shadow
Diocese de Dili > NOTÍCIAS > LETURA DIÁRIA > Sexta-Feira, XIV Semana Tempo Comum

Sexta-Feira, XIV Semana Tempo Comum

ANO B

 

Primeira Leitura                                                                      Os. 14. 1-10

Lia housi Profecia Oseias nian

Na’i lia tun dehan:”Israel, fila mai Na’i, ó nia Maromak, tan ó nia salan mak halo ó monu. Ó mai ho liafuan harohan nian, fila mai Na’i hodi hasa’e lia ba Nia: ‘Perdua ami nia hahalok áat tomak; simu buat di’ak nebe ami iha; iha karau oan sira fatin, ami hasa’e ba Ita ami liafuan hahi nian. La’os Assíria mak bele soi ami; ami mós sei la sa’e kuda funu nian: ami sei la bolu ami nia maromak, buat nebe ami liman halo, tanba iha Ita mak oan kiak sira hetan domin’. Ha’u sei halo sira nia laran áat sai di’ak. Ha’u sei hadomi sira ho laran tomak, tanba Ha’u nia laran hirus atu la’o dook ona housi sira. Ha’u sei sai nu’udar mahauen ba Israel; nia sei nafunan hanesan ai-funan lírio, nia sei soe nia abut metin hanesan ai cedro Líbano nian. Nia delun sei naklekar to’o fatin dook, sei sai furak hanesan ai oliveira, nia morin sai hanesan ai cedro Líbano nian. Sira sei tur fali iha Ha’u nia mahan atu halo to’os trigo nian. Sira sei nafunan hanesan ai uvas, sira naran sei boot hanesan tua Líbano nian. Efraim, ó halo sá ho ó nia maromak falso sira? Ha’u mak lidu ó hodi hamatan ba ó. Ha’u hanesan ai cipreste matak, hodi Ha’u nia graça mak ó fó fuan ua’in.

Sé lós bele hatene liafuan hirak ne’e hotu, sé lós mak iha matenek atu simu ho neon hirak ne’e? Tanba Na’i nia dalan lós tebes, ema laran di’ak sira tuir dalan ne’e, maibe ema laran áat sira sidi monu iha dalan ne’e.

Maromak Futar Lia.

 

Salmo Responsorial                                                                                                          Sal. 50(51). 3-4, 8-9, 12-14, 17 (R. 17b)

Refrão : Ha’u ibun sei haklaken Ita glória!!! Repete-se

Na’i, sadi’a ha’u tan Ita laran luak,

Tan Ita laran di’ak tebes, kasu ha’u salan.

Hasai ha’u housi buat áat tomak,

Hamos ha’u salan hotu. Refrão

 

Ita hadomi laran lós ami fuan nian,

No halo ha’u hatene matenek be iha ha’u klamar.

Hisik iha ha’u ho hissope no hamos ha’u,

Fase ha’u no halo ha’u sai mutin

Liu fali mah-uen mutin.  Refrão

 

Maromak, haraik fuan mós ida mai ha’u,

Hafoun hikas kbiit ha’u klamar nian.

Keta soe ha’u ba dook housi Ita futar oin,

Keta hadook housi ha’u, Ita espírito santidade. Refrão

 

Haraik mai ha’u ksolok Ita maksoin nian,

Hametin iha ha’u espírito laran luak nian.

Na’i, loke ba ha’u ibun,

No ha’u ibun sei hananu Ita glória. Refrão

 

Aclamação                                                                                                                                                                Jo. 16. 13ª, 14. 26d

Refrão : Aleluia, Aleluia! Repete-se

                  Uanhira Espírito lialós nian mai, Nia sei hanourin lialós hotu ba imi.

                  Nia sei halo imi hanoin hetan fali buat hotu nebe Ha’u hanourin ba imi. Refrão

 

Evangelho                                                                                                                                                                             Mt. 10. 16-23

Na’i Jesus Cristo nia Evangelho nuda’ar São Mateus haktuir:

Iha tempo neba, Jesus hateten ba nia Apóstolo sira:”Ha’u haruka imi ba hanesan bibi sira iha asu fuik sira leet. Ne’e duni, matan moris neon na’in ba hanesan samea sira, no mós laran lós hanesan manu falur sira.

Matan moris ho ema sira. Sira sei lori imi ba sinédrio hodi baku imi iha sira nia sinagoga laran. Sira sei lori hodi kesar imi ba embo’ot no liurai sira tanba Ha’u, atu imi fó sasin ba sira no ba gentio sira. Maibe uanhira sira saran imi, keta hanorin resin kona ba sá mak imi sei hatan, eh ko’alia oin sá; iha oras neba sei haraik ba imi atu dehan sáida. Basá la’os imi mak ko’alia, maibe ami Aman nia Espírito mak sei ko’alia liu housi imi.

Maun sei saran nia alin ba mate, aman sei saran nia oan; oan sira sei foti liman hasouru aman sira hodi  oho sira. Ema hotu sei odi imi tan Ha’u nia naran; maibe ema nebe hela metin to’o rohan sei hetan maksoin. Uanhira ema hanehan imi iha cidade ida, imi ba cidade seluk. Ha’u dehan ba imi katak molok imi liu housi cidade hotu Israel nian, Oan mane sei mai ona.

Lia maksoyn.

Leave a Reply

Your email address will not be published. Required fields are marked *