shadow
Diocese de Dili > NOTÍCIAS > LETURA DIÁRIA > Domingo XV iha Tempo Comum

Domingo XV iha Tempo Comum

ANO B

 

Primeira Leitura                                                                       Am. 7, 12-15

Lia housi Livro Profeta Amós

Iha loron hirak nebá, Amazias, sacerdote iha rai Betel, dehan ba Amós: “Ema duína, hadook-an tiha housi ne’e! Halai tiha ba rai Judá. Iha nebá, mak ó sei moris, ó sei buka ó nia ai-han. Maibé, iha Betel ó sei la ko’alia tan nu’udar ema duína. Betel, liurai nia uma lulik, reino nia uman”. Profeta Amós hatán ba Amazias: “Ha’u laós ema duína, ka ema duína ida nia oan. Ha’u bibi-atan oan ida, ha’u ema toos na’in ida. Maromak mak hasai ha’u housi ha’u knar. Nia mak hateten mai ha’u: “Ó ba! Ó sei ema duína ida iha Ha’u povo Israel nia leet”.

Maromak Futar Lia

 

Salmo Responsorial                                                                                                                      Sal. 84(85), 9ab-10. 11-12. 13-14

Refrão : Na’i, hatudu Ita domin mai ami, haraik Ita Maksoyn mai ami!!! Repete-se

Ha’u rona buat Na’i dehan:

Maromak fo hatene dame.

Na’i Maksoyn besik ba ema sira be hamta’uk Nia;

Nia glória horik iha ita rain. Refrão

 

Laran di’ak no domin sei hetan malu;

dame no justiça sei re’i malu.

Laran di’ak tubun housi rai;

justiça hakru’uk housi lalehan. Refrão

 

Na’i haraik buat nebé di’ak,

ita rain sei fo fuan.

Justiça sei la’o iha nia oin,

dame sama tuir Nia ain-fatin. Refrão

 

Segunda Leitura                                                                                                                                                                       Ef. 1, 3-14

Lia housi S. Paulo nia surat ba sarani iha Êfeso

Rahun di’ak ba Maromak, Na’i Jesus Cristo nia Aman! Housi lalehan tutun, hodi Cristo, Maromak haraik bensa oin-oin mai ita. Nune’e mak, molok atu haki’ak mundo, Maromak fihir kedas ita, atu ita bele moris nu’udar ema santo no ema sala laek iha Nia futar oin. Houri uluk kedas, Maromak fihir ita, atu moris nu’udar Nia oan haki’ak, tamba Cristo. Nune’e, tuir Nia laran di’ak, Na’i Maromak halo nia graça mosu mai ita, kmanek liu tan, atu halo ita sai kmanek liu, hamutuk ho Nia Oan doben Jesus Cristo Cristo. Hodi Nia futar ran rasik, Maromak Oan doben soy duni ita no kasu duni ita salan. Tamba Nia haraik graça barak teb-tebes mai ita, ita bele hetan duni matenek no neon nakloke. Maromak fo hatene nia hakaran mai ita, nu’udar houri uluk kedas Nia fo ba nia Oan doben, atu to’o tiha tempo nia rohan, Nia Oan doben halo tuir, katak: atu libur sasán hotu-hotu, iha lalehan ka iha rai-klaran, hamutuk ho Cristo nu’udar ukun-Na’in. Tamba Cristo, mak Maro-   mak fihir ita sira be ema judeu atu sai nia emar. Maromak halo buat hotu nu’udar Nia hakarak; nune’e, houri uluk kedas Nia hakarak fihir ita atu sai ema sira nebé hein nanis Cristo,  atu hahí Maromak nia glória. Hodi Cristo mak imi, rona tiha lialós, katak Lia Foun Maksoyn nian, imi mos fiar; nune’e, imi mos simu Espírito Santo nebé Maromak hakotu lia atu fo. Espírito Santo mak hametin ita nia liman rohan, wainhira ita sei titu hela rahun-di’ak Maromak emar sira nian, hodi hahí Maromak nia glória.

Maromak Futar Lia

 

Aclamação

Refrão : Aleluia, Aleluia! Repete-se

                  Ami Na’in Jesus Cristo Aman leno ami laran,

                  atu halo ami hatene hein ho laran metin Rahun-di’ak nebé Nia bolu imi atu simu. Refrão

 

Evangelho                                                                                                                                                                                 Mc. 6, 7-13

Na’i Jesus Cristo nia Evangelhonu’udar São Marcos haktuir:

Iha tempo nebá, Jesus bolu Apóstolo sira na’in sanulu resin rua, hodi haruka sira na’in rua-rua ba hanourin ema. Nia haraik mos ba sira, kbiit atu ukun espírito fo’er sira; Nia haruka sira lori de’it mak aitonka ida, la bele lori tan buat seluk iha dalan: sira la bele lori bukae eh kohe, ka doit iha futu-kabun; maibé hatais sandális iha sira ain, la bele lori hatais tahan rua. Jesus lia tun teni ba sira hodi dehan: “Tama tiha iha uma ida, imi sei horik iha nebá, to’o imi fila. Iha fatin ruma, ema la rona eh la simu karik imi, atu sai housi nebá, imi sei liki rai-rahun housi imi ain, nu’udar lia sasin ida, hasouru sira”. Apóstolo sira sai ba daudaun, hodi hanourin katak ida-idak sei laran moras nia salan. Sira duni sai diabo barak. Sira kose mina ba ema moras barak, hodi halo sira hetan isin di’ak.

Lia Maksoyn

Leave a Reply

Your email address will not be published. Required fields are marked *