shadow
Diocese de Dili > NOTÍCIAS > LETURA DIÁRIA > Quinta-Feira, XIII Semana Tempo Comum

Quinta-Feira, XIII Semana Tempo Comum

ANO B

 

Primeira Leitura                                                                   Am. 7. 10-17

Lia housi Profecia Amós nian

Iha loron hirak neba, Amazias, nailulik Betel nian, haruka dehan ba Jereboão, Israel nian liurai:” Amós buka ko’alia hasouru ó iha rai Israel  tomak. Nação la tahan ona lia sira be nia fó sai. Basá, nune’e mak nia hateten: “Jeroboão atu mate daudaun ona ho surik; ema seim lori Israel sai housi nia rain.” Hafoin, Amazias dehan ba Amós: Hadook-an tgiha housi ne’e, ó ema duina! Halai tiha ba rai Judá; iha neba mak ó buka moris hodi ko’alia nu’udar ema duina. Iha Betel ó sei la ko’alia tan nu’udar ema duina. Betel ne’e, liurai nia kadunan, reino nia templo. Amós hatan ba Acazias:” Ha’u la’os profeta ida ka ema duina ida nia oan. Ha’u bibi-atan oan ida, ha’u ema to’os na’in kuda hela ai figo. Na’i Maromak mak hasai ha’u housi ha’u nia serbisu. Nia rasik mak hateten mai ha’u: “Ó ba. Basá ó sei sai profeta ba Ha’u nia povo Israel. Oras ne’e, rona Na’i nia lian ba. Ó dehan: “Ó sei la hanourin nu’udar ema duina hasouru Israel, no mós la bele siik hasouru Issac nia uma.”

Tan ne’e, Na’i lia tun, dehan: “Ó nia féen sei hetan moe boot iha cidade laran; ó nia oan mane no oan feto sira, ema sei oho ho surik; ó nia rain ema sei fahe ba malu tuir sasukat tali nian. Ó rasik sei mate iha ema gentio sira rain; ema sei lori sai Israel ba rai seluk dook housi nia rain”.

Maromak Futar Lia.

 

Salmo Responsorial                                                                                                                   Sal. 18B(19B). 8, 9, 10, 11 (R. 10b)

Refrão : Na’i, tesi lia ho lialós no laran lós!!! Repete-se

 

Na’i nia lei lós tebes,

Fó ksolok ba klamar.

Na’i nia haruka metin tebes,

Fó matenek ba ema haraik-an sira. Refrão

 

Na’i nia ukunfuan lós tebes,

Sira haksolok fuan.

Na’i nia lei sira mós tebes,

Haroma matan sira. Refrão

 

Hamta’uk Na’i, mós tebes,

Hela metin tinan-ba-tinan,

Na’i tesi lia ho lialós tebes;

Sira hotu mesak lós duni. Refrão

 

Nia liafuan folin boot liu osan mean,

Osan mean nebé furak liu;

Sira midar liu wani ben,

Wani ben nebé midar tebes. Refrão

 

Aclamação                                                                                                                                                                                2Cor. 5. 19

Refrão : Aleluia, Aleluia! Repete-se

Housi Cristo, Maromak badame malu ho ita;

Nia haruka ita hala’o knaar badame malu nian. Refrão

 

Evangelho                                                                                                                                                                                   Mt. 9. 1-8

Na’i Jesus Cristo nia Evangelho tuir São Mateus:

Iha tempo neba, Jesus sa’e tiha ba ro ida, hakur tasi hodi to’o ba ninia cidade. Sira hatudu ba Nia ema isin maten ida, toba hela iha tobafatin. Haré tiha sira nia fiar, Jesus dehan ba ema moras ne’e: “Óan, barani ba, ó nia sala sira hetan ona perdua.” Escriba balun dehan iha sira nia laran: “Ema ne’e hateten áat Maromak”. Hatene tiha sira nia hanoin, Jesus dehan ba sira: “Tansá imi hanoin áat iha imi nia laran? Ida nebé mak lalais liu atu dehan: ‘Ó nia sala sira hetan tiha perdua,’ ka dehan ‘Ó hamriik, la’o ba’? Dia’ak, atu imi hatene katak iha rai ne’e Oan Mane iha kbiit atu kasu sala,” Nia dehan ba ema isin maten: “Hamriik ba, foti ó nia hadak, la’o ba ó nia uma.” Nia hamriik hodi lao ba nia uma. Haré tiha ne’e, ema lubun ta’uk teb-tebes hodi hasa’e glória ba Maromak nebé fó kbiit ida hanesan ne’e ba ema sira.

Sai tiha housi neba, Jesus haré ema ida naran Mateus, tur hela iha fatin kobra imposto nian hodi dehan ba nia;  “Tuir Ha’u mai!” Nia hamriik hodi tuir Jesus.

Lia maksoyn.

Leave a Reply

Your email address will not be published. Required fields are marked *