shadow
Diocese de Dili > NOTÍCIAS > LETURA DIÁRIA > Quinta-Feira, VI Semana da Páscoa

Quinta-Feira, VI Semana da Páscoa

ANO B

 

Primeira Leitura                                                                                       Act. 18. 1-8

Lia housi livro Apóstolo sira nia hahalok

Iha loron hirak neba, Paulo sai housi Atenas hodi liu ba Corinto. Iha neba, nia hetan judeu ida naran Áquila housi rai Ponto ho nia féen Priscília nebé to’o housi Itália mai, tan embo’ot Cláudio fó sai ordem ida, atu judeu hot-hotu tenki sai housi Roma. Paulo ba buka sira, tan sira nia serbisu hanesan. Nia hela iha sira nia uma hodi hahu hala’o serbisu. Sira nia serbisu mak halo tenda. Maski nune’e, Paulo ko’alia bei-beik iha sinagoga iha sábado-sábado hodi hakarak dada judeu ho grego sira ba fiar.

Wainhira Silas ho Timóteo to’o housi Macedónia, Paulo saran-an lós deit ba haklaken doutrina ba judeu sira katak Jesus mak Messias. Tan sira la kohi rona nia, sira dehan áat hasouru nia. Ne’e duni, Paulo liki rai-rahun housi nia hatais ba sira hodi dehan: “Imi nia ran sei nakfakar iha imi nia ulun leten; ba ne’e, ha’u la iha sala ida. Hori ohin ba oin, ha’u sei buka de’it ema gentio sira”. Sai housi neba, ba hela iha Tício Justo nia uma. Nia ema ida nebé hamta’uk Maromak no tur besik sinagoga. Hafoin, Crispo, ulun sinagoga nian, simu fiar ho nia fámilia tomak no mós ema barak housi Corinto nebé rona Paulo nia lian, tan iha fiar ba Maromak, sira hotu simu kedas baptismo.

Maromak Futar Lia.

 

Salmo Responsorial                                                                                                                                            Sal. 97(98). 1, 2-2ab, 3cd-4 (R. cf. 2b)

Refrão : Na’i hatudu maksoyn ba povo sira hotu!!! Repete-se

Ou            Aleluia!

 

Hananu ba Na’i knananuk foun ida,

Basá Nia halo buat mesak kmanek.

Nia futar liman lós manan funu;

Manan ho Nia futar liman santo. Refrão

 

Na’i fó hatene Nia Maksoyn;

Nia hatudu justiça ba nação sira hotu.

Nia hanoin Nia domin no laran lós,

Ba Israel uman. Refrão

 

Rai-ikun rai-ulun sasin

Maksoyn Ita Maromak Nian.

Rai tomak haklaken Na’i,

Haklalak ho ksolok no hananu. Refrão

 

Aclamação                                                                                                                                                                                                                   Jo. 14. 18

Refrão : Aleluia, Aleluia!!! Repete-se

                  Ha’u  sei la husik imi hanesan oan kiak sira; Na’i dehan;

                  Ha’u sei fila fali ba imi no imi sei haksolok. Refrão   

 

Evangelho                                                                                                                                                                                                              Jo. 16. 16-20

+ Na’i Jesus Cristo nia Evangelho tuir São João :

Iha tempo neba, Jesus hateten ba escolante sira: “La kle’ur tan, imi sei la haré ona Ha’u no la kle’ur tan, imi sei haré fali Ha’u”.

Nune’e, escolante sira hateten ba malu: “Sá mak Nia dehan ne’e: ‘La kle’ur tan, imi sei la haré ona Ha’u no la kle’ur tan, imi sei haré fali Ha’u no Nia hateten tan: ‘Ha’u ba Ha’u Aman.’” Tan ne’e, sira husu ba Nia: “Sá mak hakarak hateten ho liafuan ‘la kle’ur ne’e’? Ami la hatene buat nebé Ita hateten!” Jesus hatene ona katak sira hakarak husu ba Nia, tan ne’e, Nia hateten ba sira: “Imi hotu sei buka atu hatene Ha’u Nia liafuan sira ne’e: ‘La kle’ur tan, imi sei la haré ona Ha’u no la kle’ur tan, imi sei har’e fali Ha’u’. Tebes duni, Ha’u dehan ba imi: Imi sei tanis ho neon sala teb-tebes, maibé, mundo sei haksolok. Imi sei terus ho neon sala, maibé imi nia terus, sei nakfila ba ksolok”.

Lia Maksoyn.

Leave a Reply

Your email address will not be published. Required fields are marked *