shadow
Diocese de Dili > NOTÍCIAS > REFLEXÃO > SAI FINI BA SOCIEDADE

SAI FINI BA SOCIEDADE

REFLEXÃO & LEITURAS DOMINGO COMUM XI/Ano B/2018

Ez 17,22-24;  2Cor 5,6-10;  Mc 4,26-34

Primeira Leitura                                                                                                                                                                                                 Ez. 17, 22-24

Lia Husi Livro Profeta Ezequiel:

Na’i Maromak dehan nune’e: “ Housi ai-cedro boot nia tutun, housi nia sanak sira be aas liu ba, Ha’u rasik sei ba ku’u nia sanak nurak ida, hodi lori ba kuda iha foho aas tebes ida. Iha foho aas tebes Israel nia mak Ha’u sei kuda. Nia sanak sei sai barak hodi fo fuan tebar no sei sai ai cedro buras tebes. Mano sira hotu sei mai halo nia knuuk iha leten, mano sira io-oin sei hamahan-an iha nia sanak sira nia mahan. No ai-hun sira hotu rai luan nian sei hatene katak Ha’u mak Na’i; hatun ai-hun sira be aas liu, no foti ba aas  ai-hun sira be tun liu, halo maran ai-hun matak no hamoris fali ai- hun maran. Ha’u mak Na’i, dehan tiha, sei halo tuir duni.

Maromak Futar Lia.

 

Salmo Resposorial                                                                                                                                                                  Sal. 91(92), 2-3. 13-14. 15-16

Refrão :  Na’i, di’ak tebes hahí ita boot!!! Repete-se

 

Di’ak tebes duni  hahí Na’i

Hahí ita naran, Maromak letes aas ba;

Dader haklaken ita laran luak,

Kalan hawelok ita laran mós. Refrão

 

Ema di’ak naburas hanesan tali klobor,

Hamriik los nu’udar cedro Líbano nian.

Kuda hela iha Na’i  kadunan,

Sira sei naburas iha Maromak ita Na’i nia futar oin. Refrão

 

To’o otas naruk sira sei fuan tebar,

Moris  nafatin buras nafatin

Atu haklaken katak Na’i ha’u fatuk inan sala laek;

Tesi lia la sala. Refrão

 

Segunda Leitura                                                                                                                                                                                               2 Cor.  5, 6-10

Lia husi São Paulo nia Surat ba sarani sira iha Corinto:   

Maun alin sira: Ita laran metin tebes nafatin; ita hatene katak wainhira ita horik iha isin ida ne’e,  ita moris  nu’udar   ema hado’ok-an housi  Na’i, basá, ita la’o tuir roman fiar nian, la la’o tuir haré matan nian. Ho laran metin ida ne’e nafatin, ita hakarak hadook-an husi isin ida ne’e atu ba horik hamutuk ho Na’i. Tan ne’e, ita mak horik nafatin iha ita isin ka hadook-an tiha  housi nia ita sei buka atu fo ksolok nafatin ba Na’i. Ita hotu sei mosu iha Cristo tribunal oin, hala’o iha moris isin nian.

Maromak Futar Lia. 

 

Aclamação

Refrão : Aleluia. Aleluia! Repete-se

                  Fini mak Maromak Futar Lia, Cristo mak ema nebé kuda;

                  Ema hotu nebé hetan Nia, hetan moris rohan laek. Refrão

 

 Evangelho                                                                                                                                                                                                            Mc.  4, 26-34

Na’i Jesus Cristo nia Evangelho nu’udar São Marcos haktuir:

Iha tempo nebá, Jesus  dehan ba ema lubun boot: “ Reino Maromak nian, hanesan ema ida nebé kári fini iha rai. Toba eh hamriik, iha kalan eh iha loron, wainhira fini moris no boot ba daudaun, nia la hatene tuir moris oin sá. Rai hamoris mesak nia, uluk liu nia hun, tuir  mai nia fulin, ikus liu trigo tasak iha fulin. Wainhira to’o ona tempo atu ko’a, nia tau kedas tudik atu ko’a; toos pronto ona”. Jesus dehan mós nune’e: “ Ba  sá, ita sei compara Reino Maromak nian? Housi aiknanoik ida nebé ita bele hatudu? Hanesan mostarda musan ida nebé atu kuda iha rai, nia mak musan kiik liu hotu ih arai. Maibé, kuda tiha hahú moris, sai boot liu hotu modo sira iha toos laran, hodi soe tahan mesak bobot nebé manu sira lalehan nian bele hamahan-an  iha nia mahan”. Jesus haklaken Maromak  nia lia-fuan ba sira ho aiknanoik barak hanesan ne’e, tuir sira nia bele. Nia la ko’alia ba sira se lae housi aiknanoik de’it, maibé, dehan lós hotu ba eskolante sira, Wainhira sira mesak.

Lia Maksoyn.

 

 

 Reflexão:

SAI FINI BA SOCIEDADE

                São Marcos nia Evangelho Domingo semana nee haktuir Jesus nebe hanorin Reino Lalehan utiliza ai-knanoik fini ba ema sira be tuir Nia. Geograficamente, Palestina nudar rai maran (rai deserto), fatuk mak barak, rai henek deserto ho ai-horis balu, udan ben menus no loro matan manas demais. Atu ema entende Reino Lalehan, Jesus koalia ai-knanoik tuir contexto rai Palestina iha altura nee. Jesus hanorin kona ba Reino Lalehan tanba iha altura neba, situação política-Economia halo povo Judeu hein namanas Reino Lalehan nudar sociedade ida nebe nakonu ho dame, hakmatek no próspero (Makmur).  

               Jesus apresenta Reino Lalehan nebe Nia haklaken no sei harí ho maneira simples tuir situação povo momento neba maioria agricultor. Tos nain eh agricultor ida hatene muito bem oinsa kuda ai horis ruma no kari fini iha sira nia tos atu fo fuan diak. Fini nebe kari, natureza (rai) mak sei processa hodi moris no fo resultado diak ba maluk toos nain sira. Iha ponto ida nee, toos nain hola papel hodi cuida eh tau matan deit hodi fo resultado diak. Oinsa processo ai nee moris, toos nain mos la hatene tuir. Toos nain hatene simu resultado husi processo ida nebe nia rasik la hatene.

               Iha Jesus nia tempo, sociedade judaica neon metin hodi hein Reino Lalehan (a vinda de um Messias). Kona ba esperança ba messias nee, cada grupo nebe existe iha altura nebá, kaer conceito (visão) nebe diferente ho maneira interpretação rasik. História relata katak; Palestina iha altura neba ocupa husi Romano. Tanba nee mak existe grupo balu nebe hanoin katak; so ho funu deit mak bele duni sai Romano husi Palestina atu bele provoca Reino Lalehan estabelece iha mundo.

               Husi parte grupo Fariseu nian, sira firme iha posição katak; Reino Maromak nian sei mai wainhira sociedade moris no cumpri tuir saida mak hakerek iha Lei Torá (Lei Moises nian).   

               Além de nee, existe mos grupo seluk nebe prefere moris mesak iha deserto (rai fuik maran); haketak-an husi sociedade hodi livre husi tentação. Sira fiar katak ho maneira nee mak Reino Lalehan bele estabelece lalais tuir ema hotu nia esperança. Iha parte seluk, grupo ida nee mos halao moris maneira ida nee fanaticamente. Iha Timor Leste, lalaok ida nee ita hanaran Radical isin iha aspecto religioso, política, cultural no social.

               Ho existência grupo hirak nee, hamosu diferença visão até conflito de interece iha sira leet. Hahalok ida mak ikus mai hamosu divisão (perpecahan) entre sira iha sociedade maske sira mesak origem judeu deit. Nunee, sira haluha tiha katak diferença entre sira contradis ho ideal Reino Lalehan nebe sira deseja. Ita sei hanoin mos relato Evangelho Domingo semana kotuk kona ba ema escriba sira duun Jesus hanesan ema bulak, maske Jesus explica dadaun sentido reino Lalehan nebe basea ba unidade no paz iha ema ida-idak no paz iha sociedade.

               Reflecte tiha relato Evangelho Domingo semana nee, saida mak ita foti hanesan bukae (bekal) ba ita nia moris sarani basea ba mensagem Evangelho Domingo semana nee? Ba contexto tempo ohin loron nian, haré ba desenvolvimento tecnológico no progresso sociedade nebe iha, mensagem Evangelho kona ba FINI, nee relevante no actual tebes atu sarani ida idak hatene saida mak precisa halo hodi cumpri dever nudar sarani Católico.

              Desafio boot nebe ohin loron ita observa iha sociedade mak nee; diversidade no diferença grupo até hamosu conflito existe iha ita nia rai doben Timor Leste. Mosu conflito grupo arte marciais, mosu conflito millitante partido, mosu conflito entre estudante, mosu conflito entre patraun ho trabalhador, mosu conflito entre secte religiosa ho grupo religioso seluk, mosu conflito entre bairro,….nst.

               Realidade hirak nee, se ita basea ba espírito Evangelho Domingo semana nee, ita mos bele dehan katak fenómeno hirak nee impede mos idela Reino Lalehan iha Timor Leste maski maioria Timor Ona Cristão Católico. Oinsa sociedade bele hakmatek, oinsa sociedade bele avança lalais hanesan rai seluk se ita Timor oan deit hare malu matan la mos? Hanoin hodi comporta didiak moris iha rai doben ida nee. Amu Bispo D. Basílio do Nascimento dala ida hatete iha nia homilia katak; Timor nee husi liur maioria católico maibé , tama didiak too laran, mesak fingido no gentio deit.

               Mentalidade balun nebe ohin loron sai viral iha Media social (MedSos) mak atitude estudante ho universtário balu nebe ba visita foho Ramelau maibé, estraga Natureza, fokit ai funan natural sira, sunu rai, namoria malu, soe lixo, hakuak estátua Nain Feto. Fenómena nee hamosu pro contra iha sociedade tanba (1). Sira estudante maibé atitude hanesan ema analfabeto (buta huruf), (2). Sira católico maibé, hatudu acto devoção hanesan ema religião seluk nebe defama Fiar Católica nian. Oinsa ita bele realiza Timor Leste nebe mais Católico se ita rasik defama ita nia fiar? Oinsa bele hamosu unidade no paz iah Timor se Timor Oan rasik trata malu iha Media Social tan deit partido la hanesan? Oisna Timor bele ukun rasik-an lolos se economia, ema china mak mai domina? Ada apa di balik Mercado Livre?. Oinsa Timor bele forte se Timor Oan balu nebe ao mesmo tempo sarani Católico sai traidor ba nia rain rasik?

               Reflecte ba Evangelho Domingo semana nee (Domingo XI tempo Comum ano B), ita precisa halo introspecção hodi hodi oinsa comporta-an didiak nudar sarani Católico nebe lori paz, hametin unidade, sai exemplo ba ema seluk. Nunee sarani ida precisa halo nia moris hanesan FINI ida nebe útil ba sociedade Timor atu fo fuan diak iha âmbito Igreja Católica liliu sociedade Timor. Tau iha ita nia neon katak; fini nebe diak se fo fuan barak no sai ai-mahon ba criatura sira seluk. Assim Seja e Bem Haja (ILMBAFS)

Leave a Reply

Your email address will not be published. Required fields are marked *