shadow
Diocese de Dili > NOTÍCIAS > LETURA DIÁRIA > Sábado, XIV Semana iha Tempo Comum

Sábado, XIV Semana iha Tempo Comum

ANO B

 

Primeira Leitura                                                                         Is. 6. 1-8       

Lia housi livro Isaías nian

Iha tinan neba Oziaz, liurai Judá nian, mate, ha’u haré Na’i hatodan – An iha trono ida áas liu tomak no kmook. Nia hatais taka tomak uma santo. Iha Na’i Nia futar oin, Anjo serafim sira hamriik hela ho liras rua hodi taka oin; ho liras rua seluk hodi taka ain ho tan liras rua hodi semo. Ida hakilar ba ida seluk: “Santo, Santo, Santo, Na’i Maromak Lalehan no Rai nian. Rai tomak nakonu ho nia glória”.

Uainhira Anjo sira hakilar, odamatan nia rin sira nakdoko, ahi suar nakonu iha uma santo laran. Nune’e, ha’u dehan: “Adou! HA’u susar ona! Basá, ha’u  ema ibun fó’er. Ha’u hôrik hamutuk ho ema ibun fó’er sira. Ha’u matan rasik haré Liurai, Lalehan no Rai nia Na’i”.

Anjo serafim ida, semo hasouru ha’u; nia káer hela iha nia liman ahi klaak hasai housi altar hodi besi habit ida. Nia kona  ha’u ibun ho ahi klaak ne’e hodi dehan mai ha’u: “Ahi – klaak ne’e kona tiha ona ó nia ibun; nia kasu ó salan, halakon ó nia hahalok áat hotu.” Iha oras ne’e, ha’u rona NA’i hateten: “Ha’u sei haruka lós sé? Sé mak sei ba hodi HA’u nia fatin? Ha’u hatan: “Ha’u mak ne’e! Bele haruka ha’u ba!”.

Maromak Futar Lia.

 

Salmo responsorial                                                                                                                     Sal. 92 (93). l ab, 1c – 2, 5 (R. 1ª)

Refrão : Na’i mak liurai, hafutar – An ho glória!!! Repete-se

 

Na’I mak liurai,

Hafutar –an ho biit liurai,

Hatais no kesi knotak ho biit. Refrão

 

Ita hametin tebes mundo, la nakdoko.

Hatur metin iha trono houri uluk ba nafatin.

Ita iha houri uluk ba nafatin. Refrão

 

Ita Nia sasin so’i tebes atu fiar,

Santidade hôrik iha ita  uma,

Ba nafatin. Refrão

 

Aclamção                                                                                                                                                                                  1 Ped. 4. 14

Refrão : Aleluia, Aleluia! Repete-se

                  Ksolok ba imi uainhira ema hasara imi tan Cristo nia naran,

                  basá Maromak nia Espírito hôrik ona iha imi. Refrão

 

Evangelho                                                                                                                                                                            Mt. 10. 24-33

Na’i Jesus Cristo nia Evangelho nu’udar São Mateus haktuir:

Iha tempo neba, Jesus hateten ba nia Apóstolo sira: “Escolante la bele boot liu fali mestre, atan la bele boot liu fali nia na’i. Escolante ida sai hanesan  nia mestre to’o ona, no mós ba atan sai hanesan nia na’in. Ema hanaran uma na’in Belbezu karik, oin sá liu tan mak sira sei hanaran sira nebe hela iha nia uma laran! Ne’e duni, keta ta’uk sira ba, basá la iha buat nebe subar hela nebe  ema sei la fó sai, eh buat nebe naksubar nebe ema sei la  hatene. Buat nebe Ha’u dehan ba imi iha nakukun laran, imi sei fó sai iha NAROMAN; buat nebe imi rona sub – subar de’’it, imi sei haklaken housi uma nia kakuluk leten.”

“keta ta’uk ema sira nebe oho isin lolon, maibe la bele oho klamar. Maibe ta’uk  ba ida nebe bele halo lakon isin no klamar hotu iha inferno. Manu oan rua la fa’an ba doit ida? Maibe sira ida la monu ba rai uainhira imi Aman la husik. Imi nia fuuk iha ulun mós sura hotu. Ne’e duni, imi keta ta’uk, basá imi folin liu manu oan barak.”

“Ne’e duni, ema nebe fó sasin karik kona ba Ha’u iha ema seluk nia oin, Ha’u mós sei sasain kona ba nia iha ha’u Aman nebe iha Lalehan nia oin. Maibe ema nebe heli lian Ha’u iha ema nia oin, Ha’u mós sei heli lian nia iha ha’u Aman nebe iha Lalelhan nia futar oin.”

Lia Maksoyn.

Leave a Reply

Your email address will not be published. Required fields are marked *