shadow
Diocese de Dili > NOTÍCIAS > LETURA DIÁRIA > VI DOMINGO DA PÁSCOA

VI DOMINGO DA PÁSCOA

ANO B

 

Primeira Leitura                                                                        Act. 10, 25-26. 34-35. 44-48

Lia housi livro haktuir Apóstolo sira nia hahalok :

Iha loron hirak nebá, Pedro tama daudaun ba Cornélio uman, Cornélio mai simu nia. Hafoin, Cornélio hakneak iha Pedro oin, hakru’uk to’o rai. Maibé, Pedro foti Cornélio, hodi dehan: “Hamriik tiha! Ha’u mos ema ida hanesan ó!” Pedro hateten teni: “Tebes duni, Maromak la fihir ema ida! Maibé, iha fatin hotu-hotu, ema nebé moris ho hamta’uk hodi moris tuir dalan justiça, ema ida ne’e sei monu duni ba Maromak laran!” Pedro sei ko’alia hela nune’e, Espírito Santo tun ba sira hotu nebé rona daudaun lia foun. Sarani Judeu sira nebé mai hamutuk ho Pedro, hakfodak, tan haré Espírito Santo tun mos ba ema gentio sira. Tan sira rona ita ko’alia lia oi-oin hodi hahí Maromak. Nune’e, Pedro hahú dehan:  “Bele  ema  ruma  hewai  wé  Baptismo nian  ba sira nebé simu tiha ona Espírito Santo, hanesan ita? Nia haruka atu ema hotu simu Baptismo hodi Na’i Jesus Cristo nia naran. Nune’e, sira husu ba nia atu hela loron ruma ho sira.

Maromak Futar Lia.

 

Salmo Responsorial                                                                                                                                                                 Sal. 97(98), 1. 2-3ab. 3bc-4

Refrão : Iha povo sira oin, Maromak hatudu Maksoyn!!! Repete-se

 

Hananu ba Na’i knananuk foun ida,

tan Nia halo buat kmanek oi-oin.

Nia liman kwanan barani teb-tebes,

Nia liman kwanan asu-wa’in tebes. Refrão

 

Maromak haklaken nia naran ba ema tomak,

Maromak hatudu nia justiça ba ema tomak.

Maromak laran di’ak nafatin ba Israel,

Maromak hanoin nafatin Israel. Refrão

 

Rai hotu-hotu hatene no haré Maromak hahalok.

rai hotu sasin duni Maromak kbiit.

Rai hotu haksolok duni ho Maromak,

rai hotu haklalak duni ba Maromak. Refrão

 

Segunda Leitura                                                                                                                                                                                                   1 Jo. 4, 7-10

Lia housi São João nia surat :

Doben sira: Ita sei hadomi malu, tamba domin mai housi Maromak, basá, ema nebé hadomi, ema ne’e  mai housi Maromak, nia hatene duni Maromak. Ema nebé la hadomi, ema ne’e la dauk hatene Maromak, basá, Maromak katak domin na’in. Na’i Maromak hatudu nia domin mai ita nune’e: Nia haruka nia Oan Mane mesak mai mundo, atu ita bele hetan moris housi nia Oan. Domin Maromak nian  mak ida ne’e:  Laós ita mak hadomi uluk Maromak, maibé, Maromak mak hadomi uluk ita, hodi haruka nia Oan rasik mai, nu’udar Maksoyn, atu kasu ita salan.

Maromak Futar Lia.

 

Aclamação                                                                                                                                                                                                                   Jo. 14, 23

Refrão : Aleluia, Aleluia!!! Repete-se

                   Ema nebé hadomi Ha’u, sei halo tuir Ha’u lia-fuan;

                  Ha’u Aman sei hadomi nia, ami sei mai horik ho nia. Refrão

 

Evangelho                                                                                                                                                                                                                 Jo. 15, 9-17

+ Na’i Jesus Cristo nia Evangelho nu’udar São João haktuir :

Iha tempo nebá, Jesus lia tun ba Escolante sira dehan: “Nu’udar Aman Maromak hadomi Ha’u, nune’e mos Ha’u hadomi imi. Imi hadomi nafatin Ha’u ba. Imi halo tuir Ha’u nia ukun-fuan sira, mak imi bele hadomi nafatin Ha’u nu’udar Ha’u halo tuir Aman Maromak nia ukun-fuan, Ha’u hadomi Nia nafatin. Ha’u dehan sai ba imi, lia hirak ne’e, atu imi bele haksolok ho Ha’u, atu imi nia ksolok boot to’o rohan. Ha’u nia ukun-fuan mak ida ne’e: Imi sei hadomi malu hanesan Ha’u hadomi imi. Ema ida la bele hadomi liu ema nebé mate tan nia belun sira. Imi halo tuir Ha’u haruka, mak imi Ha’u nia belun tebes. Ha’u la bolu ona imi atan, tan atan sira la hatene sira na’in halo sá. Imi, Ha’u bolu belun, tan Ha’u dehan ona ba imi, lia hotu nebé Ha’u rona housi Ha’u Aman. Laós imi mak fihir Ha’u, maibé Ha’u mak fihir imi, haruka imi atu ba halo di’ak barak, atu imi nia hahalok di’ak horik nafatin. Nune’e, buat hotu nebé imi harohan ba Aman Maromak hodi Ha’u nia naran, Aman Maromak sei haraik tebes ba imi. Ida ne’e mak Ha’u haruka: Imi sei hadomi malu”.

Lia Maksoyn.

Leave a Reply

Your email address will not be published. Required fields are marked *