shadow
Diocese de Dili > NOTÍCIAS > REFLEXÃO > DOMINGO XII A.B (Lc 1, 57-66.80)-NATIVIDADE DE SÃO JOÃO BAPTISTA

DOMINGO XII A.B (Lc 1, 57-66.80)-NATIVIDADE DE SÃO JOÃO BAPTISTA

               Maun alin sarani doben sira,ita halibur-an hamutuk iha ne’e hodi clebra nafatin misterio sira ita nia fiar nian be hatudu iha Maromak ninia obra salvação nebe halo nafatin fatin mai ita ema sira hodi halo ita moris ba nafatin. Maromak soi nafatin ita ema sira husi tempo ba tempo ho ninia hahalok maksoin nian.

               Leitura sira domingo ohin nian koalia mai ita kona ba ninia hahalok maksoin ne’e nebe nia halo ba ita ema sira por excelência, la halo uluk nanain ba mundo  no buat sira seluk. Ita ema sira hetan nafatin fatin dahuluk iha Maromak ninia atenção, iha Maromak ninia hakarak, iha Maromak ninia hahalok. Ita bele dehan iha Maromak ninia moris.

               Primeira leitura haklaken Maromak nebe hili atu halao ninia obra maksoin nian ne’e liu husi ita ema sira hodi halo ita moris concretamente iha Maksoin ne’e duni. Na’i dehan “O sei sai hau nia atan nebe sei halos tribu  Jaco nian lao iha dalan los, hau sei halo o sai roman rai rai nian atu o lori hau nia maksoin to daet ba rai hotu”.

               Maun alin sira Maromak mak sai autor principal ba ninia hahalok Maksoin ne’e, ita ema sira sai deit instrumento ka Atan ida nebe lori ninia Maksoin ne’e ba fatin hotu. Profeta Isaias be iha ninia tempo sai Maromak ninia manuain ba knar ida ne’e reconhece katak ida ne’e los duni, hahalok ne’e Maromak ninian, kbiit tomak Maksoin nian mai husi Maromak ita sira sai deit atan diak nebe Rona no halo buat sira nebe Maromak hakarak atu ema sira hotu iha mundo rai klaran tomak hetan salvação. Nune’e mak nia dehan “Nai Maromak halo hau nia ibun kroat hanesan espada ida, Subar hau iha ninia futar liman, halo hau sai tiha besi kroat ida no tau tiha hau iha ninia fatin-Maromak mak hau nia kbiit” atu halo ninia hakarak kona ba soi ema sira husi susar laran.Ita mak halao ka moris iha Maromak ninia hahalok Maksoin nian maibe keta haluhan katak Maksoin ne Maromak ninian, Maromak mak hakarak, Maromak mak hili no Maromak mak halo iha ita. Nune mak ita bele moris duni tamba ninia hahalok maksoin ne’e. Ita hatene lolos ona katak Maksoin ne’e Maromak nian no mai husi Maromak ba ita ema sira hotu nebe hakarak simu no moris iha Maksoin ne’e.

               Segunda leitura lori ita ba hatene klean liu tan katak Maromak la promete deit atu soi ita ema sira maibe Maromak halo tuir duni ninia promessa ne’e concretamente iha ita nain Jesus Cristo. Ba ita nia beiala sira Maromak promete no mai ita ema sira Maromak halo concreto duni.

               Maun alin sira Maromak ninia maksoin ne’e ita hotu koko iha ita nia moris, iha ita nia hadomi malu, iha ita nia rona malu, iha ita nia haraik-an ba malu, iha ita nia tulun malu, iha ita nia hakiak ambiente unidade, iha ita nia la desconfia malu, iha ita nia fiar malu no iha ita nia laran metin no fiar ba malu no ba Maromak nebe rohan laek. Maromak haraik tiha ona maksoin ne’e mai ita maibe hare ba realidade dala wain ita hetan katak ita dook hela husi maksoin ne’e. Ita dook husi Maksoin ne’e laos tamba Maromak mak la haraik mai ita maibe iha ita nia hahalok sira ita mak hatudu duni dalan moris nian sira nebe lao dook no hasesan husi Maromak ninia maksoin ne’e. Ho liafuan badak ita dehan ita rasik mak lakohi simu maksoin ne’e hodi hadok an nafatin deit husi Maromak ninia maksoin. Maromak ninia maksoin ne’e laos ideia ida, laos mos hakarak ida, laos mos mehi ida nebe ita buka no hakarak atu hetan, maibe Maromak ninia hakarak ne’e moris ida, moris ida nebe ho Maromak ninia tulun no ho ita nia hakarak moris tuir Maromak ninia hakarak ne’e ita bele moris concretamente duni iha Maromak ninia Maksoin ne’e. Moris iha Maromak ninia maksoin lori laran metin, ksolok, lori domin, lori paz rohan laek ba ema hotu hotu.

               Ida ne’e mak nudar exemplo ida ita hare Maromak halo ba familia Zacarias ho Isabel nian hanesan ita rona haktuir mai ita iha evangelho ohin nian. Maromak hakonu maksoin iha sira nia uma laran iha sira nia oan João Baptista nebe moris mai atu sai Maromak ninia manu ain no atu husi nia ema wain tebes bele hatene no hetan Maromak ninia Maksoin. Buat nebe familia zacarias nian la hanoin kona, buat nebe sira hanoin imposivel ona atu mosu, maibe Maromak hamosu iha sira le’et, providência Maromak nian.

               Maun alin sira hanesan ita mos koko ona sira nia experiência ne’e. Dala barak ita hanoin katak tamba ita ema sala nain no tamba moris be susar los ne’e halo ita imposivel atu hetan Maksoin, maibe Maromak halo mai ita buat be ita hanoin imposivel ne’e. Katak Maromak halo nafatin mai ita ninia makosin lolos loron ba loron iha momento ba momento, percisa deit mak sai fiel ba Maromak, Fiar metin iha Maromak, hadomi nafatin Maromak no rona hodi halo tuir Maromak ninia hakarak ne’e iha tempo no situação hotu hotu hanesan Zacarias no Isabel hatudu ona mai ita hosi sira hetan duni Maromak ninia laran luak no Maromak ninia maksoin.

               Mai ita buka atu iha ita nia moris tomak ita tau fiar, laran metin no domin iha Maromak hodi lao tuir nafatin nia iha ninia hakarak sira hodi nune’e Maromak ninia maksoin ne’e bele moris metin iha ita nia le’et iha buat hotu nebe ita bele halo hodi moris no mos iha buat hotu nebe ita laiha kbiit atu halo hodi moris maibe Maromak halo nafatin ba ita hodi moris. Laos ita mak halo maksoin ne’e maibe ita moris tuir deit no Maromak be bele halo hotu hotu ne’e mak realiza ninia Maksoin ne, basa laiha buat ida imposivel ba Maromak, ba Maromak buat hotu bele deit. Amen.

Leave a Reply

Your email address will not be published. Required fields are marked *