shadow
Diocese de Dili > NOTÍCIAS > LETURA DIÁRIA > Segunda-Feira, XI Semana Tempo Comum

Segunda-Feira, XI Semana Tempo Comum

ANO B

 

Primeira Leitura                                                                                       1Rs. 21. 1-16

Lia housi primeiro livro Liurai sira nian

Iha loron hirak neba, Nabot, Jezrael nia emar, nia iha to’os uvas ida iha cidade ne’e. To’o ne’e hela iha liurai Acab Samaria nian, nia uma sorin ba. Acab dehan ba Nabot nune’e: “ Fó ó nia to’os uvas  nian ne’e mai ha’u, atu ha’u hodi halo to’os modo nian ida, basá, besik kedasha’u nia uma. Ha’u sei fó fali ba ó to’os uvas nian ida di’ak liu, eh hodi osan selu nia folin ó hakarak karik”. Nabot hatan ba Acab: “Maromak tahan ha’u atu fó ba ó ha’u aman sira nia liman-rohan”.

Acab fila ba uma nonok hodi hirus, tan Nabot, Jezrael nian, dehan ba nia: “Ha’u sei la fó ba ó, ha’u aman sira nia liman-rohan” Toba tiha iha toba fatin, fila oin ba didin hodi lakohi han. Nia féen Jezabel ba hasouru nia hodi husu ba nia: “Tan sá ó hela muron nune’e hodi lakohi han?” Nia hatan: “Ha’u ba to’o Nabot, Jezrael nian hodi dehan ba nia: ‘Ó fó mai ha’u ó nia to’os uvas nian hodi troca ho osan, selae ó hakarak karik, ha’u sei fó to’os seluk ida iha nia fatin maibé, nia hatan mai ha’u: ‘Ha’u sei la fó ba ó ha’u to’os uvas nian’. Nia féen Jezabel fila ba nia, dehan: “Maibé, oras ne’e, la’os ó mak Israel nia liurai? Hamriik ba, han no fuan ksolok ba, basá, ha’u sei fó to’os uvas nian be Nabot, Jezrael nian ne’e, ba ó”.

Jezabel hodi Acab nia naran, hakerek tiha surat ida, tau tiha selu liurai nian ba. Hafoin, haruka surat ne’e ba katuas no matenek sira iha cidade nian nebé hôrik besik Nabot. Nia hakerek nune’e iha surat laran: “Imi hala’o jejum ida ba hodi tau Nabot iha povo nia oin. Imi tau iha nia oin ema áat na’in rua, nebé sei kesar nia nune’e: ‘Ó fó malisan ba Maromak no ba liurai’. Hafoin, imi lori nia ba liur hodi tuda nia ho fatuk to’o mate.

Ema sira housi cidade nebé Nabot hela, katuas sira no ema matenek sira nebé hôrik iha neba, sira halo tuir duni buat nebé Jezabel hakerek iha surat be haruka ba sira ne’e. Sira halo jejum ida, tau tiha Nabot iha povo nia oin; hafoin, ema áat na’in rua ne’e mai hamriik iha nia oin hodi kesar ba povo nune’e: “Nabot fó malisan ba Maromak no ba liurai”. Tan ne’e, sira lori nia sai housi cidade hodi tuda nia ho fatuk to’o mate. Hafoin, sira haruka fó hatene Jezabel kata ema tuda Nabot ho fatuk to’o mate. Wainhira hatene tiha katak ema tuda Nabot ho fatuk, Jezabel ba dehan ba Acab: “Hamriik ba, ba simu to’os uvas nia nebé Nabot lakohi fó ba ó hodi troca ho osan, basá, nia la moris, mate tiha ona. Wainhira rona katak nia mate tiha ona, Acab hamriik tun ba Nabot, Jezrael nian, nia to’os uvas atu simu to’os ne’e.

Maromak Futar Lia.

 

Salmo Responsorial                                                                                                                                                                        Sal. 5. 2-3, 5-6, 7 (R. 2b)

Refrão : Na’i, rona ha’u lian harohan nian!!! Repete-se

 

Na’i, rona ba ha’u liafuan,

Sée tilun ba ha’u hakilar;

Rona ha’u lian harohan nian,

Ha’u Maromak no ha’u Liurai. Refrão

 

Ita la’os Maromak ida be hadomi áat;

Ema áat la hetan fatin iha Ita,

Nia sei la hela metin iha Ita oin,

Basá, Ita hakribi salan. Refrão

 

Ita hakribi ema áat sira,

Ita hamohu sira be laran metin iha bosok.

Ema laran makerek no ema áat sira,

Na’i hakribi. Refrão

 

Aclamação                                                                                                                                                                                                     Sal. 118(119). 105

Refrão : Aleluia, Aleluia! Repete-se

                  Na’i, Itaboot nia liafuan mak ahi oan mai ha’u nia ain fatin,

                  Roman ba ha’u nia dalan. Refrão

 

Evangelho                                                                                                                                                                                                               Mt. 5. 38-42

Na’i Jesus Cristo nia Evangelho nu’udar São Mateus haktuir:

Iha tempo neba, Jesus lia tun ba escolante sira: “Imi rona ema uluk dehan: ‘Matan selu ho matan, nehan selu ho nehan’. Maibé Ha’u dehan ba imi: ‘keta simu hasouru ema áat. Ema ruma bása karik o nia hasan lós, sée tan o nia hasan karuk ba nia. Ema ruma hakarak haksesuk malu ho ó atu hadau ó nia faru karik, fó tan ó nia tais ba nia. Ema ruma obriga karik ó atu la’o kilometro ida, la’o ho nia kilometro rua ba. Fó ba ema nebé husu, keta fila kotuk ba ida nebé hakarak impresta buat ruma”.

Lia Maksoyn.

Leave a Reply

Your email address will not be published. Required fields are marked *