba iha neba ema sira uma-kain nian;

Uma-kain tomak Israel nian. Refrão

 

Atu hahi Na’i naran tuir lei haruka;

Basá iha neba, halo justiça,

Iha tribunal David nia uma nian. Refrão

 

Aclamação                                                                                                                                                                                                            Jo. 15. 4a, 5b

Refrão : Aleluia, Aleluia!!! Repete-se

                  Na’i lia tun: “imi hela iha Ha’u, Ha’u hela iha imi;

                  ema ne’ebe hamutuk ho Ha’u, nia sei fó fuan barak. Refrão

 

Evangelho                                                                                                                                                                                                                   Jo. 15. 1-8

+ Na’i Jesus Cristo nia Evangelho tuir São João :

Iha tempo neba, Jesus lia tun  ba escolante sira, dehan: “Ha’umak uvas hun lós. Ha’u Aman mak To’os-Na’in. Ha’u nia sanak hotu nebe la fó fuan, Ha’u Amam tesi tiha; sanak sira hotu nebe fó fuan Ha’u Aman hamos didiak atu fó fuan liu tan. Imi sira ne’e mós tiha ona, tan liafuan Ha’u hateten ona ba imi. Imi hela iha ha’u, ha’u hela iha imi. Nu’udar uvas sanak haketak housi uvas hun la bele fó fuan mesa-mesak, nune’e mós imi la hamutuk ho Ha’u, imi sei la fó fuan duni. Ha’u mak uvas hun, imi uvas sanak. Ema nebe hamutk ho Ha’u, nia sei fó fuan barak, basa la hodi ha’u, imi labele buat ida. Ema nebe la hôrik hamutuk ho Ha’u, ema sei haketak tiha nia, nu’udar ai-sanak, hodi sai maran. Ai-sanak hirak ne’e, ema sei futu hamutuk tau ba ahi, ahi sei han sira. Imi hela ho Ha’u karik, Ha’u nia liafuan hela ho imi; imi bele husu buat hotu nebe imi hakarak, imi sei hetan duni buat hirak ne’e hotu. Ha’u nia Aman Nia glória mak ida ne’e: imi fó fuan barak. Nune’e de’it mak imi bele sai Ha’u Nia escolante duni.

Lia maksoyn.

Leave a Reply

Your email address will not be published. Required fields are marked *