shadow
Diocese de Dili > NOTÍCIAS > LETURA DIÁRIA > Quinta-Feira, XIV Semana iha Tempo Comum

Quinta-Feira, XIV Semana iha Tempo Comum

ANO B

 

Primeira Leitura                                                                   Os. 11. 1- 4, 8c-9

Lia housi Profecia Oseias nian

Na’i lia tun dehan: “Uanhira Israel sei ki’ik, Ha’u hadomi ona nia; nia Ha’u oan. Ha’u bolu nia atu sai housi Egipto. Ha’u mak hanourin Efraim atu la’o hodi simu nia iha Ha’u liman. Maibe, sira la hatene katak  Ha’u mak bali sira. Ha’u hakait sira ho tali ema nian no kesi sira ho domin. Ha’u tau matan ba sira hanesan ida be kô’us ki’ik oan iha hitin.

Ha’u hakru’uk to’o sira atu  fó aihan ba sira. Ha’u fuan tuku-tuku iha Ha’u laran, Ha’u laran maus sai maka’as tebes. Ha’u sei la hatudu tan Ha’u laran nakali; Ha’u sei la harahun tan Efraim. Tan Ha’u mak Maromak, Ha’u la’os ema, Ha’u mak Santo iha imi leet, Ha’u mai la’os atu harahun.

Na’i nia Futar Lia.

 

Salmo Responsorial                                                                                                                 Sal. 79(80). 2ac, 3b, 15-16 (R. 4b)

Refrão : Na’i, hatudu Ita futar oin mai ami, ami sei hetan maksoyn!!! Repete-se 

           

Bibi atan Israel nian, rona ba,

Ita be tur iha querubim sira leten, hatudu An ba!

Hafoun Ita biit, mai tulun ami. Refrão

 

Maromak Lalehan no Rai nian, fila hikas mai,

Lidu matan housi lalehan no haré, handi uvas ne’e,

Souri ai hun be Ita liman lós kuda,

Tubun be sai maka’as tiha ba Ita. Refrão

 

Aclamação                                                                                                                                                                                              Mc. 1. 15

Refrão : Aleluia, Aleluia! Repete-se

                  Maromak Nia reino besik ona;

                   imi hakribi imi nia salan no fiar iha Evangelho. Refrão

 

 

Evangelho                                                                                                                                                                               Mt. 10. 7-15

Na’i Jesus Cristo nia Evangelho nuda’ar São Mateus haktuir:

Iha tempo neba, Jesus haruka nia Apóstolo sira dehan: “Tuir dalan, haklaken ba katak reino lalehan besik ona. Halo moras sira hetan isin di’ak ba, halo mate sira moris hi’as fali ba, halo moras lepra sai mós, duni sai diabo sira. Imi simu hodi la selu, fó mós hodi la hein ema selu imi. Keta lori osan mean, osan mutin eh osan riti iha imi nia futukabun. La bele lori kohe tuir dalan, hatais than rua, sandalias, eh aitonka; basá serbisu na’in soi atu simu nia kolen.

Uanhira imi tama iha cidade ka knua ruma, husu lai ema sé mak di’ak, hodi hela iha neba to’o imi sai. Uanhira imi tama iha uma ida, cumprimenta nia ba. Uma ne’e so’i karik, imi nia dame sei tun ba sira; nia la so’i karik, imi nia dame sei fila ba imi. Ema la simu imi karik eh rona imi nia liafuan, liki rai rahun housi imi nia ain uanhira imi sai housi uma ka cidade ne’e. Tebes, Ha’u dehan ba imi katak iha loron justiça nian, rai Sodoma no Gomorra sira nia castigo sei la dun todan hanesan cidade ne’e nian.”

Lia maksoyn.

Leave a Reply

Your email address will not be published. Required fields are marked *