shadow
Diocese de Dili > NOTÍCIAS > OPINIÃO > “POVO NIA ESPERANSA BA GOVERNO DAUALU: SAI LÍDER BA EMA HOTU”

“POVO NIA ESPERANSA BA GOVERNO DAUALU: SAI LÍDER BA EMA HOTU”

Por Martinho do Nascimento Obe “Sfunit”

 

Introdução

               Timor Leste restaura nia loron independensia iha loron 20 de Maio de 2002 significa fulan Maio liuba moris ona tinan 16 nudar estado de direito democrático. No estado ida ne’e hetan naran iha constituisaun ka lei-Inan artigo dahuluk ho naran “Repúblika”. Naran Repúblika ne’e hetan vincula hosi princípio fundamental jurídico no política iha artigo dahuluk alinea 1 be dehan katak “Repúblika demokratika Timor-Leste katak Estado ida ne’ebé demokrátiku, soberanu, ukun-an no ida-mesak, harí hosi povo nia hakarak no iha respeitu ba dignidade ema moris ida-idak nian”. Hosi conceito jurídico no politíca hirak ne’e, hakerek nain hakarak elabora artigo ida simplês ne’e nudar contribuição ida ba processo desenvolvimento nasional.

               Basea ba artigo dahuluk konstituisaun ka Lei-Inan hateten momós katak Timor Leste nudar nasaun demokrátiku(…), harí hosi povo nia hakarak no iha respeitu ba dignidade ema moris nian. Significa Timor Leste hamrik nudar nasaun ida tan povo timor nia hakarak hodi ukun sira nia an rasik, no tan respeitu ema moris ida-idak nia dignidade. Atu atinge moris properidade, harmonia no estabilidade precisa sistema governasaun ida nebe diak no profissional.

 

  1. Político sira husu poder hosi povo liu sufrágio universal

                Lógica demokrátika katak soberania ka poder político mós hatuur metin iha povo nebe consagra kedan iha artigo 2 Constituisaun RDTL be dehan katak “Soberania haktuur metin iha povo, ne’ebe hala’o soberania ne’e tuir Lei-Inan haruka”. Então hosi ne’e ita bele hetan ita nia ponto de encontro katak povo mak nain ba poder hotu nebe estado no governo iha ba; alias “A democracia é o governo do povo, pelo povo e para povo” (Abraham Lincoln). Hosi ne’e político sira husu poder ba povo liu hosi dalan sufrágio universal. Maibe antes ne’e, político sira hala’o campanha eleitoral hodi influência povo liu hosi sira nia programa político atu povo bele delega sira nia poder hodi ukun rai ida ne’e. Ikus mai Povo hili duni partido ka coaligasaun ida atu ukun nasaun Timor Leste. Povo hili ka delega sira nia poder ba político sira tan povo iha confiansa boot katak ukun nain sira sei serbisu ba bem comum ema hotu nian liuliu moris iha economia nebe sustentavel, garantia justisa ba ema hotu, garante liberdade no igualdade ba ema hotu tuir prinsipio política nebe iha. Tanba ne’e povo sira nia esperansa ba político sira atu sai líder ba ema hotu la’os sai líder ba partido nian ka grupo ruma nian. Maibe questão mak ne’e sei líder político sira tau importância liu ba interese grupo ka partido nian então comprimissio iha campanha eleitoral ne’e sai nudar ÓPIO DO POVO OU ÓPIO POLÍTICA tuir conceito karl Marx hodi manan deit votus. Tanba ne’e povo hein político sira nia comprimisso política katak serbí ema hotu tuir princípio demokrátiku, moral no ética de servisu nian katak sai líder ba ema hotu. Nudar Filósofo Betrand Russel afirma katak “o poder político é a produção dos efeitos desejados ou seja o conjunto dos meios que permitem conseguir os efeitos desejados”. Significa katak poder ne’ebé político sira iha ne’e mai hosi povo no uza poder atu produs efeito desejado mak servisu ba ema hotu nia hakarak alias exerce funsaun política tuir vontade geral povo nian.

 

  1. Povo husu político sira: Sai Líder ba ema hotu

               Tanba ne’e povo iha mehi boot ba iha VIII Governo ka Governo daualu ne’e tenke sai líder ba ema hotu, la’os povo hili tiha hafoin ba ukun halo fali discriminação do cor partido, raça, famíliarismo no seluk tan. Povo hili la’os tanba interese partido nian maibe povo hili partido ka coligasaun tan interesse estado no bem comum povo nian: liuliu buka garante moris economia sustentavel, assegura paz, garante justisa ba ema hanesan, buka reduz corupção, garante edução ne’ebé qualidade no profissional ba ema hotu. Tuir Herry Zudianto Walikota Yogyakarta haktuir katak “seorang pemimpin adalah wakaf (korban) politik: ia diserahkan dan dikorbankan agar dapat menjadi berkah bagi bangsanya”. Ne’e significa katak líder sira ne’e bainhira hetan ona confiansa atu ba ukun sei sai nudar vítima ba política. Tanba sá? Tan ukun nain sira sai vítima ba política tan bainhira hetan ona votu atu ba ukun, sira tenke husik hotu sira nia interese privado, partido no liliu cargo partido nian hodi sai líder ba ema hotu alias tau ass interesse estado hodi atinge bem comum ema hotu nian. Tan filosofia liderança nian katak ukun nain sira tenke conciente lolos katak bainhira sai ona ukun nain iha nasaun ne’e tenke sente an “memilik dan dimiliki povo tomak, biar povo ne’e mai hosi partido A ka B. Maibe pelo contrário que, ita hare realidade ne’ebé mak acontece halo com que líder político barak lakohi sai vítima ba política alias “wakaf politik” tan bainhira nia sai ukun nain nia serbí deit nia partido, nia tau interesse privado aas liu do que interesse comum. No exemplo concreto lakohi sai vítima ba política mak KARETA PRADO III legislatura halo sai nudar propriadade privado, então ida ne’e la’os interesse ema hotu nia no la’os mós sai líder ba ema hotu. Tanba ne’e sira nia comprimisso eleitoral iha momento campanha sai nudar SLOGAN ka CURTINA deit atu habosok povo hodi povo hili sira. No mais exagerado mak partido balu halo coaligasaun pre-eleitoral maibe depois eleição iha parlamento nasional fahe malu tiha fali sai nudar partido. Ne’e hatudu katak partido hirak ne’e la respeitu povo nia poder nebe delega ba político sira tan sira tau importancia liu ba sira nia interesse partido, privado no grupo nian. Nune’e ita bele dehan katak sira halo coaligasaun pre-eleitoral ho objetivo atu hetan deit votus hodi ba tur iha parlamento hodi representa sira nia an rasik la’os representa povo. Partido hirak ne’e ita bele hanaran sira nudar “PARTIDO OPORTUNISTA”, tan sira nia promessa política sai nudar SLOGAN, CURTINA OU ÓPIO POLÍTICA deit ba povo.

               Ho hanoin ida ne’e líder sira tenke tau iha hanoin katak povo hili atu sai líder ba ema hotu ou sai líder ba nivel hotu-hotu la’os povo hili ita atu sai serbidor ba ita nia militante no simpatizante sira maibe povo hili tanba atu serbí ema hotu. Tanba povo hili ukun nain sira la’os tanba interesse partido nian maibe tanba interese comum, interesse estado, interese povo nian no interesse nasional. Ne’eduni  ukun nain sira iha VIII Governo ne’e buka atu sai serbidor neutro, imparcial, no responsabilidade tanba sai membro executivo ne’e sai ona ema público nian, ema hotu nian, ema hosi partido hotu nian la’os ona ema partido ka coligasaun ida nian ka grupo balu ninian. Tan povo nia hakarak mak ukun ne’e tenke imparcial, transparancia, honestidade, responsabilidade no hatuur justisa hanesan ba ema hotu. Tanba ne’e ukun nain sira liuliu orgão executivo bainhira simu kna’ar hosi partido atu hala’o função nudar Menistro ka Secretado Estado ruma indiretamente hanoin ona katak “oras ne’e ha’u sai ona vítima ba poder tanba ha’u tenke serbí ema hotu”. Sai vítima ba questão política tanba líder político sira tenke husik hotu cargo partido nian, interese partido nian no interesse privado hodi servisu ba interese comum, defende ema hotu nia dignidade perante governo. No tipo lideransa ne’e mak povo hein, povo mehi atu sai realidade iha VIII Governo ne’e.

               Tan filosofia poder nian hosi estado demokrátiku nian atu sai líder ba ema hotu mak halo buat hotu ho matenek no fuan, rona entidade estado no sociedade civil atu desenvolve nasaun ne’e tuir princípio nasaun nian, no halo cooperação internasional ho nasaun sira seluk iha mundo. Ne’eduni poder ne’e la’os ona questão política maibe ne’e questão oinsa atu sai serbidor diak ba cidadão hotu-hotu. Ho dalan ida ne’e, então líder político iha nia argumentação nebe forte ba recunhecimento legitimidade do poder. Tan líder político sira ne’ebé iha legitimidade poder mak líder sira nebe iha capacidade intelctual atu halibur ka halo sociedade tomak partisipa iha processo desenvolvimento nasional. Ou ita bele dehan líder nebe iha legitimidade poder política enquanto nia sente halo parte ba ema hotu ka sai líder ba ema hotu. Tanba líder nebe serbí deit nia partido então líder ka governante ne’e la iha legitimidade lideransa ba ema hotu tanba nia viola povo nia poder hodi tau interese deit ba nia partido, grupo no família. Tanba ne’e basea ba comprimisso política ka programa ne’ebé partido ka coligasaun sira iha, povo hein katak programa hirak ne’ebé promessa ona iha campanha eleitoral sei la sai deit ÓPIO POLÍTICA maibe sei sai realidade ka sei concretiza iha sociedade nia moris. Então povo hein atu líder sira sei compremitido hodi hadia duni povo nia moris diak, asegura paz no estabilidade, hadia liu tan desenvolvimentu umanu (edukasaun no saude ho kualidade no padraun moris ida ás) no asegura ekonomia inkluziva no sustentavel.

 

Conclusão

               Atu conclui deit katak lógica demokrátika katak soberania ka poder político ne’e povo nian nebe consagra kedan iha artigo 2 Constituisaun RDTL be dehan katak “Soberania haktuur metin iha povo, ne’ebe hala’o soberania ne’e tuir Lei-Inan haruka”. Então hosi ne’e ita bele hetan ita nia ponto de encontro katak povo mak nain ba poder hotu nebe estado no governo iha ba; alias “A democracia é o governo do povo, pelo povo e para povo” (Abraham Lincoln). Significa poder ne’e mai hosi povo no serbí fila fali ba povo. Tanba “seorang pemimpin adalah wakaf (korban) politik: ia diserahkan dan dikorbankan agar dapat menjadi berkah bagi bangsanya”. Ne’e significa katak líder sira ne’e bainhira hetan ona confiansa atu ba ukun sei sai nudar vítima ba política, vítima tanba tenke husik interese privado hotu hodi tau interese comum aas liu buat hotu, ida ne’e mak esperansa povo nian ba Governo Daualu*. (Martinho do Nascimento Obe, estudante ISFIT Fatumeta, Faculdade de Filosofia(2013-2016), actualmente reporter no announcer iha RTK Malo’a Dili, Timor Leste), Opinião Pessoal.Iha sujestaun bele haruka mai iha address email:cono.mutis@gmail.com, ou bele contacto:+67077749662/75253302).

Referencia

  • Contituição República Democrática de Timor Leste
  • SUSENO, Franz Magnis, Etika Politik, Prinsip-prinsip Moral Dasar Kenangan Modern, Edisi ke-7, PT Gramedia, Jakarta, 2003
  • RAWLS John, A Theory of justice, (Dasar-dasar Filsafat Politik untuk menwujudkan kesejahteraan social dalam Negara)
  • ZUDIANTO, Herry, Kekuasaan sebagai Wakaf Politik

Leave a Reply

Your email address will not be published. Required fields are marked *