shadow
Diocese de Dili > NOTÍCIAS > OPINIÃO > FAMÍLIA MAK ESCOLA PRIMEIRA TUIR CONCÍLIO VATICANO II, DECRETO CONCILIAR “GRAVISSIMUM EDUCATIONIS”

FAMÍLIA MAK ESCOLA PRIMEIRA TUIR CONCÍLIO VATICANO II, DECRETO CONCILIAR “GRAVISSIMUM EDUCATIONIS”

Por Martinho do Nascimento Obe

 

Introdução

            Relógio moris nian la’o tuir ritmo era globalização nebe avansa liu iha ciência, tecnologia no mundo digitalização. Ho desenvolvimento mundo virtual ka mundo digital halo mundo ida uluk luan nakfila sai klot tiha, iha nebe halo buat hotu sai transparante, relativo, contigente, no temporal. No termo moderno nebe babain ita rona husi tilun ba tilun ka tatoli hosi ibun ba ibun katak “sei moris ne’e goja tiha deit mate tiha hotu ona”. Tanba sá? Tan ema hanoin katak depois de moris iha mundo ne’e hotu ona, la folin ona no isin dodok ona alias  la iha esperança ba moris, além de moris iha mundo ne’e. Ida ne’e mak consequencia ka efeito hosi hosi mundo contigente, relativo ou aspecto negativo hosi mundo digital ne’e. Ne’eduni oinsá ho Família sira nia posição perante situação ne’e, será que família sira halai ses ka prontu hasoru? Ho dalan saida mak família sira sei hasoru? Ne’eduni atu hasoru desafio mundo digitalização família mak sai nudar escola primeira ba valor moris nian: valor moral, social, cívico no valor cultural iha nebe hetan fonte ka roman hosi ita nia cultura rasik, Bíblia, Concílio Vaticano II no doutrina social Igreja nian. Basá Bíblia, Concílio Vaticano no doutrina social mak sai we-matan moris ba ema fiar nain sira nian. Liuliu hanesan família cristã nebe fiar ba Maromak, la halai ses hosi Bíblia, tan Bíblia mak família nia abut, we-matan, roman no moris. Tan hosi familia mak sei hahoris viveiro líder nebe civilizado  no devoto.  Tanba ne’e hakerek nain sei lori ita bo’ot sira ba aprofunda assunto balu iha artigo ida ne’e: primeiro, Familia mak fonte ba vocação hodi serbisu iha Igreja no ba sociedade. Segundo, Inan-Aman nudar formadora no educador dahuluk ba oan sira. Terceiro, família nudar centro ba comunhão, participação no evangelização. Ikus liu, Família nudar santuário ba moris fiar nian.

 

  1. Familia mak fonte ba vocação hodi serbisu iha Igreja no ba sociedade política

            Tanba sá Familia mak sai fonte ba vocação hodi serbisu iha Igreja no ba sociedade política? Ita hotu mai hosi Família ida, Entah, mai hosi família nebe ricaço ka kiak, classe nobre ka baibain ou elit no seluk tan. Mesmo que iha diferênça condição maibe ita sempre mai hosi família ida. Tanba ne’e família ida existe tan domin no hosi domin mós mak mosu ema iha mundo. Ne’eduni Concílio Vaticano II, Decr. Apostolicam actuositatem, 11: AAS 58 (1966) 848 afirma katak família sai nudar célula primeira e vital da sociedade Significa katak família mak sai centro moris atu fo iis ba comunidade da fé no sociedade política alias “célula primeira e vital da sociedade”. Tanba hosi família mak sei hahoris viveiros povo babain, religioso/a, académico, no político. Hosi ne’e ita hetan ita nia ponto de encontro katak família mak sai fonte ba vocação hotu; ezemplo concreto, vocação nudar mestre, polícia, Nailulik, presidente, menistro no seluk tan. Los duni katak Maromak bolu ita, iha kna’ar nebe la hanesan maibe iha nia fim ida, de factro, atu serbí Maromak nia povo.

 

  1. Inan-Aman nudar formadora no educador dahuluk ba oan sira

            Mundo ohin loron mosu crise de identidade, cultural, política no moral tan consequência hosi mundo virtual. No ida ne’e dala barak fo influência ba labarik, joven feto no mane hodi moris iha crise cultural, valor moral no identidade. Maibe nudar ema cristão, família mak sai ema educadora ou formadora primeira atu hanorin oan sira hodi moris tuir cultura cristã alias moris tuir fiar cristão. Iha Concílio Vaticano II, Decreto Conciliar “Gravissimum Educationis” No.VI dehan “Orang tualah yang pertama-tama mempunyai kewajiban dan hak yang pantang diganggu gugat untuk mendidik anak-anak mereka”. Significa katak canonicamente, família ka Inan-Aman mak iha obrigação no direito primordial ka direito fundamental atu educa oan sira. Tan ne’e Concílio Ecomênico continua afirma dehan “a família é, portanto, a primeira escola das virtudes sociais de que sociedades têm necessidade”. Neduni canonicamente família mak escola dahuluk atu forma oan sira integralmente hodi hamoris conciência kona ba virtude social no moral atu oinsá haburas relasaun fraternal ho ema seluk. No liu hosi ne’e oan sira sei sai promotor ba moris fiar, cívico no ético nian ba ema seluk iha processo desenvolvimento nian. Escritor Medellín valoriza família nudar promotora ba desenvolvimento enquanto escola dahuluk ba virtude social sira. No ida ne’e hetan nia fundamento iha Concílio Vaticano II, Decreto Gaudium et Spes nebe dehan “família é uma escola do mais rico humanismo sob a conciência”. Ne’e katak família mak escola nebe rico liu iha aspecto humana, intelectual, moral no social. Hanesan Papa João Paulo II haktuir iha nia exortação apóstolica Christifideles laici be dehan “A família delineia-se, no desígnio do Criador, como «lugar primário da “humanização” da pessoa e da sociedade» e «berço da vida e do amor». Significa katak família sai nudar fatin primeiro ba humanização ema ida no sai centro ba moris cívico no moral iha família, sociedade no nasaun. Tanba ohin loron, ita hare ba realidade joven feto no mane moris la tuir ona valor cristão, valor cívico no moral. Ezemplo, iha tempo domingo oan sira la missa, hemu tua hodi halo violência no la respeito ema liuliu la respeito Aman-Inan. Vicio hirak ne’e mosu tanba educação no formação husi família mak la rigoroso no la klean. Analogicamente atu oan sira moris tuir valor moris ema nian liuliu valor cristão nian, família precisa harí uma kain ida iha fatuk ho airin besi nian no labele harí iha rai henek leten sela’e laloran facebook, WhatsApp, Sinetron bele sobu iha loron ida. Família nebe mak harí nia uma iha fatuk ho airin besi doutrina moral no ética nebe diak sei prontu atu hasoru laloran mundo virtual ho civilizado no devoto.

 

  1. Família mak sai centro de comunhão, participação no evangelização

            Mundo ohin loron ne’e laiha tan ona linha fronteira. Tan mundo virtual  ka digital especialmente mundo facebook, WhatsApp, Messenger, Twitter no seluk tan mak ukun ona estudante, joven feto no mane, kaben nain sira hodi haluha tiha sira nia obrigasaun hanesan estudante ka kaben nain. Significa hamoris comunicação ho ema nebe do’ok do que ema nebe besik iha nia sorin. Tuir lolos, teknologia ne’e ajuda tebes ita iha parte ciência nian, maibé ema utiliza la tuir nia função mak hamosu impato  nebé sobu família no sociedade. Nia consequência hosi uza sala tecnologia mak hamosu efeito prostituisaun, alcoolismo, droga, tráfico humano, abandona oan sira, esterilização no aborto provocado. Ne’eduni atu assegura família hosi mundo digital ne’e, educação família nian sai ponto determinante. Tanba família  mak sai fatin ka centro de comunhão, participação no evangelização tuir Evangelii Nuntiandi. Ne’e significa katak família mak sai sujeito no objecto ba evangelização ba doutrina da fé, moral, ética política no valor sira seluk. Tanba ne’e família sira tenke cria condição atu halo comunicação ka diálogo conjugal, diálogo entre Aman-Inan ho oan sira alias “comunidade da fé no política”, liu hosi haburas domin entre família sira, no fo catequese ba oan sira atu toman lê no reflete bebeik liafoun diak iha moris. Tan oan nebe educado, civilizado no devoto nia sei prontu atu tama iha mundo digital ka mundo virtual ho valor cívico no moral. Nune’e Inan-Aman tenke haka’as an atu conciêncializa oan sira kona ba valor humana especialmente fo sentido ba nia moris liu hosi evita buat nebe aat no halo buat nebe diak. Ida ne’e mak princípio moral ka ético tuir São Tomás de Aquino nia ética da relação humana nian.

 

  1. Família mak sai nudar Santuário ba moris

            Nune’e Santo Domingo dehan nune’e “a família é o santuário da vida, onde se forja o futuru da humanidade e se concretiza a fronteira decesiva da Nova evangelização”. Ne’e significa katak família nebe preparado ho modo de ser cristão sei concretiza evangelização foun ba ema hotu. Tan ne’e “a família tem sido como e é o lugar e a escola de comunhão, fonte de valores humanos e cívicos, lar onde a vida humana nasce e acolhe generosa e responsavelmente”(DAP, No. 302). Confirmado katak família sai nudar fatin ida nebe ema atu hamutuk, fatin ida nebe ema hahú moris no hahú aprende ho responsavel valores moris nian. Todavia família cristã la’os deit sai fatin dahuluk ba domin no moris maibe família mos sai nudar escola dahuluk ba moris fiar nian. Hanesan dehan “a família como primeira escola da fé”(DAP, No. 302). Tanba ne’e oan sira nebe devoto, civilizado no respeito nain sei hatudu sinal santuário viva atu ema imita nudar modelo ba moris iha família.

 

Conclusão

            Hanesan família cristã nebe diak presija kuda liafuan osan mean ba oan sira nia fuan atu sira sai hanesan cidadão nebe diak iha nebe sempree imita modelo Cristo nian, atu hatene fo an ba ema seluk nia diak tamba Cristo. Tan foin sae sira nudar chave ba sucesso tomak desenvolvimento uma laran, sociedade no nasaun nian. Hanesan Papa Francisco iha nia visita apostólica ba iha nasaun Brazil hodi hosik hela mensagem osan mean ba mundo católico tomak nebe  dehan; jovem temque iha Comprimisso ba futuro dehanA juventude é a janela pela qual o futuro entra no mundo. É a janela e, por isso, nos impõe grandes desafios. Katak joventude mak nudar janela ida, iha nebe mundo futuro bele tama iha mundo atual, tanba hateke ba futuru hodi hahú realiza iha tempo ohin nebe nakonu ho desafio oi-oin. Nune’e atu actualiza mundo futuro iha mundo agora la’o ho diak, família católica temque moris tuir Maromak nia hakarak alias moris hosi no moris iha Bíblia. Tan Cristo hateten ba  Nia Inan no Nia maun alin sira dehan Hau nia Inan, Maun-alin no Bin-feton make ema sira neebe halo tuir Maromak ninia hakarak(Mc 3 : 35)”. Família católica nebe halo tuir Maromak nia hakarak ne’e hanesan sinal ka propósito unidade ba ema fiar nain sira.  Nu’u provérbio religioso ho língua Indonsia dehan Melaksanakan kehendak Allah adalah memaknai kesatuan di dalam komunitas orang beriman. Hanesan mos Salmista hananu dehan “Eu Venho para cumprir a vontade do Pai”. Significa família nebe halo tuir Maromak nia hakarak sai ona Familia Jesus nian. (Martinho do Nascimento Obe, estudante ISFIT Fatumeta, Faculdade de Filosofia(2013-2016), actualmente reporter no announcer iha RTK Malo’a Dili, Timor Leste), Opinião Pessoal. Iha sujestaun bele haruka mai iha address email : cono.mutis@gmail.com, ou bele contacto : +67077749662/75253302).

Fontes :

  • Bíblia
  • Concílio Vaticano II
  • A Família Uma Boa Notícia para a vida de nossos povos, José António Diaz, Edições CNBB, Brazil, 2008

Leave a Reply

Your email address will not be published. Required fields are marked *