shadow
Diocese de Dili > NOTÍCIAS > LETURA DIÁRIA > Segunda-Feira, XII Semana Tempo Comum

Segunda-Feira, XII Semana Tempo Comum

ANO B

 

Primeira Leitura                                                                            2Rs. 17. 5-8, 13-15ª, 18

Lia housi segundo livro Liurai sira nian

Iha loron hirak neba, Salmanasar, liurai Assíria nian, tama hodi bi’it iha rai tomak hodi liu ba cidade Samaria, nebé nia taka hale’u tiha iha tinan tolu nia laran. Iha tinan sia Oseias nia ukun nian, liurai Assíria mai hadau Samaria hodi lori tiha ema Israel sira ba Assíria. Lori sira ba hela iha Hala, besik Habor, mota Gozan nian no iha cidade sira Média nian.

Mosu tiha rahun áat ida ne’e, tan ba Israel oan sira halo sala hasouru Na’i, sira nia Maromak, nebé hasai sira housi rai Egipto no soi sira housi housi biit Faraó, liurai Egipto nian. Sira adora fali maromak rai seluk nian, hodi moris tuir fali hahalok povo sira nebé Na’i duni tiha housi sira oin, no hahalok sira nebé liurai sira Israel nian hatama.

Maibé Na’i fó hatene ba Israel no Judá, housi Ninia profeta no sira nebé Nia haruka mai no hanoin hirak ne’e: “Imi hakribi imi nia hahalok áat sira ba, imi rai didiak Ha’u nia ukunfuan sira no hanourin sira, tuir lei sira nebé Ha’u haraik tiha ona ba imi housi profeta sira nebé serbi Ha’u”. Maibé, sira lakohi halo tuir, sira laran sai tós liu fali sira nia bei-ala sira nian, nebé la fiar iha Na’i, sira nia Maromak. Sira hakribi Na’i nia hanourin, no moruk nebé Na’i hametin tiha ona ho sira nia bei-ala sira. Tan ne’e, Na’i hirus teb-tebes hasouru Israel hodi soe tiha nia ba dook housi nia oin. Uma fukun Judá nian de’it mak hela.

Maromak Futar Lia.

 

Salmo Responsorial                                                                                                                                                       Sal. 59(60). 3, 4-5, 12-13 (R. 7b)

Refrão : Na’i, tulun ami ho Ita liman lós no soi ami!!! Repete-se

 

Ita hakribi tiha ami, Maromak,

Ita sobu tiha ami sira,

Tan Ita laran nakali;

Maromak, halibur fali ami ba! Refrão

 

Ita halo nakdoko ami rain hodi halo fera nia,

Hadi’a fali nia áat sira ba be atu mohu ona,

Ita fó todan ba Ita povo ho susar oi-oin,

Nia hemu tiha duni tua moruk nian. Refrão

 

Sé mak dada dalan selae Ita, be hakribi ami!

Sé mak lori ami funu na’in sira, selae Ita.

Haraik tulun mai ami atu hasouru funu baluk,

Basé, ema nia tulun folin laek. Refrão

 

Aclamção                                                                                                                                                                                                                    Heb. 4. 12

Refrão : Aleluia, Aleluia! Repete-se

                  Maromak nia liafuan moris no book maka’as,

                  bele hatene borus ema nia hanoin no hakaran fuan nian. Refrão

 

Evangelho                                                                                                                                                                                                                     Mt. 7. 1-5

Na’i Jesus Cristo nia Evangelho nu’udar São Mateus haktuir:

Iha tempo neba, Jesus hateten ba nia Escolante sira: “Keta hanoin áat ema, atu ema la bele hanoin áat ema, atu ema la bele hanoin áat imi. Basá imi hanoin áat ema karik, ema mós sei hanoin áat imi: imi sukat ema nune’e, nune’e mós mak ema sei sukat imi. Tansá ó haré du’ut lahan iha ó nia maluk nia matan laran, maibé la haré aikabelak iha ó rasik nia matan laran? Oinsá ó bele dehan ba ó nia alin: ‘Husik ha’u hasai du’ut lahan housi ó nia matan laran,’ wainhira aikabelak sei hela iha ó rasik nia matan laran? Laran makerek, hasai uluk knana’in aikabelak housi ó nia matan laran, hafoin mak ó sei haré hodi hasai du’ut lahan housi ó nia maluk nia matan laran”.

Lia Maksoyn.

Leave a Reply

Your email address will not be published. Required fields are marked *