shadow
Diocese de Dili > NOTÍCIAS > LETURA DIÁRIA > Segunda-Feira, XIII Semana Tempo Comum

Segunda-Feira, XIII Semana Tempo Comum

ANO B

 

Primeira Leitura                                                                                Am. 2. 6-10, 13-16

Lia housi Profecia Amós  nian

Na’i lia tun dehan nune’e: “Tan Israel nia hahalok áat housi dala tolu ba dala háat, Ha’u sei la muda Ha’u nia hanoin. Tan sira faan ema laran mós ba osan, ema kiak ba sandálias par ida; sira hanehan ema kiak sira, sira na’uk ema haraik-an sira nia sasan nebé hodi sira moris; wainhira aman no oan mane ne’e moris hamutuk ho feto klosan ida, sira hafo’er ha’u naran santo. Sira hakne’ak iha altar sira oin ho hatais sira be ema seluk hatusan no hemu tua nebé ema fó hodi selu multa iha sira maromak nia uma rasik. Ha’u rasik mak hamohu tiha housi sira oin ema amorreu sira, ema sira be nia áas hanesan ai cedro no kbiit hanesan ai carvalho; Ha’u mak fokit sai tiha sira nia fuan housi leten no abut housi okos. Ha’u rasik mak hasai imi housi Egipto. Iha tinan háat nulu nia laran, Ha’u lori imi housi rai fuik maran hodi haraik ba imi liman ema amorreu sira rain. Ne’e duni, Ha’u hamo’ut imi iha tahu hanesan kareta ida be du’ut nakonu. Nune’e, ema ain lais la bele halai, no ema nebé kbiit na’in, sei la hetan fali kbiit; ema barani sei la soi nia moris. Ida nebé tuda ho rama sei la tahan, no ema nebé lais liu atu halai sei la liu; ema be sa’e kuda sei la soi nia moris. Ema be barani liu iha ema barani sira seluk leet, sei halai molik iha loron neba”.

Maromak Futar Lia.

 

Salmo Responsorial                                                                                                                Sal. 49(50). 16bc-17, 18-19, 20-21, 22-23 (R. cf. 22ª)

Refrão : Hanoin ba, imi be haluha Maromak!!! Repete-se

 

Oinsá ‘o temi Ha’u nia lei,

Lori Ha’u nia lia moruk iha ó ibun

Ó be hakribi Ha’u nia hanourin,

No hewai Ha’u nia liafuan? Refrão

 

Ó be habelun ho na’ok tén,

Ó be hadulur ho ema adultéiro sira;

Ó be ko’alia de’it buat áat,

Ó nia nanal homan de’it lia bosok. Refrão

 

Ó tur ko’alia hasouru ó maun-alin,

Ó hafo’er ó nia inan rasik nia oan, nia naran.

Ó halo nune’e, Ha’u sei la nonok,

Ó hanoin Ha’u hanesan ó,

Ha’u sei soe ba ó oin, ó nia hahalok áat. Refrão

 

Hanoin ida ne’e, imi be haluha Maromak,

Atu Ha’u keta toman imi no imi la bele soi an.

Hana’i Ha’u no hasa’e sacrifício hahi nian;

Ba sira be tuir dalan lós ha’u fó maksoyn Maromak nian. Refrão

 

Aclamação                                                                                                                                                                                                      Sal. 94(95). 8ab

Refrão : Aleluia, Aleluia! Repete-se

                  Ohin imi rona karik Na’i nia lian,

                  Keta taka imi nia fuan. Refrão

 

Evangelho                                                                                                                                                                                                               Mt. 8. 18-22

Na’i Jesus Cristo nia Evangelho nu’udar São Mateus haktuir:

Iha tempo neba, Jesus haré tiha ema lubun boot hale’u Nia, Jesus haruka atu hakat liu ba tasi sorin balun ba.

Escriba ida mai hasouru Nia dehan: “Mestre, ha’u sei tuir Ita ba fatin hotu nebé Ita ba.” Jesus dehan ba nia; “Laku sira iha kuak, manu sira iha lalehan nia iha knuuk; maibé Oan Mane la iha fatin atu sadere nia ulun.”

Escolante ida fali hateten ba Nia: “Na’i, husik ha’u ba uluk lai hakoi ha’u nia aman.” Maibé Jesus hatan ba nia: “Ó mai tuir Ha’u ba; husik mate sira hakoi sira nia mate.”

Lia Maksoyn.

Leave a Reply

Your email address will not be published. Required fields are marked *