shadow
Diocese de Dili > NOTÍCIAS > LETURA DIÁRIA > Sábado, VI Semana da Páscoa

Sábado, VI Semana da Páscoa

ANO B

 

Primeira Leitura                                                                                    Act. 18. 23-28

Lia housi livro Apóstolo sira nia hahalok

Horik tiha loron balun iha Antioquia, Paulo sai fali housi neba, liu ba Galácia no Frígia, la’o lemo-lemo iha fatin neba, hodi fó aten barani ba escolante sira.

La kle’ur, to’o iha Éfeso, judeu ida naran Apolo, housi Alexandria, ema matenek nebé hatene kona ba Escritura, simu matenek wa’in tuir nia dalan, laran manas kona ba doutrina; nia hanourin di’ak no lós tebes kona ba Jesus, maski nia hatene de’it baptismo housi João Baptista. Nia hahu hanourin ho kmanek wa’in tebes iha sinagoga. Priscila ho Áquila, nebé rona nia ko’alia, sira lori Apolo ba sira nia uma, hodi haktuir lolós ba nia Maromak Nia dalan.

Tan Apolo hakarak liu ba Acaia, maun-alin sira fó lia menon kmanek ba nia atu sira hakerek ba escolante sira iha neba atu simu netik nia. Hodi Maromak Nia tulun, nia ajuda di’ak tebes sarani sira iha neba, wainhira nia to’o. Hodi aten barani no hodi lialós housi Escritura, nia hanourin hodi dada ba dalan di’ak judeu sira katak Jesus mak Messias.

Maromak Futar Lia.

 

Salmo Responsorial                                                                                                                                                  Sal. 46(47). 2-3, 4-5, 6-7 (R. cf. 8ª)

Refrão : Maromak mak rai tomak nia Na’i!!! Repete-se

Ou            Aleluia!

 

Povo hotu, basá liman ba,

Hawélok Maromak ho haklalak ksolok nian;

Basá Na’i, Aás liu tebes, ita hamta’uk Nia,

Liurai boot be ukun rai tomak. Refrão

 

Maromak mak Liurai rai hotu nian,

Hananu ba Nia knananuk ida hahi nian;

Maromak ukun nação hotu;

Maromak tur iha Nia Kadunan Santo. Refrão

 

Halibur-an hamutuk liurai oan sira povo nian,

Ho povo, Maromak Abraão nian;

Rai nia kbiit na’in sira Na’i Nian,

Ita Maromak ukun buat hotu. Refrão

 

Aclamação                                                                                                                                                                                                                   Jo. 16, 28

Refrão : Aleluia, Aleluia!!! Repete-se

                  Ha’u sai housi Aman no mai iha mundo. Oras ne’e,

                  Ha’u husik hela mundo hodi fila hi’as ba Aman. Refrão    

 

Evangelho                                                                                                                                                                                                           Jo. 16. 23b-28

+ Na’i Jesus Cristo nia Evangelho tuir São João :

Iha tempo neba, Jesus hateten ba escolante sira nune’e: “Tebes, tebes duni, Ha’u dehan ba imi: Buat nebé imi husu ba Ha’u Aman, Nia sei haraik ba imi hodi Ha’u naran. To’o oras ne’e, imi seida’uk husu buat ida hodi Ha’u Nia naran. Imi husu, imi sei simu atu imi nia ksolok sai nakonu. Ha’u hateten buat hotu ba imi hodi aiknanoik. Tempo to’o ona atu Ha’u la ko’alia tan hodi aiknanoik ba imi; Ha’u sei hateten lolós de’it ba imi kona ba Aman. Iha loron ne’e, imi sei husu hodi Ha’u Nia naran.

Ha’u sei la hateten tan ba imi katak, Ha’u sei husu ba Aman tan imi, basá Aman rasik hadomi imi, tanba imi iha domin ba Ha’u no fiar katak Ha’u mai housi Maromak. Ha’u sai housi Aman no mai iha mundo. Oras ne’e, Ha’u husik hela mundo hodi fila hi’as ba Aman”.

Lia Maksoyn.

Leave a Reply

Your email address will not be published. Required fields are marked *