shadow
Diocese de Dili > NOTÍCIAS > LETURA DIÁRIA > Sexta-Feira, XI Semana Tempo Comum

Sexta-Feira, XI Semana Tempo Comum

ANO B

 

Primeira Leitura                                                                              2Rs. 11-4, 9-18, 20

Lia housi segundo livro Liurai sira nian.

Iha loron hirak neba, Atália, liurai Acazias nia inan,uainhira rona katak nia oan mane mate ona, nia haruka oho hotu derasan liurai nian. Maibe, Joseba, liurai Jorão nia oan feto no Acazias nia feton, káer tiha Joás, Acazias nia oan mane, hodi hasai sub-subar housi liurai nia oan sira leet nebe ema besik atu oho; lori nia ba hela hamutuk ho atan iha fatin toba templo nian. Nune’e, nia subar nia housi Atália nia matan, no nia la mate. Nia hela tiha iha tempo Na’i nian hamutuk ho Joseba, hasubar-an iha tinan neen nia laran, uainhira Atália ukun hela.

Ba tinan hitu, na’ilulik Joaiadá bolu tiha na’i ulun sira funu-na’in sira no guarda sira nian, hodi haruka sira mai iha nia oin iha Na’i nia templo. Nia halo acordo ida ho sira, husu ba sira atu halo juramento no hatudu ba sira liurai nia oan mane.

Na’i ulun sira halo tuir duni buat nebe na’ilulik Joaiadá haruka. Sira ida-idak simu tiha sira emar, la’os de’it sira be atu tama serbisu iha loron neba, maibe sira hotu nebe husik ona serbisu iha loron neba, sira hotu mai hasouru na’ilulik Joaiadá. Na’ilulik fó ba sira diman no kalili sira David nian nebe iha hela Na’i nia templo. Guarda sira hakneak tiha, ida-idak ho diman no kalili iha liman, hamriik housi sorin ba tasi-feto to’o tasi-mane Templo nian, hale’u altar no templo. Hafoin, Joaiadá lori liurai nia oan mane mai liur, tau coroa no sinal sira liurai nian ba nia. Sira foti nia no kose mina ba nia nu’udar liurai; hafoin, sira basá liman hodi hakilar,”Viva liurai!” Uainhira rona povo hakilar, Atália la’o ba Na’i nia templo, ba fatin be povo halibur. Nia hateke ba hodi haré liurai hamriik hela iha fatin áas hanesan bai-bain. Iha liurai nia sori-sorin, ulun sira no trombeta sira, Atália les tiha nia hatais, hodi hakilar: Traição, Traição!”. Na’ilulik Joiadá fó orden hirak ne’e ba ulun sira be comanda hela soldado sira: “Lori nia ba formatura nia liur, ema ruma tuir nia karik, ho surik oho tiha Na’i nia Templo’. Sira tau liman ba Atália, lori nia to’o uma liurai housi odamatan kuda sira nian. Iha neba, ema oho tiha nia.

Na’ilulik Joiadá halo tiha moruk ida ho Na’i, liurai no povo. Tan moruk ne’e, povo tomak hatan sai Na’i Nia povo. Hafoin, halo mós moruk ida ba liurai ho povo. Nune’e povo tomak nação nian ba Baal nia templo hodi harahun tiha nia; halo nakrahun tiha hotu Baal nia altar no nia ilas sira; iha altar oin, sira oho tiha matã be na’i lulik Baal nia.

Tuir mai, na’ilulik Joiadá tau sentinela iha Na’i nia templo. Povo tomak haksolok teb-tebes, no cidade tomak moris hakmatek. Ema ho surik oho tiha Atália iha uma liurai.

Na’i nia futar Lia.

 

Salmo Responsorial                                                                                                                                                      Sal. 131(132). 11-14, 17-18 (R. 13)

Refrão : Na’i hili Sião nu’udar Nia hôrik fatin. Repete-se

Na’i halo moruk ida ho David,

Lia moruk ida nebe sei hela ba nafatin;

“Ha’u sei hatur iha ó nia trono,

Oan ida housi ó nia uma-kain”. Refrão

 

“ó oan sira rai diadiak karik Ha’u nia moruk,

No Ha’u Nia hakaran nebe hatudu ona ba sira,

Ó nia oan sira mós,

 Sei tur ba nafatin iha ó nia trono”! Refrão

 

Na’i hili tiha ona Sião,

Hakarak atu hela nu’udar Nia hôrik fatin.

“ida ne’e mak Ha’u hôrik fatin ba nafatin”.

Ha’u sei hela iha ne’e, tan Ha’u hili ona nia. Refrão

 

Ha’u sei haraik ba David derasaan biit ua’in ida.

Ha’u sei naroma kroman ba ida be Ha’u tau mina.

Ha’u sei haksolar nia funu baluk sira,

Maibe iha nia ulun, Ha’u sei tau coroa ida. Refrão

 

Aclamação                                                                                                                                                                                                                     Mt. 5. 3

Refrão : Aleluia, Aleluia! Repete-se

                  Ksolok ba sira be kiak iha espírito basá reino Lalehan sira nian. Refrão

 

Evangelho.                                                                                                                                                                                                            Mt. 6. 19-23  

†  Na’i Jesus Cristo nia Evangelho tuir São Mateus.

Iha tempo neba, Jesus hateten ba escolante sira: ”imi keta haloot rikusoi iha rai, nebe ular no ferujem han mohu no na’okten sira sobu hodi na’uk. maibe imi halibur ba imi an rikusoi iha Lalehan, iha nebe ular no ferujem la hamohu sira, na’okten sira mós lasobu hodi na’uk. Basá iha fatin nebé ó nia rikusoi hela, ó nia fuan mós sei hela iha neba. Ó nia isin nia ahi oan mak ó nia matan; ó nia matan di’ak karik, ó nia isin tomak sei nabilan. Maibe ó nia matan áat karik, ó nia isin tomak sei iha nakukun. Ne’e duni, roman nebe iha ó laran nakukun karik, nakukun ne’e sei sai boot duni!

Lia Maksoyn.

Leave a Reply

Your email address will not be published. Required fields are marked *