shadow
Diocese de Dili > NOTÍCIAS > LETURA DIÁRIA > Quarta-Feira, VI Semana da Páscoa

Quarta-Feira, VI Semana da Páscoa

ANO B

 

Primeira Leitura                                                                                Act. 17. 15, 22-18. 1

Lia housi livro Apóstolo sira nia hahalok

Iha loron hirak neba, maun-alin sira be la’o hamutuk ho Paulo, housi Tessalónica, hodi ba to’o iha Atenas; hafoin, sira fila hi’as mai,lori lia meno ba Silas no Timóteo atu ba lalais hasouro Paulo.

Paulo hamriik iha Areópago nia klaran, hodi dehan nune’e: ”Ema Atenas sira, ha’u haré katak imi hotu hamta’uk Maromak. Basá uainhira ha’u la’o iha cidade laran hodi haré didi’ak imi nia fatin santo sira, ha’u hetan altar ida ho lia fuan hirak ne’e: ‘ Ba Maromak nebe ema la hatene’. Ne’e duni, ida nebe imi adora hodi la hatene, ha’u haklaken ba imi. Maromak nebe halo mundo no buat hotu nebe iha nia, lalehan no rai nia Na’i, la hôrik iha kadunan nebe ema nia liman mak halo; Nia la kuran ema nia liman atu serbi Nia basá Nia la kuran buat ida. Maibe Nia mak fó moris no iis no buat hotu. Housi ema ida de’it, Nia halo ema ua’in atu hôrik iha mundo tomak, no Nia mak tau tempo sira no ida-idak nia fatin, atu ema bele buka Maromak, maski lolós nia la dook housi ita ida-idak. Basá ‘iha Nia ita moris. No book no hetan ita-an,’nu’udar imi nia poeta balun dehan tiha , ‘Basá ita mós Nia oan sira’.

Ne’e duni, tan ita Maromak nia oan, ita la bele hanoin katak Maromak ne’e hanesan ilas nebe ema nia liman no matenek halo ho osan mean ka osan mutin ka fatuk. Maromak taka ba tempo nebe ema sei  beik, maibe ohin Nia hakarak hodi biit katak ema hot-hotu hakribi sala, basá Nia marca tiha loron nebe Nia sei tesi lia ba mundo ho justiça housi ema ida nebe Nia foti no Nia hametin ba ema hot-hotu uainhira nia halo Nia moris hi’as housi mate sira leet”.

Uainhira sira rona kona ba moris hi’as housi mate sira leet, balun hahu hasara nia, maibe sira seluk hatete: “Ami hakarak rona ó ko’alia kona ba buat ne’e dala seluk hateten: “ Ami hakarak rona ó ko’alia kona ba buat ne’e dala seluk tan”. Nune’e Paulo husik sira. Maibe balun tuir nia, hodi sai fiar na’in; sira ne’e mak Dionísio, areopagita no mós feto ida naran Dâmaris, no seluk tan hamutuk ho sira. Ne’e hotu tiha, Paulo husik Atenas hodi la’o liu ba Corinto.

Maromak Futar Lia.

 

Salmo Responsorial                                                                                                                                                    Sal. 148. 1-2, 11-12b, 12c-14ª, 14bc

Refrão : Lalehan ho rai haklaken ita glória!!! Repete-se

Ou           Aleluia!

Imi hahi Na’i,

Hahí Nia housi lalehan áas ba,

 Nia anjo sira, hahi Nia. Refrão

 

Liurai no povo tomak mundo nian,

Liurai oan sira be ukun rai,

Mane klosan no fetoran sira,

Katuas no kiik oan sira. Refrão

 

Imi hotu hahi Na’i nia kmanek;

Nia ukun housi áas liu lalehan no rai,

Biit no beran be saran tiha ba Nia povo. Refrão

 

Ksolok ba Nia sarani sira hotu;

Ba Israel oan sira hotu,

Povo be Nia hadomi liu. Refrão

 

Aclamação                                                                                                                                                                                                                   Jo. 14. 16

Refrão : Aleluia, Aleluia!!! Repete-se

                  Ha’u  sei harohan ba Aman no Nia sei fó ba imi espírito

                  Santo atu hela nafatin ho imi. Refrão   

 

Evangelho                                                                                                                                                                                                           Jo. 16. 12-15    

+ Na’i Jesus Cristo nia Evangelho tuir São João :

Iha tempo neba, Jesus lia tun ba escolante sira, dehan: “Ha’u sei iha buat barak atu dehan ba imi, maibe oras ne’e imi nia neon seida’uk to’o atu hatene lolós. Uainhira Espírito Lialós nian mai, Nia sei hanourin lialós hotu ba imi. Basá nia sei la ko’alia hodi Nia-an rasik, maibe Nia sei koalia kona ba buat hotu nebe Nia rona. Nia sei haklaken buat nebe aban bain rua sei mosu mai. Nia sei fó glória ba Ha’u, tanba Nia sei simu Ha’u nia liafuan atu hanourin ba imi. Buat hotu nebe Aman iha, ha’u nian mós. Tan ne’e, mak Ha’u dehan: Nia sei simu Ha’u Nia liafuan atu haklaken ba imi”.

Lia Maksoyn.

Leave a Reply

Your email address will not be published. Required fields are marked *