shadow
Diocese de Dili > NOTÍCIAS > LETURA DIÁRIA > VII DOMINGO DA PÁSCOA

VII DOMINGO DA PÁSCOA

ANO B

 

Primeira Leitura                                                                                      Act 1, 1-11

Lia housi livro haktuir Apóstolo sira nia hahalok :

Teofilo, iha hau nia livro ida uluk, hau hakerek ona kona ba Jesus nia hahalok no Nia hanourin. Hau hakerek houri hun kedas too loron nebe hodi Espírito Santo nia roman,, hanourin tiha Apóstolo sira nebe Nia fihir nanis molok Jesus sae ba lalehan. Terus tiha hotu, Jesus moris hela, mosu ba Apóstolo sira oi-oin no dala barak, Jesus mosu ba sira iha loron hatnulu nia laran, hodi hanorin sira kona ba Reino Maromak nian. Iha loron ida, sira sei han hela, atu  la bele hadook-an husi Jerusalém, maibé, atu horik iha neba hodi hein, tui lia fuan Aman Maromak hakotu tiha ona. Jesus dehan:”Hau fo hatene tiha ona ida nee ba imi. João sarani hodi we, maibé, la kleur, imi sei sarani hodi Espírito Santo”. Sira be halibur hela iha neba, hahu husu ba Jesus:”Nai, oras nee mak Ita Boot sei foti hodi hahi reino Israel?”. Jesus hatan ba sira:”laos imi mak sei hatene loron eh oras nebe Aman Maromak tau hela iha Nia liman”. Maibé, Espítio Santo tun ba imi, imi simu tiha Nia kbiit mak imi sei sai sasin iha Jerusalém, iha Judeia, iha Samaria tomak no iha rai hotu hotu”. Nee hotu tiha, sira hateke hela ba Jesus nebe sae daudaun ba lalehan. Kalohan ida mai taka tiha Jesus housi sira matan. Tan sira hateke hela ba lalehan, wainhira Jesus sae daudaun ba leten, mane nain rua hatais mutin hotu, mosu mai sira, hodi hateten nunee:”Mane Galileia sira, tan sa imi hateke hela ba lalehan? Nudar imi hare daudaun Nia sae ba lalehan, Jesus ida nee duni mak sei fila fali mai!”

Maromak Futar Lia.

 

Salmo Responsorial                                                                                                                                                                         Sal 46(47)2-3, 6-8. 8-9

Refrão : Maromak hiit-an ba leten, ema haklalak daudaun;

                  Nai hiit-An, korneta lian daudaun. Repete-se

 

Povo hotu-hotu baku liman ba,

Ho ksolok hanai Maromak ba!

Tan Maromak kmanek tebes,

Nia ukun mundo rai-klaran. Refrão

 

Maromak sae ba lalehan,

Mai ita hananu haksolok,

Hananu ba Maromak, hananu,

Hananu ba ita nia Liurai! Refrão

 

Nai liurai ukun mundo hotu,

Hananu knananuk foun!

Maromak tahan ema rai hotu,

Tur iha Nia fatin kmook! Refrão

 

Segunda Leitura                                                                                                                                                                                                      Ef 1, 17-23

Lia housi são Paulo nia surat ba sarani sira iha Êfeso :

Maun-alin sira: Hau harohan ba Nai Jesus Cristo nia Maromak katak, ba Aman Maromak kbiit nain, atu haraik ba imi naroman no matenek, atu imi bele hatene lolos Nai Maromak  . Hau harohan atu imi nia laran bele nakloke, atu imi hatene lolos tan sa Nai Maromak bolu imi, atu imi hatene sukat soyn wain nebe Maromak haraik ba santo sira, atu imi hatene lolos sukat kbiit wain nebe Maromak saran mai ita fiar nain sira. Maromak hatudu Nia kbiit wain tebes iha Cristo. Iha loron nebe Nia halo Cristo moris hias iha mate sira leet. Iha loron neba, Nia halo Cristo hatoda-An ihaNia sorin kwanan, iha lalehan. Iha loron nebe Nia hahi Cristo liu dook anjo ulun sira, liu dook naran hotu hotu nebe ema bele temi iha mundo ohin nian no iha mundo aban bain rua nian. Nai Maromak mak halo sasan hotu hotu monu ba Cristo nia ain; Nai Maromak hahi Cristo liu buat hotu hotu. Nai Maromak hahi Nia, nudar ulun kreda nian. Kreda mak Cristo nia liman ain, kreda mak Cristo tomak, katak, Cristo, ida be haberan hotu iha ema hotu hotu.

Maromak Futar Lia.

 

Aclamação                                                                                                                                                                                                      Mt. 28, 19ª. 20b

Refrão : Aleluia, Aleluia!!! Repete-se

                  Na’i lia tun dehan: “Ba hanourin povo hotu-hotu,

                  Ha’u sei hela ho imi kalan loron, to’o mundo ne’e lakon”. Refrão

 

Evangelho                                                                                                                                                                                                              Mc 16, 15-20

+ Nai Jesus Cristo nia Evangelho nudar São Marcos haktuir :

Iha tempo nebá, Jesus mosu ba Apóstolo sanulu resin ida, hodi dehan ba sira:”imi ba rai rai, hodi haklaken Lia Foun ba ema hotu-hotu. Ema nebe fiar, hodi simu Baptismo, ema nee hetan duni rahun diak; maibé, ema nebe la fiar, ema nee sei hetan rahun aat duni. Ema sira nebe fiar, sei bele halo buat foun hirak nee; housi Hau nia naran, sira sei duni sai diabo, sira sei koalia lia mesak foun, sira sei kaer samean sira, sira hemu karik buat moruk no lanuk ruma, sira sei la hetan susar ida. Sira sei tau liman ba ema moras sira, ema moras sira sei hetan fali isin diak!”. Nee hotu tiha, Nai Jesus sae ba lalehan, hodi hatodan-An iha Aman Maromak nia sorin kwanan. Hafoin, Apóstolo sira lao lemorai, hodi haklaken lia foun. Nai Maromak lao hamutuk ho sira, hodi hametin Lia-Foun iha ema sira laran hodi milagre oi-oin.

Lia Maksoyn.

Leave a Reply

Your email address will not be published. Required fields are marked *