shadow
Diocese de Dili > NOTÍCIAS > REFLEXÃO > SO IHA NINIA RAIN RASIK MAK PROFETA IDA EMA LA SIMU

SO IHA NINIA RAIN RASIK MAK PROFETA IDA EMA LA SIMU

Mc. 6, 1-6

 

Maun alin sarani sira, simu malu no la simu malu iha ita nia ambiente moris nian ne’e buat normal ida, maibe nudar ema sarani rona tiha Maromak ninia futar liafuan ohin nian ita percisa reflete fali realidade ida ne’e hodi ao menos buka hare tuir matan ema sarani sira nian tamba sa mak dala balun ita simu malu no dala balun ita la simu malu mas que lolos ne’e ita hotu hakarak diak deit, hakarak simu malu nafatin nudar maun ho alin, hakarak reconhese nafatin ita nia kbiit no ita nia fraqueza sira iha ita nia moris hamutuk nundar familia ida ema no Maromak nian.

Hakat husi ita Nain Jesus Cristo ninia liafuan rasik be dehan iha evangelho ohin nian katak “Profeta ida ema so la simu iha ninia rain rasik, iha ninia uma no ninia maun alin sira le’et”, ita bele mos descobre fali realidade ida ne’e nebe dala barak ita hasoru no ita mos halo. ita experimenta mos katak iha momento balun ita mos la simu malu iha ita nia familia nia laran, iha ita nia serviço fatin, no la simu malu nudar maun ho alin no seluk seluk tan. Tamba sa mak ita la simu malu? Ita ida idak hatene ninia razão?

Maun alin doben sira hare ba buat nebe Jesus koko iha ninia rain rasik pergunta imediato ida nebe mosu mai ita mak ne’e, tamba sa mak iha ninia rain rasik no iha ninia maun alin sira nia le’e ema la simu Jesus Cristo be boot liu dook profeta sira, Nia be Maromak nia oan? Roman evangelho nian halo ita comprende katak ema sira iha ninia rain la simu nia tamba sira hare deit ba Jesus ninia origem familiar be iha moris loro loron nian hatudu sira nia moris nundar familia simples ida, maibe sira la hare Jesus ninia-an nudar Marksoin nebe lori salvação ba ita ema sira liu husi ninia hahalok sira iha; halo ema sira laran susar no triste hetan ksolok, ema hamlaha hetan hahan, ema moras hetan isin diak, diuk sira bele rona, laran hakmatek ba kiik sira, mate sira moris hias, domin laiha hetan domin, kuran ba paz hetan paz.

Iha ita nia la simu malu be ita experimenta dala barak liu iha ita nia moris nundar maun ho alin iha familia no nudar belun iha sociedade ita hatene didiak la simu malu ne’e tamba saida; ita nia la simu malu sira bele tamba lia la tuir malu, bele tamba sasan ka riku soin, bele tamba la gosta malu, bele mos tamba lia feto san uma mane nian, no tamba razão seluk tan. Ita balun fali experimenta la simu malu ne’e to’o ponto ida pior liu mak LULI MALU NO LAKOHI KA NEGA MALU TIHA DEIT.

Nudar ema sarani la simu malu tamba buat sira ne’e los ka lae karik? Ita nia razão sira ne’e labele sai fali buat nebe boot liu Maromak ninia hakarak be hatudu iha ita nia moris iha SIMU MALU BE HATUDU UNIDADE, AMIZADE, PAZ NO ALEGRIA. Ita nia la simu malu sira la hatudu hahalok moris ema sarani sira nian maibe hatudu hahalok laran to’os be hanesan ohin ita rona iha primeira leitura be dehan LA RONA MAROMAK. Ita nia la rona Maromak halo facil tebes ita ema sira la rona malu hodi hamosu la simu malu be ikus mai lori ba divisão, desunião, desonfiança, rancor no laran to’os. Ita la simu malu ne’e hatudu ita la rona Maromak hodi halo tuir deit mak ita nia hakarak atu halo satisfeito ka halo puas ita-an rasik.

Maun alin sira los duni ita ema fraku, dala barak tebes mak ita halo tuir deit ita nia hakarak sira hodi lakohi simu malu iha moris ne’e nundar maun ho alin. Pior liu tan mak laos deit lakoi simu malu maibe luli ka hakribi malu hodi nega malu tan. São Paulo husu mai ita atu iha ita nia fraquesa sira ne’e ita la halo ita nia an no ita nia hakarak mak sai hodi halo ita sai fraco liu tan maibe diak liu iha ita nia fraqueza sira ne’e ita buka atu halo tuir mak Maromak ninia hakarak hodi halo ita iha kbiit liu tan hodi moris nundar Maromak oan. Hanesan nia rasik dehan wainhira hau sente kbiit laek, força laiha, kbiit laek no hau husik Maromak mai serviço iha hau nia-an, nebe katak halo tuir Maromak ninia hakarak, iha neba mak hau hetan kbiit liu tan atu moris.

Doben Maun alin sira Maromak la hakarak ita nia LA SIMU MALU BE IKUS MAI FAHE ITA, ao contrario Maromak hakarak ita nia simu malu hodi moris hamutuk nafatin basa iha neba ita bele hetan los kbiit moris nian be hatudu iha ksolok, iha laran metin, iha confiança, laran maus no hakarak diak ba malu be husi neba sai fonte mai ita nia moris ksolok lolos nian nundar Maromak oan. Hodi halo nune’e ita bele ba nati tuir duni buat nebe sai importante liu iha moris ne’e be Jesus hatudo no halo tiha ona maibe infelizmente ninia maun alin no ninia rai la hare hetan; halo ema sira laran susar no triste hetan ksolok, ema hamlaha hetan hahan, ema moras hetan isin diak, diuk sira bele rona, laran hakmatek ba kiik sira, mate sira moris hias, domin laiha hetan domin, kuran ba paz hetan paz.

Mai nundar sarani ita buka halo tuir mak Maromak ninia hakarak iha Simu malu nafatin nundar maun ho alin familia ida deit mesak Maromak nia oan iha fatin hotu hotu hodi hatudu ita nia simu malu ne’e hanesan Cristu hanorin ona mai ita atu ba moris tuir.

Amen.

Bidau, 08.07.18

Leave a Reply

Your email address will not be published. Required fields are marked *