shadow
Diocese de Dili > NOTÍCIAS > OPINIÃO > INVESTIGAÇÃO KONA BA CONTRIBUIÇÃO FILOSOFIA NIAN BA SOCIEDADE TIMOR

INVESTIGAÇÃO KONA BA CONTRIBUIÇÃO FILOSOFIA NIAN BA SOCIEDADE TIMOR

Investigação ne’e baseia bá viabilidade Instituto Superior de Filosofia e de Teologia (ISFIT, Fatumeta) nian

 

João Sarmento

 

Cargo Profissional:

Assistente Técnico IQA iha Instituto Superior de Filosofia e de Teologia (ISFIT), Fatumeta

Docente actual ba Ética-Moral iha Instituto de Ciência da Saúde (ICS), Díli

Educação informal no Formal:

Seminari Tinggi St. Paulus Ledalero Maumere-Folres (2010-2014)

Hasai Curso Filosofia (licenciatura) iha Sekolah Tinggi Filsafat Katolik Ledalero-Maumere (2010-2015)

Tuir Curso Especialização (pós-graduação) ba Filosofia no Teologia hosi cooperação entre PUCPR Brasil no ISFIT fatumeta (hala’o hela curso)

Tuir Curso Direito (licenciatura) iha Faculdade de Direito da UNTL (hala’o hela curso)

motto: Diligite lumen sapientiae! (Haka’as aan ba Roman matenek nian!)

E-mail: costasarmento230190@gmail.com

Contacto telefónico/WA: +670  77054045

 

 

  1. Introdução

Sociedade timorense sira sempre tama iha confusão, wainhira ko’alia kona ba sá mak Filosofia. Na maioria das vezes, povo sempre haree katak, Filosofia ne’e ciência ida nebé abstrata demais, no la iha relevância prática ba desenvolvimento de sociedade (gemeindeentwicklung). Particularmente, relance ne’e hetan afirmação iha momento nebé hau  halo pesquisa kona ba need assesment Instituto Superior de Filosofia e de Teologia (ISFIT, Fatumeta) nian. Housi respondente ema atus ida (sira nebé la estuda Filosofia), maioria associa curso Filosofia ba de’it seminarista ka ex-frater sira (Barak housi sira mak hanoin katak, curso Filosofia ne’e  ba de’it religioso sira ka ba de’it sira nebé mak hakarak sai padre). Sira seluk (minoria), la hatene kona ba curso ne’e nia função ka contribuição loloos mak sá (mesmo nune’e, sira reconhece resultado serviço hosi graduado sira Filsofia nian, liuliu ex-seminarista sira). Haree ba evidência ne’e, ita bele dehan katak sira nebé responde (especialmente sira nebé la estuda Filosofia) seidauk iha conhecimento suficiente no adequado kona ba sá mak Filosofia.

Baseia ba realidade iha leten ne’e, hau hakarak ko’alia brevemente kona ba sá mak Filosofia no ninia contribuição ba sociedade timorense (liuhosi análise conceptual no prova hosi dado estatístico sira-ne’ebé autor hetan, durante hala’o pesquisa kona ba viabilidade ISFIT nian).[1]

 

  1. Base Teorética: Filosofia ho nia Carácter

Iha parte ida ne’e, hau sei koko atu responde pergunta kona ba “sá mak Filosofia”. Pergunta ne’e lori ita ba dalan rua: primeiro, ita bele buka hetan definição adequada ida, ka se lae, segundo, ita bele identifica caráter sira nebé metin no estável (durável) housi ciência ne’e. Depois housi resposta teorética nebé iha, ita bele halo predição ida kona ba relevância ka contribuição Filosofia nian.

Etimologicamente termo “filosofia” mai housi liafuan grego  “philosopía” (philia: domin, sophia: sabedoria) nebé perito sira babain traduz sai “domin bá sabedoria” (Liebe zur Weis-heit).[2] Liu housi Platão nia obra, filósofo sira hatene katak Sócrates halo diferença entre na’in ba sabedoria (einen Weisen) ka sophos sira, no sira nebé sai belun bá sabedoria (Freund der Weisheit), nebé nia hanaran philósophos. Ba Sócrates, termo “sophos” so bele emprega bá Maromak, tan Nia mak na’in ba sabedoria. Diferente ho termo ne’e, “philosopos” mak ema nebé consciente kona ba sira nia “la hatene” (der um die Grenzen seines Wissens weiß). Domin ba sabedoria primeiro mai housi consciência ne’e. Só liu hosi “hatene” (consciente) katak “la hatene”, possibilidade ba curiosidade bele mosu, no ikus mai incarna sai pergunta kona-ba “ser” (moris, ema, sasaan, conceito no buat sira nebé existe iha “realidade concreta ka abstrata”). No fim, pergunta sira nebé mosu no hetan resposta ona, ikus mai sei produz fila fali pergunta foun sira sistematicamente no klean liutaan. Processo ne’e, sai nu’udar desejo no mós modus vivendi (meio temporal) ida-ne’ebé “contingentemente” no “teleologicamente” lori ema ba sabedoria “ideal”. Liu housi hanoin ne’e, ita bele compreende nusaa mak Filosofia ne’e significa amor à sabedoria.

Hanoin hikas ba conceito sira nebé hau apresenta ona, Filosofia em si bele leva forma rua: primeiro, nia bele sai nu’udar reflexão simples kona ba “moris” babain (ne’ebé ema hotu-hotu bele halo), no segundo, nia mós bele sai nu’udar esforço intelectual nebé sério, sistemático no lógico, hodi lori ema ba compreensão fundamental kona ba “ser”. Segunda possibilidade ne’e mak sai base ba ciência Filosofia.

Ko’alia kona ba Filosofia nu’udar ciência, identidade ne’e rasik exige método de investigação ne’ebé adequado no bele representa duni ninia carácter fundamental. Relaciona ho questão ne’e, hau haree katak, Sócrates (Filósofo grego-clássico no mós Platão nia professor rasik) iha ninia tempo, proporciona ona “método” específico ida ba Filosofia nebé nia hanaran tecnica maiêutica (maieutike tekhene).[3] Método ne’e facilita filósofo sira hodi tama ba dialética interior ida no buka-hetan resposta fundamental ba problema nebé mosu iha sociedade. Aristóteles esclarece método ne’e liuhosi analogia ida kona-ba parteira. Nia compara “conceito” ka “ideia” potencial sira ho feto nebé atu tuur ahi. Liu hosi pergunta no resposta sistemática sira, ema bele dada sai neneik ideia particular sira nebé existe iha ema ida-ida nia ulun, no ikusmai bele lori sira ba carácter sira-ne’ebé universal (hanesan parteira ajuda hasai bebé ida iha processo partos nian). Termo “maieutike tekhene” rasik significa método de parteira.

Haree-fila ba observação literal no etimológica nebé hau apresenta, no mós ba método nebé Sócrates oferece ita bele dehan katak, ciência Filosofia nia objeto mak “ser” ou “makiha” nebé existe iha forma concreta ka abstrata. “Ser” nebé mosu iha forma oioin ne’e, sempre iha ligação ho carácter sira nebé nafatin ka muda, concreta ka abstrata. Buat ida ne’e mak “dada” filósofo sira nia curiosidade hosi tempo grego clássico to’o agora.  Fundamenta ba hanoin ne’e, ita bele dehan katak, nu’udar ciência, Filosofia sempre tenta hodi buka hetan base sira nebé mais relevante no fundamental, ba confrotação sistemática entre dimensão estática no dinámica hosi  “ser”sira nian (Konflikt zwischen den statischen und den dynamischen Aspekten).[4]

Baseia ba concepção sira nebé autor apresenta ona, ita bele compreende Filosofia nia carácter sira nu’udar ciência: Primeiro, Filosofia teleologicamente sempre hakat ba princípio fundamental (sabedoria ideal), segundo, esforço intelectual nebé Filosofia halo sempre utiliza método dialectico-discurssivo nebé sistemático, hodi lori ema ba problema sira nia raiz, no terceiro, resposta sira nebé Filosofia oferece ba contexto específico sempre ajuda ema atu mantém equivalência entre princípio universal-transcendental (das sollen) no vida concreta (das sein).[5]

Relaciona ho caracter sira ne’e, hau rasik haree katak ciência filosofia ne’e relevante ba Timor. Sociedade mundial geralmente, no Timor especialmente, sempre hasoru problema oioin iha sira nia moris. Família, Política, Educação, Direito, Ética no Moral, Saúde, Religião, Tecnologia, Comunicação Pública, Economia Cultura no Arte (nebé consiste hosi aspeito estático no dinámico, ideal no real, abstrato no concreto) potencial hamosu problema complexo entre sira rasik. Problema sira ne’e dala barak la hetan resposta suficiente iha ciência específica sira, tanba ciência sira ne’e vinculada ho objeto concreto-específico no método nebé mais técnico (naktakan ba nia aan rasik).[6] Ho carácter sira nebé iha, Filosofia sai dalan ida atu resolve problema sira nebé ciência específica sira la consege resolve. Ne’e duni teoreticamente, Filosofia nu’udar ciência, relevante duni ba sociedade timorense.

 

  1. Prova housi Investigação Quantitativa no Qualitativa

Liu housi base teorética ne’ebé iha ona, hau hakarak lori leitor sira ba investigação kona ba contribuição ciência Filosofia nian ba sociedade Timor. Investigação ne’e halo hamutuk ho estudo ida kona ba viabilidade (feasibility) Instituto Superior de Filosofia e de Teologia (ISFIT Dom Jaime Garcia Goulart, Fatumeta) nian. ISFIT rasik hala’o educação formal iha área Filosofia no Teologia. Nu’udar ensino superior privado, ISFIT mós nakloke ba público. Filosofia ne’ebé ISFIT oferece ba sociedade mak Philosophy by Contextual Approach. Curriculo ISFIT nian  baseia ba Systematic Research Approach. Dalen ne’ebé ISFIT usa iha processo de aprendizagem mak língua portuguesa (tetum, inglês, latim, italiano, grego no hibráico sai língua suporta iha aula no learning resource sira liuliu hodi lee texto original iha dalen antigo sira). Ne’e duni, ba autor, ISFIT sai fatin nebé adequado hodi halo investigação kona ba Filosofia.

Iha parte ne’e, hau sei la hatudu detailhadamente kona ba método completo hosi investigação qualitativa no quantitativa (Qualitative und quantitative Forschungsmethoden) no questão técnica sira.[7] Hau sei oferece de’it relatório nebé sai duni prova ida ba contribuição ciência Filosofia.

 

  • Investigação Quantitativa

Baseia ba resultado housi instrumento sira nebé hau fó ba respondente sira (ema nain atus ida hosi ISFIT no nain atus ida hosi non-ISFIT), ita bele haree katak, grau relevância (contribuição) housi Filosofia ba sociedade tama iha categoria médio, tanba número housi :

Descriptive Statistics
N Minimum Maximum Sum Mean Std. Deviation
Statistic Statistic Statistic Statistic Statistic Std. Error Statistic
.ISFIT 100 15.00 32.00 2533.00 25.3300 .33637 3.36367
.Non.ISFIT 100 14.00 32.00 2187.00 21.8700 .44781 4.47813
Valid N (listwise) 100

 

Haree-fila bá categoria  sira nebé hau demonstra tiha ona iha proposta da investigação, frequência hosi média relevância Filosofia nian tama iha “posição ne’ebé di’ak” ka “good standing” (tanto housi respondentes ISFIT no mós non-ISFIT). Mesmo que valor médio housi respondentes ISFIT boot liu non-ISFIT nian, diferença entre sira nain rua ladún dook malu ida (tamba tama iha categoria ida de’it). Ita bele haree housi histograma hanesan tuir mai ne’e:[8]

Hosi grau relevância nebé apresenta ona iha leten,  hau halo fali investigação específica ida kona ba grau de correspondência entre Filosofia ho área oioin hanesan tuir mai ne’e:

Philosophy Carrier Developing
Classification Quantity Percent
Education 3.34 83.5
Economy 2.685 67.125
Politic 3.085 77.125
Leadership 3.05 76.25
Culture 2.63 65.75
Agriculture 2.42 60.5
NGO 3.12 78
Grade 1-4

 

Tabela iha leten ne’e hatudu grau de correspondência entre competência no habilidade ne’ebé graduado Filosofia iha área referida sira hanesan educação, economia, política, liderança, política, cultura, agricultura no NGO sira (Exemplo ita bele lee grau de correspondência entre Filosofia no área Educação nian hanesan ne’e: hosi competência no abilidade sira nebé graduado Filosofia sira iha, 83.5% correspondente ho área Educação). Ita bele haree iha histograma hanesan tuir mai ne’e:

Dado sira nebé hau apresenta ona, sai prova ida katak (particularmente): primeiro, Filosofia contribui ba formação intelectual graduado sira no segundo, curso Filosofia rasik sai curso ida que flexsível tanba bele utiliza iha área oioin (bele usa iha qualquer campo de trabalho). Relaciona ho Segunda interpretação ne’e, hau rasik haree katak, flexibilidade housi Filosofia rasik mai housi ninia método e objecto de estudo nebé mak “ser” rasik. Nu’udar ciência nebé estuda kona ba “ser” hotu-hotu, Filosofia bele proporciona ponto de vista ida mais compreensivo no igual nebé bele acomoda ciência hothotu.

 

  • Resultado hosi Investigação Qualitativa

Investigação qualitativa ne’e, ISFIT halo iha fatin nebé graduado Filosofia sira serviço bá. Objetivo housi pesquisa ne’e mak atu sukat qualidade housi aspeito cognitivo (comportamentos intelectuais), afectivo (emoção, carácter) no psicomotor.[9] Baseia bá intervista ho pessoa-chave (key person) sira, competência no habilidade (cognitive and psicomotoric aspects) sira nebé forte housi graduado Filosofia sira mak hanesan tuirmai ne’e:

No. COMPETÊNCIA NO ABILIDADE No. COMPETÊNCIA NO ABILIDADE
1. Capacidade organizacional. 9. Compreende língua oioin (multilanguage capacity)
2. Capacidade liderança ida di’ak. 10. Capacidade de ensinar ida di’ak (sira nebé sai docente no professor)
3. Crítico, hanoin kle’an no iha conhecimento ida luan. 11. Capacidade ida di’ak iha área communicação.
4. Capacidade de análise ida di’ak. 12. Capacidade de interpretação (liu-liu hodi compreende no interpreta texto escrito sira no contexto housi realidade).
5. Capacidade hakerek no construi conceito adequadamente. 13. Capacidade de administração ida di’ak.
6. Pensamento sira nian bom estruturado. 14. Capacidade atu halo gestão financeira ida di’ak.
7. Capacidade Public speaking nebé diak. 15. Matenek.
8. Capacidade atu halo argumento nebé di’ak. 16. Capacidade iha arte (música, teatro) nebé di’ak.

 

Haree bá aspecto afectivo fali, qualidade nebé  forte housi graduado Filosofia sira mak hanesan tuir mai ne’e:

NO. ATTITUDE NO. ATTITUDE
1. Maduro 15. Badinas
2. Calma 16. Pontual
3. Autocontrole ida diak 17. Creativo
4. Iha responsabilidade 18. Sincere
5. Adaptação ba situação diak no lalais 19. Consistência
6. Hard-worker 20. Tolerância
7. Obidiência 21. Haraik aan
8. Honesto 22. Humano
9. Bele serviço hamutuk 23. Familiar
10. Crítica no hanoin kle’an 24. Racional
11. Loyal 25. Razaoável
12. Senso comum ne’ebé diak 26. Sempre produz ideia ne’ebé inovativo
13. Disciplina nebé di’ak. 27. Open-minded
14. Iha espirito liderança nebé construtivo. 28. Independent (adapta no bele estuda mesak no lalais kona-ba buat foun iha serviço fatin)

 

Dado quantitativo no qualitativo nebé autor apresenta iha leten hatudu katak, graduado Filosofia sira (maioria housi ISFIT) iha tempo barak oferece duni qualidade no comportamento di’ak iha instituição nebé sira serviço ba. Ne’e duni, curso Filosofia nebé graduado sira hala’o, lori duni sira ba “sabedoria” intelectual-moral-social.

 

  1. Conclusão no Sugestão
    • Conlusão

Liu housi comparação entre base teorética no prova quantitativa no qualitativa nebé iha, ita bele foti conclusão ida katak, Filosofia iha duni relevância ba sociedade timorense. Comparação entre teoria no dados nebé iha mós hatudu katak, nu’udar ciência, Filosofia rasik proporciona formação ne’ebé wholistic (compreensivo) tanba fo atenção ba aspeito cognitivo, afectivo no psicomotor. Ne’e duni, Filosofia lori duni ema ba “sabedoria” teorética no prática.

 

  • Sugestão

Baseia ba base teorética no investigação ne’ebé hau halo ona, iha sugestão balu ne’ebé ita bele aplika iha ita-nia sociedade bele hanesan tuir mai ne’e:

  1. Iha área educação, ho carácter sira nebé a iha, Filosofia bele sai ciência ida nebé ajuda forma sociedade nia pensamento. Ne’e duni, tuir hau nia hanoin, di’ak ida quando escola secundária começa hanorin matéria introdução ba Filosofia, hodi forma ona pensamento crítico jovem sira nian.
  2. Filosófia sira iha knaar atu mantém equivalência entre dimensão real no ideal, no mós avalia fraqueza ne’ebé mosu liu hosi curiosidade fundamental. Instituição pública no privada sira mós bele utilisa ciência Filosofia hodi sukat sira nia qualidade de serviço no buka hetan base relevante sira hodi desenvolve sira nia instituição.
  3. Filosofia hanorin ema atu forma argumento lógica-sistemático no buka hetan fraqueza hosi argumento ka conceito ida. Nai ulun sira bele usa ciência Filosofia hodi sukat argumento sira nebé mosu iha debate kona ba desenvolvimento sociedade timorense nian no buka fundamento nebé mais relevante iha discussão nia laran.

 

“Filósofo mak pensador, crítico, moralista no hatudu dalan

ba ema sira nebé sei moris iha nakukun laran.” (Pe. Domingos Alves da Costa)

 

 

 

 

Kants. München: Heymann.

 

[1] Cfr. Internal Quality Assurance. Feasibility Study of ISFIT and Need Assessment of Curriculum. (ISFIT: Fatumeta, 2017) P. 26-44.

[2] Cfr. Schnädelbach, Herbert. Was is philosophie, iha Revista Académica Estudia Philosophica, vol. 66/2007 (Schweizerischen Akademie der Geistes- und Sozialwissenschaften: Switzerland,2007) P. 12. Texto original:“…<Philosophía>ist ein griechisches Wort und wird meist mit ‹Liebe zur Weis-heit› übersetzt…”

[3] Cfr. Ibid., P. 13.

[4] Cfr. Ibid., P. 14.

[5] Cfr. Ellschied, G.. Das Problem von Sein und Sollen in der Philosophie Immanuel Kants (Heymann: München, 1968) P. 46.

[6] Warbuton, Nigel. Elementos Básicos de Filosofia (edição revista e aumentada),(Gradiva: Lisboa, 2007), P. 23.

[7] Cfr. Heinke Röbken. Qualitative und quantitative Forschungsmethoden (Carl von Ossietzky Universität: Oldenburg, 2016) P. 19-52.

[8] Cfr. Internal Quality Assurance. Op. Cit., P 26-44.

[9] Cfr. Benjamin Bloom. Taxonomy of Educational Objective, Handbook 1: Cognitive Domain (Longmans:New York, 1975) p. 89.

Leave a Reply

Your email address will not be published. Required fields are marked *