shadow
Diocese de Dili > NOTÍCIAS > LETURA DIÁRIA > Terça-Feira, IX Semana Tempo Comum

Terça-Feira, IX Semana Tempo Comum

ANO B

 

Primeira Leitura                                                                             2Ped. 3. 12-15a, 17-18

Lia housi São Pedro nia segunda Surat

Doben sira: imi nia moris no imi nia hamta’uk Maromak tenki sai lós, hodi hein no halo mosu lalais mai Maromak nia loron nia hi’it an mai, uainhira lalehan sira ahi han lakon no ahi han fitun fulan sira no sei naben. Maibe tuir Na’i nia promessa, ita hein lalehan foun no rai foun, iha nebe justiça sei hela ba nafatin. Ne’eduni doben sira, hodi hein buat sira ne’e, haka’as an atu moris la fo’er no sala laek iha Na’i futar oin, iha dame laran. Imi haré ita Na’i nia laran luak nu’udar maksoin ba imi. Ne’e duni, imi nebe hatene ona buat ida ne’e, matan moris ba  atu imi nia laran metin la bele namlele, hafoin husik ema áat nia hanourin la lós ne’e lori lakon imi;18 maibe sai boot ba iha graça no matenek  Jesus, ita Na’i no Maksoin; ba Nia glória ohin no iha loron rohan laek nian. Amen.

Na’i nia futar Lia.

 

Salmo Responsorial                                                                                                                                                   Sal. 89(90). 2, 3-4, 10, 14, 16 (R. 1)

Refrão : Na’i, ita mak ami mahein, Housi otas ba otas!!! Repete-se

 

Molok halo foho sira,

No moris rai no mundo,

Houri uluk to’o rohan laek,

Na’I, Ita mak Maromak. Refrão

 

Ita halo ema fila ba rai rahun

Hodi deehan: “ Fila ba, Adão nia oan sira”.

Tinan rihun ida iha ita futar oin,

Hanesan loron  houri séhik nian be liu,

Hanesan vigília ida iha kalan. Refrão

 

Ami moris nia naruk  la liu tinan hitunulu:

Sira be rosak, to’o de’it ualunulu;

Maibe serbisu no kole folin laek mak ua’in,

Nebe liu lalais no ami mós lakon. Refrão

 

Houri dadersan, habosu ami ho ita laran -luak,

Atu ami neon ksolok iha lorloron.

Hatudu ita biit ba ita atan sira,

Ba ita oan sira, ita biit-liurai. Refrão

 

Aclamação                                                                                                                                                                                                                Ef. 1. 17, 18

Refrão : Aleluia, Aleluia! Repete-se

                 Ita Na’i Jesus Cristo nia Aman

                  leno ita laran nia matan atu ita bele haré esperança

                  nebé Maromak bolu ba ita. Refrão

 

Evangelho                                                                                                                                                                                                            Mc. 12. 13-17

† Na’i Jesus Cristo nia Evangelho nu’udar São Marcos haktuir:

Iha tempo neba, sira haruka fariseu balun no Herodes nia emar sira atu halo nia ibun sala. Sira ne’e to’o iha, sira dehan ba Nia, “Mestre, ami hatene katak ita ema lós, no la ta’uk ema ida; ita la fihir ema nia oin, maibe hanourin de’it dalan Na’i Nian. Tenki selu imposto ba César ka lae? Ami sei fó ka la fó?” hatene tiha sira nia laran makerek, Nia hatan ba sira, “Tan sá imi koko Ha’u? Lori osan mai Ha’u atu Ha’u bele haré!” Sira lori osan mai. Nia dehan ba sira, “ Ida ne’e se nia ilas no hakerek?” “César nian”, sira hatan. “Ne’e duni”, Jesus dehan ba sira, “ Fó fali ba César buat nebe César nian; no ba Maromak buat nebe Maromak nian!” Sira hakfodak kona ba Nia.

Lia Maksoyn.

Leave a Reply

Your email address will not be published. Required fields are marked *