shadow
Diocese de Dili > NOTÍCIAS > LETURA DIÁRIA > Quarta-Feira, XIII Semana Tempo Comum

Quarta-Feira, XIII Semana Tempo Comum

ANO B

 

Primeira Leitura                                                                              Am. 5. 14-15, 21-24

Lia housi Profecia Amós  nian

Imi housi buat di’ak, keta buka buat áat atu imi bele moris. Nune’e, Na’i Maromak Lalehan no rai nian sei hôrik ho imi rasik dehan. Imi hakribi buat áat ba hodi hadomi buat di’ak, imi hakiak fali justiça iha tribunal. Na’i maromak Lalehan no Rai nian, hatudu karik laran-luak ba José nia emar sira be sei moris hela. Ha’u hakribi no fila kotuk ba imi nia festa sira; imi nia halibur malu be santo hasusar Ha’u laran. Imi hasa’e karik sacrifício no buat karan tunu nian mai ha’u, Ha’u sei la simu sira ne’e; imi nia sacrifício ho balada bokur, Ha’u sei la hakarak liu atu haré. Hado’ok housi Ha’u imi nia knananuk sira lian, be ha’u lakohi rona imi nia harpa sira lian. Maibe, halo lialós nakfakar-an hanesan ué, no justiça hanesan mota be la maran. 

Maromak Futar Lia.

 

Salmo Responsorial                                                                                                                        Sal. 49(50). 7, 8-9, 10-11, 12-13, 16bc-17 (R. 23ª)

Refrão : Ba ema nebé moris tuir dalan lós, Ha’u sei haraik maksoyn Maromak nian!!! Repete-se

 

Rona ba! Ha’u povo rona Ha’u ko’alia,

Israel, Ha’u fó sasin hasouru ó,

Ha’u mak Na’i, ó nia Maromak. Refrão

 

La’os tan ó sacrifício sira, Ha’u si’ak ó,

Ó nia buat-karan sira iha nafatin Ha’u oin;

Ha’u sei la simu karau oan housi ó luhan,

No bibi-malae housi ó bibi luhan. Refrão

 

Balada fuik sira iha ai laran ha’u nian,

Balada rihun ba rihun iha Ha’u foho sira.

Ha’u hatene manu sira hotu iha lalehan,

No Ha’u ukun balada hotu moris iha rai luan. Refrão

 

Ha’u hamlaha karik, Ha’u sei la fó hatene ba ó,

Basá, mundo no buat hotu nebe iha nia, Ha’u nian.

Ha’u han ka naan karau baka nian

Ka hemu bibi timur sira ran ? Refrão

 

Tan sá ó haktuir ha’u nia lei,

No lori nafatin Ha’u moruk iha ó ibun?

Ó be hakribi Ha’u nia hanourin,

No heuuai Ha’u nia liafuan? Refrão

 

Aclamação                                                                                                                                                                                                                      Tg. 1. 18

Refrão : Aleluia, Aleluia! Repete-se

                  Aman Maromak hakiak ita housi liafuan lialós nian atu

                  Ita bele sai criatura hot-hotu nia ulun. Refrão

 

Evangelho                                                                                                                                                                                                              Mt. 8. 28-34

Na’i Jesus Cristo nia Evangelho tuir São Mateus:

Iha tempo neba, Jesus hakur liu ba tasi sorin balu ba. Uainhira nia to’o iha rai Gadarenos, ema na’in rua ho diabo iha laran mai housi rate hasouru Nia. Sira si’ak la di’ak, halo ema ida la bele liu housi dalan neba. Teki-teki sira hakilar. “Iha sáida ho Ó no ami, Jesus, Maromak Oan? Ó mai iha ne’e atu halo ami terus molok nia tempo?”

Besik iha neba fahi lubuk ida han daudaun du’ut. Diabu sira husu ba nia: “Ó duni sai ami karik, haruka ami tama ba fahi sira neba.” Nia dehan ba sira: “Tama ba!” Sira sai no tama ba fahi sira laran; sira ne’e haksoit housi rai tatinis ba tasi hodi mate hotu iha ué laran. Fahi atan sira halai ba cidade hodi buat hotu ne’e, no mós kona ba buat nebe mosu ba ema nebe iha diabo iha laran. Cidade tomak sai mai hasouru Jesus. Uainhira sira haré Nia, sira husu Nia atu husik sira nia rai.

Lia Maksoyn.

Leave a Reply

Your email address will not be published. Required fields are marked *